ام المومنین سیدہ عائشہ رضی اللہ عنہا سے روایت ہے کہ انہوں نے فرمایا: ”میرے پاس ام مسطح آئیں، پھر وہ اپنی ضرورت کے لیے بیت الخلا کی طرف نکلیں تو ام مسطح کا پاؤں کسی ہڈی یا کانٹے پر پڑ گیا (جس سے وہ لڑکھڑا گئیں)، تو انہوں نے کہا: 'مسطح ہلاک ہو'۔ میں نے کہا: 'تم نے بہت بری بات کہی، تم رسول اللہ صلی اللہ علیہ وسلم کے اصحاب میں سے ایک شخص کو برا بھلا کہہ رہی ہو؟' انہوں نے کہا: 'میں گواہی دیتی ہوں کہ تم ان (شر سے) بے خبر مومنہ عورتوں میں سے ہو، کیا تمہیں معلوم ہے کہ تمہارے خلاف کیا اڑایا جا رہا ہے؟' میں نے کہا: 'اللہ کی قسم! نہیں'۔ انہوں نے پوچھا: 'تمہارا رسول اللہ صلی اللہ علیہ وسلم سے آخری بار سامنا کب ہوا تھا؟' میں نے کہا: 'رسول اللہ صلی اللہ علیہ وسلم اپنی ازواج کے معاملے میں جو چاہتے ہیں کرتے ہیں، جس سے چاہتے ہیں ابتدا کرتے ہیں اور جن کی باری چاہتے ہیں مؤخر کر دیتے ہیں'۔ انہوں نے کہا: 'تمہارے بارے میں تو یہ اور یہ (تہمت) اڑائی جا رہی ہے'۔ (یہ سن کر) میں بیہوش ہو کر گر پڑی۔ یہ خبر میری والدہ سیدہ ام رومان رضی اللہ عنہا کو پہنچی، جب انہیں معلوم ہوا کہ عائشہ کو اس معاملے کا پتہ چل گیا ہے تو وہ میرے پاس آئیں، مجھے اٹھایا اور اپنے گھر لے گئیں۔ رسول اللہ صلی اللہ علیہ وسلم کو بھی خبر ملی کہ عائشہ کو اس بات کا علم ہو گیا ہے، تو آپ صلی اللہ علیہ وسلم تشریف لائے، میرے پاس بیٹھے اور فرمایا: 'اے عائشہ! اللہ نے توبہ کی گنجائش بہت وسیع رکھی ہے'۔ اس سے میری تکلیف میں مزید اضافہ ہو گیا۔ ہم اسی حالت میں تھے کہ سیدنا ابوبکر رضی اللہ عنہ داخل ہوئے اور عرض کیا: 'اے اللہ کے رسول! آپ اس عورت کا کیا انتظار کر رہے ہیں جس نے آپ سے خیانت کی اور مجھے رسوا کر دیا؟' سیدہ عائشہ فرماتی ہیں: 'میری تکلیف پر تکلیف بڑھتی گئی'۔ پھر آپ صلی اللہ علیہ وسلم نے سیدنا علی رضی اللہ عنہ کو بلاوا بھیجا اور پوچھا: 'اے علی! تم عائشہ کے بارے میں کیا رائے رکھتے ہو؟' انہوں نے عرض کیا: 'اللہ اور اس کا رسول بہتر جانتے ہیں'۔ آپ صلی اللہ علیہ وسلم نے فرمایا: 'تم مجھے ضرور بتاؤ کہ تمہاری عائشہ کے بارے میں کیا رائے ہے؟' انہوں نے عرض کیا: 'اللہ نے عورتوں کے معاملے میں (آپ کے لیے) بڑی وسعت رکھی ہے، لیکن آپ ان کی خادمہ سیدہ بریرہ رضی اللہ عنہا کو بلا کر پوچھیں، شاید وہ ان کے معاملے کی کسی حقیقت سے واقف ہو'۔ چنانچہ آپ صلی اللہ علیہ وسلم نے سیدہ بریرہ رضی اللہ عنہا کو بلا بھیجا، وہ آئیں تو آپ صلی اللہ علیہ وسلم نے ان سے فرمایا: 'کیا تم گواہی دیتی ہو کہ میں اللہ کا رسول ہوں؟' انہوں نے عرض کیا: 'جی ہاں'۔ آپ صلی اللہ علیہ وسلم نے فرمایا: 'پھر میں تم سے کچھ پوچھوں گا تو تم مجھ سے کچھ نہ چھپانا'۔ انہوں نے عرض کیا: 'اے اللہ کے رسول! آپ جو کچھ بھی پوچھیں گے میں ضرور بتاؤں گی اور اللہ نے چاہا تو آپ سے کچھ نہ چھپاؤں گی'۔ آپ صلی اللہ علیہ وسلم نے فرمایا: 'تم عائشہ کے پاس رہتی رہی ہو، کیا تم نے ان میں کوئی ایسی چیز دیکھی ہے جو تمہیں ناپسند ہو؟' انہوں نے عرض کیا: 'نہیں، اس ذات کی قسم جس نے آپ کو نبوت کے ساتھ مبعوث فرمایا! جب سے میں ان کے پاس ہوں میں نے ان میں کوئی خامی نہیں دیکھی سوائے ایک عادت کے'۔ آپ صلی اللہ علیہ وسلم نے پوچھا: 'وہ کیا ہے؟' انہوں نے عرض کیا: 'میں نے اپنا آٹا گوندھا اور عائشہ سے کہا کہ اس آٹے کا خیال رکھنا جب تک کہ میں آگ لے آؤں تاکہ روٹی پکا سکوں، لیکن وہ نماز پڑھنے کھڑی ہو گئیں اور آٹے سے غافل ہو گئیں، اتنے میں بکری آئی اور اسے کھا گئی'۔ پھر آپ صلی اللہ علیہ وسلم نے سیدنا اسامہ بن زید رضی اللہ عنہ کو بلا کر پوچھا: 'اے اسامہ! تمہاری عائشہ کے بارے میں کیا رائے ہے؟' انہوں نے عرض کیا: 'اللہ اور اس کا رسول بہتر جانتے ہیں'۔ آپ صلی اللہ علیہ وسلم نے فرمایا: 'تم مجھے ضرور بتاؤ جو تمہاری ان کے بارے میں رائے ہے'۔ انہوں نے عرض کیا: 'میری رائے یہ ہے کہ آپ ان کے معاملے میں خاموش رہیں یہاں تک کہ اللہ تعالیٰ ان کے بارے میں آپ کی طرف وحی نازل فرما دے'۔ سیدہ عائشہ فرماتی ہیں: 'تھوڑی ہی دیر گزری تھی کہ وحی نازل ہونے لگی، جب وحی اتر چکی تو ہم نے رسول اللہ صلی اللہ علیہ وسلم کے چہرہ مبارک پر خوشی کے آثار دیکھے، اور اللہ جل شانہ کی طرف سے ان کی براءت آ گئی، تو رسول اللہ صلی اللہ علیہ وسلم نے فرمایا: 'اے عائشہ! خوش ہو جاؤ، اے عائشہ! تمہیں خوشخبری ہو، اللہ نے تمہاری براءت نازل فرما دی ہے'۔ میں نے کہا: 'یہ نہ آپ کا احسان ہے اور نہ آپ کے ساتھی (ابوبکر) کا'۔ راوی کہتے ہیں: اس وقت سیدہ عائشہ بولیں، ورنہ (اس سے پہلے جب) آپ صلی اللہ علیہ وسلم ان کے پاس آتے تو (دوری کی وجہ سے نام لیے بغیر) صرف یہ پوچھتے تھے: «كَيْفَ تِيكُمْ؟» ”تمہاری یہ (مریضہ) کیسی ہے؟“۔
امام طبرانی رحمہ اللہ فرماتے ہیں: ”اس حدیث کو مقسم سے صرف خصیف نے روایت کیا ہے، اور عتاب بن بشیر اسے روایت کرنے میں منفرد ہیں۔“ [المعجم الأوسط/باب الميم/حدیث: 6389]