سیدنا انس بن مالک رضی اللہ عنہ سے روایت ہے کہ ”رسول اللہ صلی اللہ علیہ وسلم جب کسی مقام پر پڑاؤ فرماتے تو وہاں سے اس وقت تک کوچ نہ فرماتے جب تک کہ دو رکعتیں ادا کر کے اس جگہ کو الوداع نہ کہہ لیتے۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 4315]

سیدنا انس بن مالک رضی اللہ عنہ سے روایت ہے کہ ”نبی اکرم صلی اللہ علیہ وسلم جب دورانِ سفر کسی جگہ قیام فرماتے اور پھر وہاں سے روانگی کا ارادہ کرتے تو اس مقام کو دو رکعتیں پڑھ کر الوداع کہتے تھے۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 4316]

سیدنا انس رضی اللہ عنہ سے روایت ہے کہ انہوں نے بیان فرمایا کہ ”رسول اللہ صلی اللہ علیہ وسلم نے مجھ سے ارشاد فرمایا: «يَا بُنَيَّ» ”اے میرے پیارے بیٹے!““ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 4317]

سیدنا انس بن مالک رضی اللہ عنہ سے روایت ہے کہ انہوں نے فرمایا: ”ہم رسول اللہ صلی اللہ علیہ وسلم کے ساتھ عصر کی نماز اس وقت ادا کیا کرتے تھے جب سورج ابھی سفید اور بلند ہوتا تھا، پھر میں اپنے قبیلے والوں کے پاس آتا تو انہیں (فارغ) بیٹھے ہوئے پاتا، تو میں ان سے کہتا: تم بھی اٹھو اور نماز پڑھ لو، کیونکہ رسول اللہ صلی اللہ علیہ وسلم نماز ادا فرما چکے ہیں۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 4318]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم جب کسی کے گھر والوں کے ہاں کھانا تناول فرماتے تو یہ دعا دیتے: «أَفْطَرَ عِنْدَكُمُ الصَّائِمُونَ، وَأَكَلَ طَعَامَكُمُ الْأَبْرَارُ، وَصَلَّتْ عَلَيْكُمُ الْمَلَائِكَةُ» ”تمہارے ہاں روزہ دار افطار کریں، تمہارا کھانا نیک و کار لوگ کھائیں اور فرشتے تمہارے لیے دعائے رحمت و مغفرت کریں“۔ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 4319]

سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم جب کبھی کسی اہل خانہ کے ہاں افطار فرماتے تو (ان کے حق میں یوں دعا) فرماتے: «أَفْطَرَ عِنْدَكُمُ الصَّائِمُونَ، وَأَكَلَ طَعَامَكُمُ الْأَبْرَارُ، وَتَنَزَّلَتْ عَلَيْكُمُ الْمَلَائِكَةُ» ”تمہارے ہاں روزہ دار افطار کریں، نیک و صالح لوگ تمہارا کھانا کھائیں اور تم پر فرشتے (رحمت بن کر) نازل ہوں“۔ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 4320]

سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم جب کسی کے ہاں روزہ افطار فرماتے تو یہ دعا ارشاد فرماتے: «أَفْطَرَ عِنْدَكُمُ الصَّائِمُونَ، وَأَكَلَ طَعَامَكُمُ الْأَبْرَارُ، وَتَنَزَّلَتْ عَلَيْكُمُ الْمَلَائِكَةُ» ”تمہارے ہاں روزہ دار افطار کریں، تمہارا کھانا نیک لوگ تناول کریں اور تم پر فرشتے (رحمت و برکت کی دعائیں کرتے ہوئے) نازل ہوں۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 4321]

سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم جب کسی گھرانے کے ہاں افطار کرتے تو فرماتے: ”تمہارے ہاں روزہ دار افطار کریں، تمہارا کھانا نیک لوگ کھائیں اور تم پر فرشتے نازل ہوں۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 4322]

سیدنا انس بن مالک رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”یقیناً میرے بعد ایسے فاسق حکمران ہوں گے جو نماز کو اس کے (مستحب) وقت کے علاوہ (تاخیر سے) پڑھیں گے، پس جب وہ ایسا کریں تو تم (فرض) نماز اس کے مقررہ وقت پر ادا کر لیا کرو اور ان کے ساتھ پڑھی جانے والی نماز کو نفل قرار دے دیا کرو۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 4323]

سیدنا انس رضی اللہ عنہ سے روایت ہے، حمزہ الضبی رحمہ اللہ کہتے ہیں کہ میں نے سیدنا انس رضی اللہ عنہ کو یہ فرماتے ہوئے سنا کہ ”رسول اللہ صلی اللہ علیہ وسلم (دورانِ سفر) جب کسی منزل پر قیام فرماتے تو وہاں سے اس وقت تک کوچ نہ فرماتے جب تک کہ ظہر کی نماز ادا نہ فرما لیتے“، راوی بیان کرتے ہیں کہ اس پر محمد بن عمرو رحمہ اللہ نے ان سے دریافت کیا: ”اگرچہ وہ عین نصف النہار کا وقت ہی کیوں نہ ہو؟“ تو انہوں نے جواب دیا: ”ہاں، خواہ وہ عین نصف النہار کا وقت ہی ہو۔“ [مسند أبي يعلى الموصلي/مُسْنَدُ أَنَسِ بْنِ مَالِكٍ/حدیث: 4324]