(نبی کریم صلی اللہ علیہ وسلم نے فرمایا:)
”تمہاری یہ آگ جسے بنی آدم جلاتے ہیں، جہنم کی آگ کے ستر حصوں میں سے ایک حصہ ہے۔ عرض کیا گیا: یا رسول اللہ! کیا یہ کافی نہ تھی؟ آپ صلی اللہ علیہ وسلم نے فرمایا: اسے اس پر انہتر (69) حصوں سے فضیلت دی گئی ہے، ان میں سے ہر حصہ اسی (دنیاوی آگ) کی طرح گرم ہے۔“ [صحيح الجامع الصغير وزيادته/حرف النون./حدیث: 6742]

(نبی کریم صلی اللہ علیہ وسلم نے فرمایا:)
”تمہاری یہ آگ جہنم کی آگ کے ستر حصوں میں سے ایک حصہ ہے، اس کے ہر حصے کی گرمی اسی (دنیاوی آگ) کے برابر ہے۔“ [صحيح الجامع الصغير وزيادته/حرف النون./حدیث: 6743]

(نبی کریم صلی اللہ علیہ وسلم نے فرمایا:)
”میری امت میں سے کچھ لوگ میرے سامنے پیش کیے گئے جو اللہ کی راہ میں جہاد کرنے والے تھے، وہ اس سمندر کی موجوں پر اس طرح سوار تھے جیسے بادشاہ تختوں پر بیٹھے ہوں۔“ [صحيح الجامع الصغير وزيادته/حرف النون./حدیث: 6744]

(نبی کریم صلی اللہ علیہ وسلم نے فرمایا:)
”ہم اسی سے ابتدا کریں گے جس سے اللہ نے ابتدا کی۔“ [صحيح الجامع الصغير وزيادته/حرف النون./حدیث: 6745]

(نبی کریم صلی اللہ علیہ وسلم نے فرمایا:)
”اس امت کے پہلے لوگ یقین اور زہد کی وجہ سے نجات پا گئے، اور اس کے آخری لوگ بخل اور لمبی امیدوں کی وجہ سے ہلاک ہوں گے۔“ [صحيح الجامع الصغير وزيادته/حرف النون./حدیث: 6746]

(نبی کریم صلی اللہ علیہ وسلم نے فرمایا:)
”مسلمانوں کے راستے سے تکلیف دہ چیز کو ہٹا دو۔“ [صحيح الجامع الصغير وزيادته/حرف النون./حدیث: 6747]

(نبی کریم صلی اللہ علیہ وسلم نے فرمایا:)
”میں نے یہاں قربانی کی ہے اور منیٰ کا سارا علاقہ ہی قربانی کی جگہ ہے، پس تم اپنے پڑاؤ ہی میں قربانی کر لو، اور میں نے یہاں وقوف کیا اور عرفہ کا سارا میدان ہی وقوف کی جگہ ہے، اور میں نے یہاں بھی وقوف کیا اور مزدلفہ (جمع) کا سارا علاقہ ہی وقوف کی جگہ ہے۔“ [صحيح الجامع الصغير وزيادته/حرف النون./حدیث: 6748]

(نبی کریم صلی اللہ علیہ وسلم نے فرمایا:)
”ہم امتوں میں سب سے آخر میں ہیں اور سب سے پہلے حساب دیں گے، کہا جائے گا: امیّ امت اور اس کا نبی کہاں ہے؟ پس ہم (زمانے کے اعتبار سے) آخر میں ہیں مگر (درجے کے اعتبار سے) سب سے پہلے ہیں۔“ [صحيح الجامع الصغير وزيادته/حرف النون./حدیث: 6749]

(نبی کریم صلی اللہ علیہ وسلم نے فرمایا:)
”ہم شک کرنے میں ابراہیم علیہ السلام سے زیادہ حقدار ہیں، جب انہوں نے کہا: اے میرے رب! مجھے دکھا کہ تو مردوں کو کیسے زندہ کرتا ہے؟ اللہ نے فرمایا: کیا تجھے یقین نہیں؟ انہوں نے عرض کیا: کیوں نہیں! لیکن تاکہ میرا دل مطمئن ہو جائے۔ اور اللہ لوط علیہ السلام پر رحم فرمائے، وہ تو ایک زبردست سہارے کی پناہ میں تھے، اور اگر میں اتنی مدت قید میں رہتا جتنی یوسف علیہ السلام رہے تو میں بلانے والے کی بات فوراً مان لیتا۔“ [صحيح الجامع الصغير وزيادته/حرف النون./حدیث: 6750]

(نبی کریم صلی اللہ علیہ وسلم نے فرمایا:)
”ہم موسیٰ علیہ السلام کے بارے میں تم سے زیادہ حقدار اور زیادہ قریب ہیں۔“ [صحيح الجامع الصغير وزيادته/حرف النون./حدیث: 6751]