ابو البختری رحمہ اللہ بیان کرتے ہیں: ہم نے ذی الحجہ کا چاند ایک بڑے چاند کی صورت میں دیکھا، کم کہنے والا کہتا تھا کہ یہ دو راتوں کا ہے اور زیادہ کہنے والا کہتا تھا کہ تین راتوں کا ہے۔ پھر جب ہم مکہ پہنچے تو میری ملاقات سیدنا عبداللہ بن عباس رضی اللہ عنہما سے ہوئی، میں نے ان سے یومِ ترویہ کے بارے میں پوچھا تو انہوں نے اسی دن سے میرے لیے گنتی کی۔ میں نے کہا: ”ہم نے تو چاند کو بڑا دیکھا تھا۔“ تو انہوں نے فرمایا: ”نبی صلی اللہ علیہ وسلم نے اس کی مدت کو اس کے دیکھے جانے تک بڑھایا ہے۔“
امام طبرانی رحمہ اللہ فرماتے ہیں: ”اس حدیث کو ابو خالد دالانی سے عبدالسلام بن حرب کے سوا کسی نے روایت نہیں کیا۔ اور اسے شعبہ نے عمرو بن مرہ سے بھی روایت کیا ہے۔“ [المعجم الأوسط/باب الألف/حدیث: 2228]