اللہ جل ثناؤہ کا فرمان ہے: ﴿وَأَشْهِدُوا ذَوَيْ عَدْلٍ مِنْكُمْ﴾ ”اور اپنے میں سے دو عادل آدمیوں کو گواہ بنا لو۔“ [سورة الطلاق: 2]
اور فرمایا: ﴿وَاسْتَشْهِدُوا شَهِيدَيْنِ مِنْ رِجَالِكُمْ﴾ ”اور اپنے مردوں میں سے دو گواہ بنا لو۔“ [سورة البقرة: 282]
اور فرمایا: ﴿مِمَّنْ تَرْضَوْنَ مِنَ الشُّهَدَاءِ﴾ ”ان گواہوں میں سے جنہیں تم پسند کرتے ہو۔“ [سورة البقرة: 282]
امام شافعی رحمہ اللہ نے فرمایا: ”تو ان دونوں آیتوں میں، واللہ اعلم، اس بات کی دلیل ہے کہ اللہ تعالیٰ نے ان سے صرف مسلمان مراد لیے ہیں نہ کہ ان کے علاوہ دوسرے لوگ، اس وجہ سے کہ ہمارے مرد اور جنہیں ہم پسند کرتے ہیں وہ ہمارے اہل دین ہی ہیں، نہ کہ مشرکین، کیونکہ اللہ تعالیٰ نے دین کی بنیاد پر ہمارے اور ان کے درمیان دوستی کا رشتہ منقطع کر دیا ہے۔“
امام شافعی رحمہ اللہ نے فرمایا: ”اور یہ کیسے جائز ہو سکتا ہے کہ ایک مسلمان کی گواہی تو اس بنا پر رد کر دی جائے کہ ہم جانتے ہیں کہ وہ کسی انسان پر جھوٹ بولتا ہے، اور ایک ذمی کی گواہی کو ہم جائز قرار دے دیں حالانکہ وہ اللہ تبارک و تعالیٰ پر جھوٹ باندھتا ہے؟“
امام شافعی رحمہ اللہ نے فرمایا: ”اور اللہ تعالیٰ نے ہمیں خبر دی ہے کہ انہوں نے اللہ کی کتاب کو بدل ڈالا، اور اپنے ہاتھوں سے کتاب لکھی اور کہا: ﴿هَذَا مِنْ عِنْدِ اللهِ لِيَشْتَرُوا بِهِ ثَمَنًا قَلِيلًا﴾ ”یہ اللہ کی طرف سے ہے، تاکہ اس کے ذریعے تھوڑی سی قیمت حاصل کریں۔“ [سورة البقرة: 79] “ [السنن الكبرى للبيهقي/كتاب الشهادات/حدیث: Q20613]

عبیداللہ بن عبداللہ حضرت ابن عباس رضی اللہ عنہما سے نقل فرماتے ہیں کہ اے مسلمانو کا گروہ! تم اہل کتاب سے کیوں کر سوال کرتے ہو، حالانکہ اللہ کی نازل کردہ کتاب تمہارے پاس موجود ہے، جو اللہ کے بارے میں سب سے تازہ خبر ہے، جو خالص تم پڑھتے ہو اس کے اندر ملاوٹ نہیں، حالانکہ اللہ نے بیان کیا کہ اہل کتاب نے اللہ کی نازل کردہ کتاب میں رد و بدل کر دیا اور بذات خود کتاب تحریر کر لی اور انہوں نے کہہ دیا: ﴿هَذَا مِنْ عِنْدِ اللَّهِ لِيَشْتَرُوا بِهِ ثَمَنًا قَلِيلًا﴾ [سورة البقرة: 79] ”یہ اللہ کی طرف سے ہے، تاکہ تھوڑی قیمت وصول کریں۔“ کیا جو علم تمہارے پاس آیا ہے وہ تمہیں ان سے سوال کرنے سے منع نہیں کرتا؟ اللہ کی قسم! کبھی ہم نے نہیں دیکھا کہ وہ تم سے سوال کریں جو تمہارے اوپر نازل کیا گیا۔ [السنن الكبرى للبيهقي/كتاب الشهادات/حدیث: 20613]

ابن شہاب رحمہ اللہ نے اسی طرح ذکر کیا ہے۔ [السنن الكبرى للبيهقي/كتاب الشهادات/حدیث: 20614]

حضرت ابوہریرہ رضی اللہ عنہ فرماتے ہیں کہ اہل کتاب تورات کو عبرانی زبان میں تلاوت کرتے اور عربی زبان میں مسلمانوں کے لیے اس کی تفسیر کرتے تھے۔ رسول اللہ صلی اللہ علیہ وسلم نے فرمایا: ”ان کی تصدیق و تکذیب نہ کرو، بلکہ یہ کہو: ﴿قُولُوا آمَنَّا بِاللَّهِ وَمَا أُنْزِلَ إِلَيْنَا﴾ [سورة البقرة: 136] الآیۃ، ”تم کہو ہم اللہ پر اور جو ہماری طرف نازل کیا گیا ہے اس پر ایمان لائے۔“” [السنن الكبرى للبيهقي/كتاب الشهادات/حدیث: 20615]

سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے فرمایا: ”دو مختلف دینوں والے ایک دوسرے کے وارث نہ ہوں گے اور نہ ہی ایک دین والا دوسرے کے خلاف گواہی دے سکتا ہے۔ صرف امت محمدیہ کو یہ حق حاصل ہے کہ ان کی گواہی دوسروں کے خلاف بھی جائز ہے۔“ [السنن الكبرى للبيهقي/كتاب الشهادات/حدیث: 20616]

سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے فرمایا: ”مخالف دین والے ایک دوسرے کے وارث نہیں ہو سکتے اور نہ گواہ بن سکتے ہیں۔ لیکن مسلمان دوسرے ہر مذہب والے کی گواہی دے سکتے ہیں۔ ان کی گواہی تمام ادیان والوں پر جائز ہے۔“ [السنن الكبرى للبيهقي/كتاب الشهادات/حدیث: 20617]

سیدنا ابوہریرہ رضی اللہ عنہ فرماتے ہیں کہ میرا گمان ہے کہ رسول اللہ صلی اللہ علیہ وسلم نے فرمایا: ”مخالف دین والے ایک دوسرے کے نہ وارث ہوں گے اور نہ ہی ایک دوسرے پر گواہی دے سکتے ہیں، سوائے میری امت کے ان کی گواہی تمام مذہب والوں پر ہو سکتی ہے۔“
یہ عمر بن راشد قوی نہیں ہے، امام احمد بن حنبل، یحییٰ بن معین اور دیگر ائمہ نقل نے اسے ضعیف قرار دیا ہے۔ [السنن الكبرى للبيهقي/كتاب الشهادات/حدیث: 20618]

ابن ابی نجیح رحمہ اللہ، حضرت مجاہد رحمہ اللہ سے نقل فرماتے ہیں کہ دو عادل آزاد مسلمان ہوں، یعنی اللہ کا ارشاد ہے: ﴿مِمَّنْ تَرْضَوْنَ مِنَ الشُّهَدَاءِ﴾ [سورة البقرة: 282] ۔ [السنن الكبرى للبيهقي/كتاب الشهادات/حدیث: 20619]

باب: اللہ عزوجل کے اس فرمان کے بارے میں جو کچھ وارد ہوا ہے: ﴿يَا أَيُّهَا الَّذِينَ آمَنُوا شَهَادَةُ بَيْنِكُمْ إِذَا حَضَرَ أَحَدَكُمُ الْمَوْتُ حِينَ الْوَصِيَّةِ اثْنَانِ ذَوَا عَدْلٍ مِنْكُمْ أَوْ آخَرَانِ مِنْ غَيْرِكُمْ﴾ ”اے ایمان والو! جب تم میں سے کسی کو موت آ پہنچے تو وصیت کے وقت تمہارے آپس کی گواہی (کا طریقہ یہ ہے کہ) تم میں سے دو عادل آدمی ہوں، یا تمہارے غیروں میں سے دو اور ہوں۔“ [سورة المائدة: 106] [السنن الكبرى للبيهقي/كتاب الشهادات/حدیث: Q20620]

امام شافعی رحمہ اللہ فرماتے ہیں اس آیت کے بارے میں، اللہ ہی جانتا ہے اس معنی سے کیا مراد ہے، لیکن میں نے اس سے سنا جو اس آیت کی تفسیر بیان کرتا ہے کہ (اس سے مراد) مسلمانوں میں سے تمہارے قبیلے کے علاوہ (لوگ) ہیں اور اللہ کے اس فرمان سے دلیل لی ہے: ﴿تَحْبِسُونَهُمَا مِنْ بَعْدِ الصَّلَاةِ فَيُقْسِمَانِ بِاللَّهِ إِنِ ارْتَبْتُمْ لَا نَشْتَرِي بِهِ ثَمَنًا﴾ [سورة المائدة: 106] ”تم نماز کے بعد ان کو روکو، وہ اللہ کی قسمیں اٹھائیں، اگر تمہیں شک ہو کہ ہم اس کو قیمت کے عوض فروخت نہیں کرتے“ اور نماز کا وقت مسلمانوں کے لیے مقرر ہے، اور اس فرمان سے: ﴿وَلَوْ كَانَ ذَا قُرْبَى﴾ [سورة المائدة: 106] ”اگر وہ قریبی رشتہ دار ہی کیوں نہ ہو۔“ اور قرابت تو صرف ان عرب مسلمانوں کے درمیان تھی جو نبی صلی اللہ علیہ وسلم کے ساتھ تھے، یا ان کے اور بتوں کے پجاریوں کے درمیان، نہ کہ ان کے اور ذمی لوگوں کے درمیان۔ اللہ کا فرمان ہے: ﴿وَلَا نَكْتُمُ شَهَادَةَ اللَّهِ إِنَّا إِذًا لَمِنَ الْآثِمِينَ﴾ [سورة المائدة: 106] ”اور ہم اللہ کی گواہی کو نہ چھپائیں، تب تو ہم گناہ گار ہو جائیں گے۔“ مسلمانوں کی گواہی چھپانے کو صرف مسلمان ہی گناہ سمجھتے ہیں، نہ کہ ذمی لوگ۔ [السنن الكبرى للبيهقي/كتاب الشهادات/حدیث: 20620]