حبیب بن ابی ثابت رحمہ اللہ بیان کرتے ہیں کہ سیدنا حسین بن علی رضی اللہ عنہما کی ازواج میں سے ایک خاتون نے ان کی کسی زمین پر کھانا تیار کیا، آپ نے کھانا کھایا، پھر جب کھانا اٹھا لیا گیا تو آپ کا ایک مولیٰ (آزاد کردہ غلام) آیا، آپ نے کھانا طلب فرمایا تو اس نے عرض کی: ”اے ابوعبداللہ! میں اس کی رغبت نہیں رکھتا۔“ آپ نے دریافت فرمایا: ”کیوں؟“ اس نے عرض کی: ”ہم ابھی تھوڑی دیر پہلے عبید اللہ بن عباس رضی اللہ عنہما کے ہاں کھانا کھا چکے ہیں۔“ اس پر سیدنا حسین رضی اللہ عنہ نے فرمایا: ”بے شک ان کے والد قریش کے سردار تھے، اور یقیناً رسول اللہ صلی اللہ علیہ وسلم نے فرمایا تھا: ”اے بنو عبدالمطلب! (لوگوں کو) کھانا کھلایا کرو۔““
امام طبرانی رحمہ اللہ فرماتے ہیں: ”اس حدیث کو حبیب رحمہ اللہ سے صرف عمرو بن ثابت نے روایت کیا ہے، اور ان سے روایت کرنے میں ابوعتاب منفرد ہیں۔“ [المعجم الأوسط/باب الألف/حدیث: 1954]