سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم کو تین کپڑوں میں کفن دیا گیا، جن میں سے ایک قمیص تھی۔
امام طبرانی رحمہ اللہ فرماتے ہیں: ”حمید سے یہ حدیث صرف حماد نے روایت کی ہے، اور حماد سے صرف مسلم نے، اور اس میں ابن عقیل منفرد ہیں۔“ [المعجم الأوسط/بَابُ الْأَلِفِ/حدیث: 2118]

سیدنا عبداللہ بن عمر رضی اللہ عنہما سے روایت ہے کہ صلح حدیبیہ کے دن رسول اللہ صلی اللہ علیہ وسلم نے لوگوں کو بیعت کے لیے بلایا تو سیدنا ابوسنان بن محصن رضی اللہ عنہ آئے اور عرض کیا: ”اے اللہ کے رسول! جو کچھ آپ کے دل میں ہے میں اس پر آپ سے بیعت کرتا ہوں۔“ آپ صلی اللہ علیہ وسلم نے فرمایا: ”میرے دل میں کیا ہے؟“ انہوں نے عرض کیا: ”یہ کہ میں آپ کے سامنے اپنی تلوار چلاتا رہوں یہاں تک کہ اللہ تعالیٰ آپ کو غلبہ عطا فرما دے یا میں شہید کر دیا جاؤں۔“ چنانچہ آپ صلی اللہ علیہ وسلم نے ان سے بیعت لے لی، اور لوگوں نے بھی ابوسنان رضی اللہ عنہ والی بیعت ہی پر بیعت کی۔
امام طبرانی رحمہ اللہ فرماتے ہیں: ”اس حدیث کو امام زہری رحمہ اللہ سے محمد بن عبدالعزیز بن عمر بن عبدالرحمن بن عوف کے سوا کسی نے روایت نہیں کیا، اور نہ ہی محمد سے عبدالعزیز بن عمران کے سوا کسی نے روایت کیا ہے، اس میں یعقوب بن محمد منفرد ہیں۔“ [المعجم الأوسط/بَابُ الْأَلِفِ/حدیث: 2119]

سیدنا ابوذر رضی اللہ عنہ نے فرمایا: ”متعہ (یعنی حج کا متعہ) صرف ہم محمد صلی اللہ علیہ وسلم کے صحابہ کے لیے خاص تھا۔“
امام طبرانی رحمہ اللہ فرماتے ہیں: ”اس حدیث کو عبدالرحمن بن ابی الشعثاء سے بیان کے سوا کسی نے روایت نہیں کیا، اور نہ ہی بیان سے مفضل بن مہلہل کے سوا کسی نے روایت کیا ہے، اس میں یحییٰ بن آدم منفرد ہیں۔“ [المعجم الأوسط/بَابُ الْأَلِفِ/حدیث: 2120]

سیدنا سمرہ بن جندب رضی اللہ عنہ سے روایت ہے کہ نبی کریم صلی اللہ علیہ وسلم نے ایک عورت کی نماز جنازہ پڑھائی تو اس کے وسط (درمیان) میں کھڑے ہوئے۔
امام طبرانی رحمہ اللہ فرماتے ہیں: ”اس حدیث کو شعبہ سے شبابہ اور حجاج بن نصیر کے سوا کسی نے روایت نہیں کیا۔“ [المعجم الأوسط/بَابُ الْأَلِفِ/حدیث: 2121]

سیدنا عبداللہ بن مسعود رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”بندہ جھوٹ بولتا رہتا ہے یہاں تک کہ اللہ کے ہاں اسے کذاب (بہت جھوٹا) لکھ دیا جاتا ہے، اور سچ بولتا رہتا ہے یہاں تک کہ اللہ کے ہاں اسے صدیق (نہایت سچا) لکھ دیا جاتا ہے۔“
امام طبرانی رحمہ اللہ فرماتے ہیں: ”اس حدیث کو عبدالاعلیٰ سے اسرائیل کے سوا کسی نے روایت نہیں کیا، اس میں ابوغسان منفرد ہیں۔“ [المعجم الأوسط/بَابُ الْأَلِفِ/حدیث: 2122]

سیدنا عبداللہ بن عباس رضی اللہ عنہما بیان کرتے ہیں کہ نبی کریم صلی اللہ علیہ وسلم کے کسی گھر میں ایک بکری مر گئی تو نبی کریم صلی اللہ علیہ وسلم نے فرمایا: ”تم نے اس کی کھال سے فائدہ کیوں نہ اٹھایا؟“
امام طبرانی رحمہ اللہ فرماتے ہیں: ”اس حدیث کو ابراہیم بن نافع سے یحییٰ بن ابی بکیر کے سوا کسی نے روایت نہیں کیا۔“ [المعجم الأوسط/بَابُ الْأَلِفِ/حدیث: 2123]

سیدنا سلمہ بن نعیم رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جس نے «لَا إِلَهَ إِلَّا اللهُ» کہا وہ جنت میں داخل ہوگا، خواہ اس نے زنا کیا ہو اور خواہ چوری کی ہو۔“
امام طبرانی رحمہ اللہ فرماتے ہیں: ”اس حدیث کو منصور سے شیبان کے سوا کسی نے روایت نہیں کیا۔“ [المعجم الأوسط/بَابُ الْأَلِفِ/حدیث: 2124]

سیدنا جابر رضی اللہ عنہما بیان کرتے ہیں: ”ہم منافقوں کو صرف اس بات سے پہچانتے تھے کہ وہ سیدنا علی رضی اللہ عنہ سے بغض رکھتے تھے۔“
امام طبرانی رحمہ اللہ فرماتے ہیں: ”اس حدیث کو زہیر سے محمد بن قاسم کے سوا کسی نے روایت نہیں کیا۔“ [المعجم الأوسط/بَابُ الْأَلِفِ/حدیث: 2125]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”میری اس مسجد میں ایک نماز دیگر مساجد میں ایک ہزار نماز سے افضل ہے، سوائے مسجد حرام کے۔“
امام طبرانی رحمہ اللہ فرماتے ہیں: ”اس حدیث کو حبیب بن ابی ثابت سے مسعودی کے سوا کسی نے روایت نہیں کیا، اور مسعودی سے حسین بن محمد کے سوا کسی نے روایت نہیں کیا، اور اسحاق بن ابراہیم بغوی اس کی روایت میں منفرد ہیں۔“ [المعجم الأوسط/بَابُ الْأَلِفِ/حدیث: 2126]

ام المومنین سیدہ عائشہ رضی اللہ عنہا سے روایت ہے کہ نبی کریم صلی اللہ علیہ وسلم نے فرمایا: ”جب تم میں سے کوئی جمعہ کے لیے آئے تو اسے چاہیے کہ غسل کرے۔“
امام طبرانی رحمہ اللہ فرماتے ہیں: ”اس حدیث کو یحییٰ بن ابی کثیر سے ہشام کے سوا کسی نے روایت نہیں کیا، اور ہشام سے عبیداللہ بن عبدالمجید کے سوا کسی نے روایت نہیں کیا، اور زہیر بن محمد اس کی روایت میں منفرد ہیں۔“
دار الحرمین کے نسخے میں اسی طرح ہے، اور غالباً درست «المروزی» ہے۔ [المعجم الأوسط/بَابُ الْأَلِفِ/حدیث: 2127]