(نبی کریم صلی اللہ علیہ وسلم نے فرمایا:)
”بلاشبہ اللہ اور اس کے رسول نے تمہارے (اہلِ بیت کے) لیے اس بات کو ناپسند کیا ہے کہ وہ تمہارے لیے لوگوں کے ہاتھوں کا میل کچیل (یعنی زکوٰۃ و صدقات) مقرر کریں۔“ [صحيح الجامع الصغير وزيادته/[حرف الألف] -- إن الله/حدیث: 1697]

(نبی کریم صلی اللہ علیہ وسلم نے فرمایا:)
”بلاشبہ اللہ تعالیٰ نے مومن کو (ناحق) قتل کرنے والے کے حق میں میری سفارش کو تین بار رد فرما دیا ہے۔“ [صحيح الجامع الصغير وزيادته/[حرف الألف] -- إن الله/حدیث: 1698]

(نبی کریم صلی اللہ علیہ وسلم نے فرمایا:)
”بلاشبہ اللہ تعالیٰ نے ہر بدعتی شخص کے لیے توبہ کا دروازہ بند کر رکھا ہے (جب تک کہ وہ اپنی بدعت کو چھوڑ نہ دے)۔“ [صحيح الجامع الصغير وزيادته/[حرف الألف] -- إن الله/حدیث: 1699]

(نبی کریم صلی اللہ علیہ وسلم نے فرمایا:)
”بلاشبہ اللہ تعالیٰ نے نماز کے حوالے سے یہ نیا حکم جاری فرمایا ہے کہ تم اس میں سوائے اللہ کے ذکر اور جو کچھ تمہارے لیے مناسب ہے، کوئی اور بات چیت نہ کرو اور اللہ کے سامنے باادب اور فرمانبردار بن کر کھڑے ہو۔“ [صحيح الجامع الصغير وزيادته/[حرف الألف] -- إن الله/حدیث: 1700]

(نبی کریم صلی اللہ علیہ وسلم نے فرمایا:)
”بلاشبہ اللہ تعالیٰ نے عرفہ کے دن مقام نعمان (عرفات کی ایک وادی) میں آدم (علیہ السلام) کی پیٹھ سے عہد و پیمان لیا، اور ان کی پشت سے ان کی تمام وہ ذریت نکال لی جسے وہ پیدا کرنے والا تھا، پھر انہیں ان کے سامنے چیونٹیوں کی طرح پھیلا دیا۔ پھر ان سے روبرو کلام کرتے ہوئے فرمایا: ﴿أَلَسْتُ بِرَبِّكُمْ قَالُوا بَلَى﴾ ”کیا میں تمہارا رب نہیں ہوں؟ سب نے جواب دیا: کیوں نہیں! (تو ہی ہمارا رب ہے)۔“ [سورة الأعراف: 172] “ [صحيح الجامع الصغير وزيادته/[حرف الألف] -- إن الله/حدیث: 1701]

(نبی کریم صلی اللہ علیہ وسلم نے فرمایا:)
”بلاشبہ اللہ تعالیٰ نے آدم (علیہ السلام) کی پیٹھ سے ان کی اولاد کو نکالا، پھر ﴿أَشْهَدَهُمْ عَلَى أَنْفُسِهِمْ أَلَسْتُ بِرَبِّكُمْ قَالُوا بَلَى﴾ ”انہیں خود ان کے اوپر گواہ بناتے ہوئے پوچھا: کیا میں تمہارا رب نہیں ہوں؟ انہوں نے جواب دیا: کیوں نہیں!“ [سورة الأعراف: 172] پھر انہیں اپنی دونوں مٹھیوں میں لے کر فرمایا: یہ لوگ جنت میں جائیں گے اور یہ لوگ جہنم میں جائیں گے۔ پس جنتیوں کے لیے جنتیوں والے اعمال آسان کر دیے جاتے ہیں اور جہنمیوں کے لیے جہنمیوں والے اعمال آسان کر دیے جاتے ہیں۔“ [صحيح الجامع الصغير وزيادته/[حرف الألف] -- إن الله/حدیث: 1702]

(نبی کریم صلی اللہ علیہ وسلم نے فرمایا:)
”بلاشبہ اللہ تعالیٰ نے مجھے (جائز) نکاح کے ذریعے پیدا فرمایا ہے اور مجھے زنا (بدکاری کے راستے) سے پیدا نہیں فرمایا۔ (یعنی میرا سلسلہ نسب پاکیزہ اور شرعی نکاح پر مبنی ہے)۔“ [صحيح الجامع الصغير وزيادته/[حرف الألف] -- إن الله/حدیث: 1703]

(نبی کریم صلی اللہ علیہ وسلم نے فرمایا:)
”بلاشبہ اللہ تعالیٰ جب کسی گھر والوں سے محبت کرتا ہے تو ان کے اندر نرمی اور ملائمت پیدا فرما دیتا ہے۔“ [صحيح الجامع الصغير وزيادته/[حرف الألف] -- إن الله/حدیث: 1704]

(نبی کریم صلی اللہ علیہ وسلم نے فرمایا:)
”بلاشبہ اللہ تعالیٰ جب کسی بندے سے محبت کرتا ہے تو جبریل (علیہ السلام) کو بلا کر فرماتا ہے: میں فلاں شخص سے محبت کرتا ہوں، تم بھی اس سے محبت کرو۔ چنانچہ جبریل بھی اس سے محبت کرنے لگتے ہیں۔ پھر وہ آسمان والوں میں ندا دیتے ہیں کہ: بلاشبہ اللہ تعالیٰ فلاں شخص سے محبت کرتا ہے، لہٰذا تم بھی اس سے محبت کرو۔ پس آسمان والے بھی اس سے محبت کرنے لگتے ہیں، پھر زمین والوں کے دلوں میں بھی اس کے لیے مقبولیت رکھ دی جاتی ہے۔ اور جب اللہ کسی بندے سے نفرت (بغض) کرتا ہے تو جبریل (علیہ السلام) کو بلا کر فرماتا ہے: میں فلاں شخص سے بغض رکھتا ہوں، تم بھی اس سے بغض رکھو۔ چنانچہ جبریل بھی اس سے بغض رکھنے لگتے ہیں۔ پھر وہ آسمان والوں میں ندا دیتے ہیں کہ: بلاشبہ اللہ تعالیٰ فلاں سے بغض رکھتا ہے، لہٰذا تم بھی اس سے بغض رکھو۔ پس وہ سب بھی اس سے بغض رکھنے لگتے ہیں، پھر زمین والوں کے دلوں میں بھی اس کے لیے نفرت و بغض رکھ دیا جاتا ہے۔“ [صحيح الجامع الصغير وزيادته/[حرف الألف] -- إن الله/حدیث: 1705]

(نبی کریم صلی اللہ علیہ وسلم نے فرمایا:)
”بلاشبہ اللہ تعالیٰ جب کسی قوم سے محبت کرتا ہے تو انہیں آزمائش میں مبتلا کر دیتا ہے، پس جس نے (ان آزمائشوں پر) صبر کیا اس کے لیے صبر کا (بہترین اجر) ہے، اور جس نے بے صبری دکھائی اس کے لیے بے صبری کا (وبال) ہے۔“ [صحيح الجامع الصغير وزيادته/[حرف الألف] -- إن الله/حدیث: 1706]