نافع، صفیہ بنت ابی عبید رضی اللہ عنہا سے نقل فرماتے ہیں کہ سیدنا عمر رضی اللہ عنہ کے دور میں زمین پر زلزلہ آیا، یہاں تک کہ چارپائیوں نے بھی حرکت کی اور سیدنا ابن عمر رضی اللہ عنہما نماز پڑھ رہے تھے، انہیں معلوم نہ ہوا۔ کوئی دوسرا اس وقت نماز نہیں پڑھ رہا تھا تو ان کو بھی معلوم ہو گیا، پھر سیدنا عمر بن خطاب رضی اللہ عنہ نے لوگوں کو خطبہ ارشاد فرمایا کہ تم نے نیا کام کیا، تم نے جلدی کی۔ صفیہ رضی اللہ عنہا فرماتی ہیں کہ انہوں نے فرمایا: اگر وہ جاری رہتی تو میں ضرور تمہارے درمیان سے نکل جاتا۔ [السنن الكبرى للبيهقي/كتاب صلاة الخسوف/حدیث: 6377]

عبید اللہ بن نضر اپنے والد سے نقل فرماتے ہیں کہ سیدنا انس رضی اللہ عنہ کے عہد میں سخت اندھیرا ہو گیا تو میں نے سیدنا انس رضی اللہ عنہ کے پاس آ کر کہا: اے ابوحمزہ رضی اللہ عنہ! کیا نبی صلی اللہ علیہ وسلم کے دور میں بھی آپ کو اس طرح کا اندھیرا پہنچتا تھا؟ انہوں نے کہا: «مَعَاذَ اللَّهِ» ”اللہ کی پناہ!“ اگر سخت ہوا چلتی تو قیامت کے ڈر کی وجہ سے ہم مسجد کی طرف جلدی کیا کرتے تھے۔ [السنن الكبرى للبيهقي/كتاب صلاة الخسوف/حدیث: 6378]

(الف) عکرمہ رحمہ اللہ فرماتے ہیں کہ ابن عباس رضی اللہ عنہما سے کہا گیا کہ نبی صلی اللہ علیہ وسلم کی فلاں بیوی فوت ہو گئی ہے، وہ سجدے میں گر پڑے۔ کہا گیا کہ کیا آپ اس وقت سجدہ کرتے ہیں؟ تو فرمانے لگے کہ نبی صلی اللہ علیہ وسلم نے فرمایا: ”جب تم کوئی نشانی دیکھو تو سجدہ کرو“ تو کون سی نشانی نبی صلی اللہ علیہ وسلم کی بیویوں کے جانے سے بڑی ہو سکتی ہے؟
(ب) قاضی کی روایت میں ہے کہ ہم نے مدینہ میں ایک آواز سنی تو ابن عباس رضی اللہ عنہما مجھ سے کہنے لگے: اے عکرمہ! دیکھو یہ آواز کیسی ہے؟ فرماتے ہیں کہ میں گیا اور پایا کہ نبی صلی اللہ علیہ وسلم کی بیوی حضرت صفیہ بنت حیی رضی اللہ عنہا فوت ہو چکی ہیں۔
فرماتے ہیں کہ میں ابن عباس رضی اللہ عنہما کے پاس آیا تو ان کو سجدہ کی حالت میں پایا حالانکہ ابھی سورج طلوع نہیں ہوا تھا۔
میں نے کہا کہ سبحان اللہ! ابھی سورج طلوع نہیں ہوا، آپ نے تو سجدہ بھی کر دیا تو فرمانے لگے: کیا نبی صلی اللہ علیہ وسلم نے نہیں فرمایا تھا کہ ”جب تم کوئی نشانی دیکھو تو سجدہ کرو“؟ تو اس سے بڑی نشانی کیا ہو سکتی ہے کہ امہات المؤمنین ہمارے درمیان سے جا رہی ہیں اور ہم زندہ ہیں؟ [السنن الكبرى للبيهقي/كتاب صلاة الخسوف/حدیث: 6379]

علقمہ رحمہ اللہ فرماتے ہیں کہ عبداللہ بن مسعود رضی اللہ عنہ نے فرمایا: ”جب تم آسمان سے کوئی آواز سنو تو نماز کے ذریعے مدد مانگا کرو۔“ [السنن الكبرى للبيهقي/كتاب صلاة الخسوف/حدیث: 6380]

قزعہ سیدنا علی رضی اللہ عنہ سے نقل فرماتے ہیں کہ انہوں نے زلزلہ کے وقت چھ رکوع اور چار سجدوں والی نماز پڑھائی، پانچ رکوع اور دو سجدے ایک رکعت میں اور ایک رکوع اور دو سجدے ایک رکعت میں۔ امام شافعی رحمہ اللہ فرماتے ہیں کہ ”اگر یہ حدیث ہمارے نزدیک سیدنا علی رضی اللہ عنہ سے ثابت ہو جائے تو ہم بھی یہی کہیں گے۔“
یہ ابن عباس رضی اللہ عنہما سے ثابت ہے۔ [السنن الكبرى للبيهقي/كتاب صلاة الخسوف/حدیث: 6381]

عبداللہ بن حارث سیدنا عبداللہ بن عباس رضی اللہ عنہما سے نقل فرماتے ہیں کہ انہوں نے بصرہ میں زلزلہ کے وقت نماز پڑھائی۔ لمبا قیام کیا، پھر رکوع کیا، پھر رکوع سے سر اٹھا کر لمبا قیام کیا، پھر لمبا رکوع کیا، پھر رکوع سے سر اٹھا کر لمبا قیام کیا، پھر رکوع کیا، اس کے بعد سجدہ کیا۔ پھر دوسری رکعت کے لیے اٹھے اور اسی طرح کیا۔ ان کی نماز میں چھ رکوع اور چار سجدے ہوئے۔
قتادہ رحمہ اللہ اس حدیث کے بارے میں فرماتے ہیں کہ اسی طرح نشانیوں میں نماز ہوا کرتی تھی۔ سیدنا عبداللہ بن عباس رضی اللہ عنہما بھی فرماتے ہیں کہ نشانیوں کی نماز اسی طرح ہوا کرتی تھی۔ [السنن الكبرى للبيهقي/كتاب صلاة الخسوف/حدیث: 6382]