سیدنا حکیم بن حزام رضی اللہ عنہ سے روایت ہے کہ رسول اللہ صلی اللہ علیہ وسلم نے مجھے اس چیز کے بیچنے سے منع فرمایا جو میرے پاس موجود نہ ہو۔
امام طبرانی رحمہ اللہ فرماتے ہیں: ”اس حدیث کو ہارون اہوازی اور سعید بن عبدالرحمن سے صرف عباد نے روایت کیا ہے۔“ [المعجم الأوسط/باب الميم/حدیث: 8419]

ام المومنین سیدہ عائشہ رضی اللہ عنہا سے روایت ہے کہ نبی کریم صلی اللہ علیہ وسلم نے فرمایا: ”روزہ دار کی بہترین عادتوں میں سے مسواک ہے۔“
امام طبرانی رحمہ اللہ فرماتے ہیں: ”اس حدیث کو شعبی سے صرف مجالد اور سری بن اسماعیل نے روایت کیا ہے، مجالد سے روایت کرنے میں ابو اسماعیل مؤدب منفرد ہیں، اور سری سے روایت کرنے میں عباد منفرد ہیں۔“ [المعجم الأوسط/باب الميم/حدیث: 8420]

سیدنا ابو ہریرہ رضی اللہ عنہ سے روایت ہے کہ جب کوئی نوجوان رسول اللہ صلی اللہ علیہ وسلم سے (روزے میں) بوسہ لینے کے بارے میں پوچھتا تو آپ صلی اللہ علیہ وسلم اسے منع فرما دیتے، اور جب کوئی بوڑھا آدمی پوچھتا تو اسے رخصت دے دیتے، اور فرمایا: ”بے شک نوجوان بوڑھے کی طرح نہیں ہوتا۔“
امام طبرانی رحمہ اللہ فرماتے ہیں: ”اس حدیث کو عطاء سے صرف سعید مقبری نے روایت کیا ہے، اور مقبری سے صرف عثمان بری نے، اور اس میں عباد منفرد ہیں۔“ [المعجم الأوسط/باب الميم/حدیث: 8421]

سیدنا انس بن مالک رضی اللہ عنہ سے روایت ہے کہ جب رسول اللہ صلی اللہ علیہ وسلم کی وفات ہوئی تو سیدہ فاطمہ رضی اللہ عنہا نے کہا: ”ہائے ابا جان! آپ اپنے رب سے کتنے قریب ہو گئے! ہائے ابا جان! جنت الفردوس آپ کا ٹھکانا ہے! ہائے ابا جان! میں (آپ کی وفات کی یہ خبر) جبریل تک پہنچاتی ہوں!“
امام طبرانی رحمہ اللہ فرماتے ہیں: ”اس حدیث کو ابن جریج سے ابو قرہ کے سوا کسی نے روایت نہیں کیا۔“ [المعجم الأوسط/باب الميم/حدیث: 8422]

سیدنا ابوہریرہ رضی اللہ عنہ نے فرمایا: ”قسامت جاہلیت کے دستوروں میں سے تھی، پھر رسول اللہ صلی اللہ علیہ وسلم نے اسے برقرار رکھا تاکہ لوگ خونریزی سے زیادہ باز رہیں۔“ [المعجم الأوسط/باب الميم/حدیث: 8423]

سیدنا عبدالرحمن بن سمرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”میں تمہیں دو باتوں کی وصیت کرتا ہوں: کبھی کوئی منصب یا ذمہ داری طلب نہ کرنا، کیونکہ اگر تمہیں مانگنے کے بعد ملی تو تمہیں اسی کے حوالے کر دیا جائے گا، اور اگر بغیر مانگے مل گئی تو اس پر تمہاری مدد کی جائے گی۔ اور جب تم کسی بات پر قسم کھا لو، پھر اس کے سوا دوسری چیز کو اس سے بہتر سمجھو تو وہی کرو جو بہتر ہو اور اپنی قسم کا کفارہ ادا کر دو۔“
امام طبرانی رحمہ اللہ فرماتے ہیں: ”اس حدیث کو ابن جریج سے ابو قرہ کے سوا کسی نے روایت نہیں کیا۔“ [المعجم الأوسط/باب الميم/حدیث: 8424]

