سیدنا انس بن مالک رضی اللہ عنہ سے روایت ہے کہ انہوں نے بیان کیا: ”ہم حج کے لیے باآواز بلند لبیک پکارتے ہوئے نکلے، پھر جب ہم مکہ پہنچے تو رسول اللہ صلی اللہ علیہ وسلم نے ہمیں حکم دیا کہ ہم اسے (اپنے احرام کو) عمرہ میں تبدیل کر دیں، اور آپ صلی اللہ علیہ وسلم نے فرمایا: ”اگر مجھے اپنے معاملے میں وہ بات پہلے معلوم ہو جاتی جو بعد میں معلوم ہوئی تو میں اسے ضرور عمرہ بنا لیتا، لیکن میں اپنے ساتھ قربانی کے جانور لے آیا ہوں اور میں نے حج اور عمرہ کا ایک ساتھ احرام باندھا (حجِ قران کیا) ہے۔““ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 4345]

سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”دو آنکھیں ایسی ہیں جنہیں کبھی بھی (جہنم کی) آگ نہیں چھوئے گی: ایک وہ آنکھ جس نے اللہ کی راہ میں مسلمانوں کی حفاظت و نگہبانی کرتے ہوئے رات گزاری، اور دوسری وہ آنکھ جو اللہ کے خوف و خشیت سے رو پڑی۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 4346]

سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم باہر تشریف لائے تو آپ صلی اللہ علیہ وسلم نے ایک بلند و بالا قبہ (عمارت) دیکھا، تو آپ صلی اللہ علیہ وسلم نے دریافت فرمایا: ”یہ کیا ہے؟“ صحابہ کرام رضی اللہ عنہم نے عرض کی کہ یہ انصار کے ایک شخص کا ہے، پس آپ صلی اللہ علیہ وسلم خاموش رہے اور اس ناپسندیدگی کو اپنے دل میں رکھا، یہاں تک کہ جب اس عمارت کا مالک رسول اللہ صلی اللہ علیہ وسلم کی خدمت میں حاضر ہوا اور لوگوں کی موجودگی میں آپ صلی اللہ علیہ وسلم کو سلام کیا تو آپ صلی اللہ علیہ وسلم نے اس سے اپنا رخِ مبارک پھیر لیا، اس نے کئی مرتبہ ایسا ہی کیا یہاں تک کہ اس شخص نے آپ صلی اللہ علیہ وسلم کی ناراضگی اور اعراض کو محسوس کر لیا، چنانچہ اس نے اس بات کا شکوہ اپنے ساتھیوں سے کیا اور کہا: ”اللہ کی قسم! میں رسول اللہ صلی اللہ علیہ وسلم کے طرزِ عمل میں تبدیلی محسوس کر رہا ہوں، میں نہیں جانتا کہ میرے متعلق کیا بات ہوئی ہے یا مجھ سے کیا خطا سرزد ہوئی ہے؟“ صحابہ نے بتایا کہ رسول اللہ صلی اللہ علیہ وسلم باہر تشریف لائے تھے تو انہوں نے تمہارا وہ بلند قبہ دیکھا تھا اور پوچھا تھا کہ ”یہ کس کا ہے؟“ تو ہم نے آپ صلی اللہ علیہ وسلم کو مطلع کر دیا تھا، یہ سن کر وہ شخص اپنے قبے کی طرف گیا اور اسے گرا کر زمین کے برابر کر دیا، پھر ایک روز رسول اللہ صلی اللہ علیہ وسلم باہر تشریف لائے تو وہ قبہ نظر نہ آیا، آپ صلی اللہ علیہ وسلم نے دریافت فرمایا: ”وہ قبہ کہاں گیا جو یہاں موجود تھا؟“ صحابہ نے عرض کی کہ اس کے مالک نے ہم سے آپ صلی اللہ علیہ وسلم کے اعراض کی شکایت کی تھی تو ہم نے اسے اصل بات بتا دی اور اس نے اسے منہدم کر دیا، اس پر آپ صلی اللہ علیہ وسلم نے ارشاد فرمایا: ”یقیناً ہر وہ عمارت جو تعمیر کی جائے گی وہ قیامت کے دن اپنے مالک کے لیے وبال ہو گی، سوائے اس عمارت کے جس کے بغیر چارہ نہ ہو (یعنی جو ضرورت کے مطابق ہو)۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 4347]

