سیدنا ابودرداء رضی اللہ عنہ فرماتے ہیں: زمانہ جاہلیت میں کوئی شخص طلاق دیتا تھا، پھر رجوع کر لیتا تھا اور کہتا تھا: میں نے تو مذاق کیا تھا اسی طرح غلام آزاد کرتا تھا اور پھر رجوع کر لیتا تھا اور یہ کہتا تھا: میں نے تو مذاق کیا تھا، پھر اللہ تعالیٰ نے یہ آیت نازل کی: ”تم لوگ اللہ تعالیٰ کی آیات کو مذاق نہ بناؤ“۔ تو نبی اکرم صلی اللہ علیہ وسلم نے ارشاد فرمایا: ”جو شخص طلاق دے، یا حرام قرار دے، یا نکاح کرے، یا نکاح کروائے اور پھر یہ کہے: میں تو مذاق کر رہا تھا، تو وہ سنجیدہ شمار ہو گا“۔
یہ روایت امام طبرانی نے نقل کی ہے، اس کی سند میں ایک راوی عمرو بن عبید ہے، اور وہ اللہ کے دشمنوں میں سے ایک ہے، میں یہ کہتا ہوں: اس طرح کی ایک حدیث ”طلاق“ سے متعلق باب میں آگے آئے گی۔ [مجمع الزاوئد ومنبع الفوائد/كِتَابُ النِّكَاحِ/حدیث: 7529]

عبدالکریم بیان کرتے ہیں: سیدنا عبداللہ بن مسعود رضی اللہ عنہ نے فرمایا: ”جو شخص مذاق کے طور پر نکاح کر دے، یا مذاق کے طور پر طلاق دے، تو یہ درست ہو گا (یعنی ثابت شمار ہو گا)“۔
یہ روایت امام طبرانی نے نقل کی ہے، اس میں ”معضل“ ہونا پایا جاتا ہے، اس کے رجال صحیح کے رجال ہیں ”طلاق“ سے متعلق باب میں اس نوعیت کی احادیث آگے آئیں گی، اگر اللہ نے چاہا، اور اس نوعیت کی دیگر احادیث ”غلام آزاد کرنے“ سے متعلق باب میں پہلے گزر چکی ہیں۔ [مجمع الزاوئد ومنبع الفوائد/كِتَابُ النِّكَاحِ/حدیث: 7530]