سیدنا عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”قسم (اٹھانے کا انجام) یا تو حانث ہونا ہے یا پھر ندامت۔“ [المعجم الأوسط/باب الميم/حدیث: 8425]

سیدنا عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”جس نے چالیس دن تک غلہ جمع کر کے (مہنگا ہونے کے انتظار میں) روکے رکھا، وہ اللہ سے بری ہو گیا اور اللہ اس سے بری ہو گیا۔ اور جس بستی والوں کے ہاں کوئی شخص بھوکا رہ جائے، تو ان سے اللہ کی ذمہ داری اٹھ گئی۔“
امام طبرانی رحمہ اللہ فرماتے ہیں: ”یہ حدیث سیدنا ابن عمر رضی اللہ عنہما سے صرف اسی سند سے مروی ہے، اس میں ابو الزاہریہ منفرد ہیں۔“ [المعجم الأوسط/باب الميم/حدیث: 8426]

ربیعہ جرشی رحمہ اللہ بیان کرتے ہیں کہ میں نے ام المومنین سیدہ عائشہ رضی اللہ عنہا سے پوچھا: ”رسول اللہ صلی اللہ علیہ وسلم جب نماز کے لیے کھڑے ہوتے تو کیا پڑھتے تھے؟ اور نماز کا آغاز کس چیز سے فرماتے تھے؟“ تو انہوں نے فرمایا: ”آپ صلی اللہ علیہ وسلم دس مرتبہ اللہ اکبر کہتے، دس مرتبہ الحمد للہ کہتے، دس مرتبہ سبحان اللہ کہتے، دس مرتبہ لا الہ الا اللہ کہتے اور دس مرتبہ استغفار کرتے، اور دس مرتبہ یہ کہتے: «اللَّهُمَّ اغْفِرْ لِي، وَارْحَمْنِي، وَاهْدِنِي، وَارْزُقْنِي» ”اے اللہ! مجھے بخش دے، مجھ پر رحم فرما، مجھے ہدایت دے اور مجھے رزق عطا فرما۔“ اور دس مرتبہ یہ کہتے: «اللَّهُمَّ إِنِّي أَعُوذُ بِكَ مِنَ الضِّيقِ يَوْمَ الْحِسَابِ» ”اے اللہ! میں حساب کے دن کی تنگی سے تیری پناہ چاہتا ہوں۔“
امام طبرانی رحمہ اللہ فرماتے ہیں: ”اس حدیث کو ثور سے صرف اصبغ نے روایت کیا ہے، اس میں یزید بن ہارون منفرد ہیں، اور سیدہ عائشہ رضی اللہ عنہا سے یہ صرف اسی سند سے مروی ہے۔“ [المعجم الأوسط/باب الميم/حدیث: 8427]

شداد بن حکم رحمہ اللہ کہتے ہیں: ”اگر میں نے سیدنا عمرو بن حمق رضی اللہ عنہ سے ایک بات نہ سنی ہوتی تو میں مختار کے دھڑ اور اس کے سر کے درمیان چلتا (یعنی اس کی لاش کی بے حرمتی کرتا)۔“ میں نے سیدنا عمرو بن حمق رضی اللہ عنہ کو فرماتے سنا کہ رسول اللہ صلی اللہ علیہ وسلم نے فرمایا: ”جو شخص کسی آدمی کو اس کی جان کی امان دے، پھر اسے قتل کر دے، تو قیامت کے دن اسے غدر (بدعہدی) کا جھنڈا اٹھانے کا مکلف بنایا جائے گا۔“
امام طبرانی رحمہ اللہ فرماتے ہیں: ”اس حدیث کو رقبہ سے صرف ابراہیم بن یزید نے روایت کیا ہے، اس میں سعید بن یحییٰ بن ازہر منفرد ہیں۔“ [المعجم الأوسط/باب الميم/حدیث: 8428]