ابو طلحہ رحمہ اللہ بیان کرتے ہیں کہ سیدنا انس رضی اللہ عنہ کوفہ تشریف لائے تو لوگ ان کے پاس حاضر ہوئے اور عرض کرنے لگے کہ آپ ہمیں وہ ارشادات سنائیں جو آپ نے رسول اللہ صلی اللہ علیہ وسلم سے خود سماعت فرمائے ہیں، اس دوران وہ لوگوں کے ہجوم کی وجہ سے فرما رہے تھے: «إِلَيْكُمْ عَنِّي، أَيُّهَا النَّاسُ» ”اے لوگو! مجھ سے دور ہو جاؤ“، یہاں تک کہ لوگوں نے (دباؤ ڈال کر) انہیں محل کی دیوار کے ساتھ لگا دیا، پھر آپ رضی اللہ عنہ نے فرمایا: ”اے لوگو! اگر تم وہ حقائق جان لیتے جو میں جانتا ہوں تو تم یقیناً ہنستے کم اور روتے زیادہ، اے لوگو! اب میرے پاس سے واپس چلے جاؤ“، چنانچہ وہ لوگ واپس چلے گئے۔ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 4348]

سیدنا انس بن مالک رضی اللہ عنہ سے روایت ہے کہ نبی کریم صلی اللہ علیہ وسلم نے ارشاد فرمایا: ”جس شخص نے نکاح کر لیا، اسے یقیناً نصف عبادت عطا کر دی گئی۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 4349]

