اللہ تعالیٰ کے اس فرمان کے متعلق ہے کہ ”اور ابراہیم نے کہا کہ میں اپنے رب کی طرف جانے والا ہوں، وہی میری رہنمائی فرمائے گا۔ اے میرے رب! مجھے صالح اولاد عطا فرما۔ تو ہم نے اسے ایک بردبار لڑکے کی بشارت دی۔ پھر جب وہ لڑکا ان کے ساتھ تگ و دو کی عمر کو پہنچا تو ابراہیم نے کہا کہ اے میرے پیارے بیٹے! میں خواب میں دیکھ رہا ہوں کہ میں تجھے ذبح کر رہا ہوں، اب تو دیکھ کہ تیری کیا رائے ہے؟ اس نے کہا کہ اے میرے ابا جان! آپ وہی کیجیے جس کا آپ کو حکم دیا جا رہا ہے، ان شاء اللہ آپ مجھے صبر کرنے والوں میں پائیں گے۔ پھر جب ان دونوں نے حکمِ الٰہی کے سامنے سرِ تسلیم خم کر دیا اور ابراہیم نے اسے پیشانی کے بل لٹا دیا، تو ہم نے اسے پکارا کہ اے ابراہیم! بلاشبہ تو نے اپنا خواب سچ کر دکھایا، ہم نیکوکاروں کو اسی طرح صلہ دیا کرتے ہیں۔ یقیناً یہ ایک واضح آزمائش تھی۔ اور ہم نے ایک عظیم ذبیحہ کے عوض اس کا فدیہ دیا۔ اور ہم نے بعد میں آنے والوں میں اس کا ذکرِ خیر باقی رکھا۔ سلام ہو ابراہیم پر۔ ہم نیکوکاروں کو ایسا ہی بدلہ دیتے ہیں۔ بے شک وہ ہمارے مومن بندوں میں سے تھا۔ اور ہم نے اسے اسحاق کی بشارت دی جو نبی اور صالحین میں سے تھے۔ اور ہم نے ابراہیم اور اسحاق پر برکتیں نازل کیں، اور ان دونوں کی اولاد میں سے کوئی تو نیکوکار ہے اور کوئی اپنے نفس پر کھلم کھلا ظلم کرنے والا ہے“۔