طارق بن شہاب رحمہ اللہ بیان کرتے ہیں کہ رسول اللہ صلی اللہ علیہ وسلم کی وفات کے بعد بنو اسد اور غطفان کے مرتد لوگ سیدنا ابوبکر رضی اللہ عنہ کے پاس صلح کی درخواست لے کر آئے، تو انہوں نے فرمایا: ”اس شرط پر کہ ہم تم سے اسلحہ اور گھوڑے چھین لیں گے اور تمہیں (اس حال میں) چھوڑ دیا جائے گا کہ تم بیلوں کی دموں کے پیچھے چلتے رہو (یعنی کھیتی باڑی میں لگے رہو)، یہاں تک کہ اللہ عزوجل اپنے نبی صلی اللہ علیہ وسلم کے خلیفہ اور مومنین کو ایسی رائے دکھا دے جس کی بنا پر وہ تمہیں معذور سمجھ لیں؛ اور یہ کہ تم گواہی دو کہ ہمارے مقتول جنت میں ہیں اور تمہارے مقتول دوزخ میں، نیز تم ہمارے مقتولوں کا خوں بہا ادا کرو گے جبکہ ہم تمہارے مقتولوں کا کوئی خوں بہا ادا نہیں کریں گے۔“
اس پر سیدنا عمر رضی اللہ عنہ نے عرض کیا: ”اے خلیفہ رسول صلی اللہ علیہ وسلم ! بات وہی ہے جو آپ نے فرمائی، سوائے اس کے کہ ہمارے مقتول تو اللہ کی راہ میں قتل ہوئے ہیں، ان کی کوئی دیت نہیں ہے۔“
امام طبرانی رحمہ اللہ فرماتے ہیں: ”اس حدیث کو ایوب بن عائذ رحمہ اللہ سے صرف سفیان بن عیینہ رحمہ اللہ نے روایت کیا ہے۔“ [المعجم الأوسط/باب الألف/حدیث: 1953]