معبد بن ہلال العنزی رحمہ اللہ سے روایت ہے کہ بصرہ کے چند لوگ جمع ہوئے جن میں میں بھی شامل تھا، پھر ہم سیدنا انس بن مالک رضی اللہ عنہ کی خدمت میں حاضر ہوئے اور ثابت البنانی رحمہ اللہ کو اپنا سفارشی بنایا تاکہ ہم ان کے ذریعے اندر جا سکیں۔ جب ہم داخل ہوئے تو سیدنا انس رضی اللہ عنہ نے ثابت رحمہ اللہ کو اپنے ساتھ تخت پر بٹھا لیا۔ میں نے اپنے ساتھیوں سے کہا کہ آپ لوگ ان سے اس (شفاعت والی) حدیث کے علاوہ کچھ نہ پوچھیں۔ ثابت رحمہ اللہ نے عرض کی: ”اے ابو حمزہ! بصرہ سے آپ کے یہ بھائی آئے ہیں، وہ آپ سے رسول اللہ صلی اللہ علیہ وسلم کی شفاعت کے متعلق حدیث پوچھنا چاہتے ہیں“۔ سیدنا انس رضی اللہ عنہ نے فرمایا کہ ہمیں محمد صلی اللہ علیہ وسلم نے حدیث بیان کرتے ہوئے بتایا کہ آپ صلی اللہ علیہ وسلم نے فرمایا: ”جب قیامت کا دن ہوگا تو لوگ ایک دوسرے میں (موجوں کی طرح) گتھم گتھا ہوں گے، پھر وہ سیدنا آدم علیہ السلام کے پاس آئیں گے اور عرض کریں گے: اے آدم! اپنی اولاد کی شفاعت فرمائیے، تو وہ فرمائیں گے: میں اس منصب کے لیے نہیں ہوں، بلکہ تم سیدنا ابراہیم علیہ السلام کے پاس جاؤ کیونکہ وہ اللہ کے خلیل ہیں۔ پھر وہ سیدنا ابراہیم علیہ السلام کے پاس آئیں گے تو وہ بھی فرمائیں گے: میں اس کے لیے نہیں ہوں، بلکہ تم سیدنا موسیٰ علیہ السلام کے پاس جاؤ کیونکہ وہ اللہ کے کلیم ہیں۔ چنانچہ وہ اللہ کے برگزیدہ بندے سیدنا موسیٰ علیہ السلام کے پاس آئیں گے تو وہ فرمائیں گے: میں اس کے لیے نہیں ہوں، تم سیدنا عیسیٰ علیہ السلام کے پاس جاؤ کیونکہ وہ اللہ کی روح اور اس کا کلمہ ہیں۔ پس وہ سیدنا عیسیٰ علیہ السلام کے پاس آئیں گے تو وہ فرمائیں گے: میں اس کے لیے نہیں ہوں، بلکہ تم محمد صلی اللہ علیہ وسلم کے پاس جاؤ۔ پھر لوگ میرے پاس آئیں گے تو میں کہوں گا: میں ہی اس (شفاعت) کے لیے ہوں۔ پھر میں چلوں گا اور اپنے رب سے (حاضری کی) اجازت طلب کروں گا، تو مجھے اجازت دی جائے گی، پھر میں اس کے سامنے ایک ایسے مقام پر کھڑا ہوں گا جہاں اللہ مجھ پر اپنی ایسی حمد و ثناء الہام فرمائے گا جن پر میں اس وقت قدرت نہیں رکھتا، پھر میں ان کلمات کے ساتھ اس کی حمد بیان کروں گا اور اس کے حضور سجدہ ریز ہو جاؤں گا، تو مجھ سے کہا جائے گا: اے محمد! اپنا سر اٹھائیں، کہیے! آپ کی بات سنی جائے گی، مانگیے! آپ کو دیا جائے گا اور شفاعت کیجیے! آپ کی شفاعت قبول کی جائے گی۔ تو میں عرض کروں گا: «أَيْ رَبِّ، أُمَّتِي أُمَّتِي» ”اے میرے رب! میری امت، میری امت“۔ تو مجھ سے کہا جائے گا: جائیے، اور جس کے دل میں گندم کے دانے کے برابر یا جو کے دانے کے برابر بھی ایمان ہو، اسے (آگ سے) نکال لیجیے، چنانچہ میں جاؤں گا اور ایسا ہی کروں گا۔ پھر میں دوبارہ آؤں گا اور انہی تعریفوں کے ساتھ اپنے رب کی حمد کروں گا اور اس کے سامنے سجدے میں گر جاؤں گا، تو کہا جائے گا: اے محمد! اپنا سر اٹھائیں، کہیے! آپ کی بات سنی جائے گی، مانگیے! آپ کو عطا کیا جائے گا اور شفاعت کیجیے! آپ کی شفاعت مانی جائے گی۔ میں عرض کروں گا: «أَيْ رَبِّ، أُمَّتِي أُمَّتِي» ”اے میرے رب! میری امت، میری امت“۔ پھر مجھ سے کہا جائے گا: جائیے، اور جس کے دل میں ذرہ برابر یا رائی کے دانے کے برابر بھی ایمان ہو اسے اس (آگ) سے نکال لیجیے، چنانچہ میں جاؤں گا اور ویسا ہی کروں گا۔ پھر میں (تیسری بار) واپس آؤں گا اور انہی کلمات کے ساتھ اللہ کی حمد و ثناء کروں گا، پھر اس کے حضور سجدہ ریز ہو جاؤں گا، تو کہا جائے گا: اے محمد! اپنا سر اٹھائیں، بات کیجیے! آپ کی بات سنی جائے گی، مانگیے! آپ کو دیا جائے گا اور شفاعت کیجیے! آپ کی شفاعت قبول ہوگی۔ میں پھر عرض کروں گا: «أَيْ رَبِّ، أُمَّتِي أُمَّتِي» ”اے میرے رب! میری امت، میری امت“۔ تو مجھ سے کہا جائے گا: جائیے، اور جس کے دل میں رائی کے دانے سے بھی کم سے کم تر ایمان ہو، اسے آگ سے، آگ سے، آگ سے نکال لیجیے“۔ معبد رحمہ اللہ کہتے ہیں کہ جب ہم سیدنا انس رضی اللہ عنہ کے پاس سے رخصت ہوئے تو میں نے اپنے ساتھیوں سے کہا: کیا تم حسن (بصری) رحمہ اللہ کے پاس چلنا چاہتے ہو؟ وہ اس وقت قبیلہ عبد القیس میں ابو خلیفہ کے گھر روپوش تھے۔ چنانچہ ہم ان کے پاس پہنچے اور ان کی خدمت میں حاضر ہو کر عرض کیا کہ ہم آپ کے بھائی سیدنا انس رضی اللہ عنہ کے پاس سے آئے ہیں اور انہوں نے شفاعت کے متعلق ہمیں جو حدیث سنائی ہے اس جیسی ہم نے کبھی نہیں سنی۔ انہوں نے پوچھا: انہوں نے تمہیں کیا بیان کیا؟ ہم نے انہیں وہ حدیث سنائی یہاں تک کہ جب ہم (آخری حصے تک) پہنچے تو انہوں نے فرمایا: ”آگے سناؤ؟“ ہم نے عرض کیا: انہوں نے ہمیں اس سے زیادہ نہیں بتایا۔ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 4350]

