اللہ تعالیٰ کے اس ارشاد کے بیان میں کہ: ”اے ایمان والو! اللہ سے ڈرو جیسا کہ اس سے ڈرنے کا حق ہے، اور تمہیں ہرگز موت نہ آئے مگر اس حال میں کہ تم مسلمان ہو۔“

اللہ تعالیٰ کے اس ارشادِ گرامی کے بیان میں کہ: ”اور تم میں سے ایک ایسی جماعت ہونی چاہیے جو خیر کی طرف دعوت دے، نیکی کا حکم کرے اور برائی سے روکے، اور یہی وہ لوگ ہیں جو حقیقی فلاح و کامیابی پانے والے ہیں۔“

اللہ تعالیٰ کا فرمان: ”تم وہ بہترین امت ہو جو لوگوں (کی ہدایت و نفع رسانی) کے لیے ظاہر کی گئی ہے، تم نیکی کا حکم دیتے ہو اور برائی سے روکتے ہو اور اللہ پر (کامل) ایمان رکھتے ہو، اور اگر اہل کتاب بھی (اسی طرح) ایمان لے آتے تو یہ ان کے لیے بہت بہتر ہوتا، ان میں سے کچھ تو صاحبِ ایمان ہیں مگر ان کی اکثریت نافرمانوں پر مشتمل ہے۔“

اللہ تعالیٰ کے اس ارشاد کے متعلق کہ ”یہ سب (اہلِ کتاب) یکساں نہیں ہیں؛ اہل کتاب میں سے ایک گروہ (حق پر) قائم ہے، وہ رات کی گھڑیوں میں اللہ کی آیات کی تلاوت کرتے ہیں اور وہ (نمازوں میں) سجدہ ریز ہوتے ہیں، وہ اللہ اور یومِ آخرت پر ایمان رکھتے ہیں، نیکی کا حکم دیتے ہیں اور برائی سے منع کرتے ہیں اور بھلائی کے کاموں میں ایک دوسرے سے سبقت لے جاتے ہیں، اور یہی لوگ صالحین میں سے ہیں۔“

اللہ سبحانہ و تعالیٰ کا فرمان: ”اے ایمان والو! اپنے (مومنوں) کے سوا کسی کو اپنا بھیدی اور رازدار نہ بناؤ، وہ تمہاری خرابی اور نقصان رسانی میں کوئی کسر اٹھا نہیں رکھتے، وہ تمہاری تکلیف اور مشقت کے تمنائی ہیں، ان کا بغض تو ان کی زبانوں سے ظاہر ہو چکا ہے اور جو (کینہ) ان کے سینوں میں چھپا ہے وہ اس سے بھی کہیں زیادہ ہے، ہم نے تمہارے لیے نشانیاں واضح کر دی ہیں اگر تم عقل و دانش سے کام لو۔ دیکھو! یہ تم ہی ہو جو ان سے محبت کرتے ہو حالانکہ وہ تم سے محبت نہیں رکھتے اور تم تمام (آسمانی) کتابوں پر ایمان رکھتے ہو، اور جب وہ تم سے ملتے ہیں تو کہتے ہیں کہ ”ہم ایمان لے آئے“ اور جب وہ تنہائی میں ہوتے ہیں تو تم پر غصے کے مارے اپنی پوریں کاٹتے ہیں، آپ فرما دیجیے کہ تم اپنے اسی غصے میں مر جاؤ، بے شک اللہ سینوں کے بھیدوں کو خوب جاننے والا ہے۔“