سیدنا علی بن ابی طالب رضی اللہ عنہ سے روایت ہے کہ رسول اللہ صلی اللہ علیہ وسلم لوگوں کو نماز پڑھانے کے لیے کھڑے ہوئے تھے کہ اچانک آپ صلی اللہ علیہ وسلم (نماز چھوڑ کر) مڑ گئے، پھر جب آپ صلی اللہ علیہ وسلم واپس تشریف لائے تو آپ صلی اللہ علیہ وسلم کے سرِ مبارک سے پانی کے قطرے ٹپک رہے تھے۔ آپ صلی اللہ علیہ وسلم نے فرمایا: ”میں تمہاری امامت کے لیے کھڑا ہوا تھا، پھر مجھے یاد آیا کہ میں حالتِ جنابت میں تھا اور میں نے غسل نہیں کیا تھا، چنانچہ میں ہٹ گیا اور غسل کیا؛ لہٰذا تم میں سے جسے بھی ویسی ہی صورت پیش آئے جیسی مجھے پیش آئی، یا وہ اپنے پیٹ میں گڑگڑاہٹ محسوس کرے تو اسے چاہیے کہ وہ (نماز سے) ہٹ جائے اور غسل کرے، پھر واپس آ کر اپنی نماز نئے سرے سے ادا کرے۔“
امام طبرانی رحمہ اللہ فرماتے ہیں: «لَا يُرْوَى هَذَا الْحَدِيثُ عَنْ عَلِيٍّ إِلَّا بِهَذَا الْإِسْنَادِ، تَفَرَّدَ بِهِ ابْنُ لَهِيعَةَ» ”سیدنا علی رضی اللہ عنہ سے یہ حدیث صرف اسی سند کے ساتھ مروی ہے اور ابن لہیعہ رحمہ اللہ اسے بیان کرنے میں منفرد ہیں۔“
دار الحرمین کے مطبوعہ نسخے میں راوی کا نام ”درید“ درج ہے، جبکہ صحیح نام ”زریر“ ہے جیسا کہ مسند احمد اور دیگر کتب میں منقول ہے۔ [المعجم الأوسط/باب الميم/حدیث: 6390]