حسن بصری رحمہ اللہ نے فرمایا: سیدنا انس رضی اللہ عنہ نے ہمیں یہ حدیث پوری تفصیل کے ساتھ سنائی تھی؛ انہوں نے بیس سال پہلے مجھے یہ حدیث بیان کی تھی، لیکن اب شیخ نے اس کا کچھ حصہ چھوڑ دیا ہے۔ میں نہیں جانتا کہ وہ اسے بھول گئے ہیں یا تمہیں بتانا اس لیے ناپسند کیا کہ تم اسی پر بھروسا نہ کر بیٹھو۔ انہوں نے مجھے بتایا کہ نبی کریم صلی اللہ علیہ وسلم نے چوتھی مرتبہ کے بارے میں فرمایا: پھر میں دوبارہ لوٹ کر اپنے رب کے حضور سجدے میں گر جاؤں گا اور انہی کلماتِ حمد سے اس کی حمد کروں گا۔ مجھ سے کہا جائے گا: اے محمد! اپنا سر اٹھائیے، کہیے آپ کی بات سنی جائے گی، مانگیے آپ کو عطا کیا جائے گا اور شفاعت کیجیے آپ کی شفاعت قبول کی جائے گی۔ میں عرض کروں گا: اے میرے رب! مجھے ان لوگوں کے بارے میں بھی اجازت عطا فرما جنہوں نے سچے دل سے لا إله إلا الله کہا ہے۔ فرمایا: مجھ سے کہا جائے گا: یہ معاملہ آپ کے سپرد نہیں؛ میری عزت، کبریائی اور عظمت کی قسم! میں جہنم سے ہر اس شخص کو ضرور نکالوں گا جس نے لا إله إلا الله کہا ہوگا۔ راوی کہتے ہیں: میں حسن بصری رحمہ اللہ کے بارے میں گواہی دیتا ہوں کہ انہوں نے ہمیں یہ حدیث اسی دن سنائی تھی جس دن سیدنا انس رضی اللہ عنہ نے بیان کی تھی۔ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 4351]

الجعد ابوعثمان رحمہ اللہ بیان کرتے ہیں کہ سیدنا انس بن مالک رضی اللہ عنہ نے یہاں بنو رفاعہ کی مسجد میں نماز پڑھی، انہوں نے اپنے ساتھیوں میں سے ایک شخص کو اذان دینے کا حکم دیا اور انہیں صبح کی نماز پڑھائی، پھر جب وہ نماز سے فارغ ہوئے تو لوگوں کی طرف متوجہ ہو کر فرمایا کہ رسول اللہ صلی اللہ علیہ وسلم جب اپنے اصحاب کو نماز پڑھاتے تو (فراغت کے بعد) لوگوں کی طرف رخِ انور کر کے یہ دعا فرماتے تھے: «اللَّهُمَّ إِنِّي أَعُوذُ بِكَ مِنْ عَمَلٍ يُخْزِينِي، اللَّهُمَّ إِنِّي أَعُوذُ بِكَ مِنْ غِنًى يُطْغِينِي، اللَّهُمَّ إِنِّي أَعُوذُ بِكَ مِنْ صَاحِبٍ يُرْدِينِي، اللَّهُمَّ إِنِّي أَعُوذُ بِكَ مِنْ أَمْرٍ يُلْهِينِي، اللَّهُمَّ إِنِّي أَعُوذُ بِكَ مِنْ فَقْرٍ يُنْسِينِي» ”اے اللہ! میں ایسے عمل سے تیری پناہ مانگتا ہوں جو مجھے رسوا کر دے، اے اللہ! میں ایسی مالداری سے تیری پناہ مانگتا ہوں جو مجھے سرکش بنا دے، اے اللہ! میں ایسے ساتھی سے تیری پناہ مانگتا ہوں جو مجھے ہلاکت میں ڈال دے، اے اللہ! میں ایسے کام سے تیری پناہ مانگتا ہوں جو مجھے (حق سے) غافل کر دے، اور اے اللہ! میں ایسی تنگدستی سے تیری پناہ مانگتا ہوں جو مجھے (فرائض و احکام) بھلا دے۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 4352]

سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”تم رات کا کھانا ضرور کھایا کرو، خواہ وہ معمولی درجے کی خشک کھجوروں کی ایک مٹھی ہی کیوں نہ ہو، کیونکہ رات کا کھانا ترک کرنا بڑھاپے اور ناتوانی کا باعث بنتا ہے۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 4353]

سیدنا انس بن مالک رضی اللہ عنہ سے روایت ہے کہ سیدہ ام سلیم رضی اللہ عنہا نے رسول اللہ صلی اللہ علیہ وسلم کی گفتگو سماعت فرمائی تو عرض گزار ہوئیں: ”یا رسول اللہ! میرے ماں باپ آپ پر قربان ہوں، کاش کہ آپ اس (انس) کے لیے اللہ تعالیٰ سے چند دعائیں فرما دیتے!“، سیدنا انس رضی اللہ عنہ بیان کرتے ہیں کہ ”تب رسول اللہ صلی اللہ علیہ وسلم نے میرے حق میں تین دعائیں فرمائیں، جن میں سے دو کا ثمر تو میں نے دنیا ہی میں دیکھ لیا ہے اور مجھے قوی امید ہے کہ میں تیسری دعا کا اثر آخرت میں دیکھوں گا“۔ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 4354]