سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”بنی آدم کا ہر انسان قیامت کے دن اللہ تعالیٰ سے اس حال میں ملے گا کہ اس کا کوئی نہ کوئی گناہ ہوگا جو اس نے کیا ہوگا، جس پر اللہ چاہے تو اسے عذاب دے اور چاہے تو اس پر رحم فرمائے، سوائے سیدنا یحییٰ بن زکریا علیہما السلام کے، کیونکہ وہ ﴿سَيِّدًا وَحَصُورًا وَنَبِيًّا مِنَ الصَّالِحِينَ﴾ (سردار، اپنی خواہشات پر قابو رکھنے والے اور صالحین میں سے ایک نبی) تھے۔“ پھر نبی کریم صلی اللہ علیہ وسلم زمین پر پڑے ہوئے ایک تنکے کی طرف جھکے، اسے اٹھایا اور فرمایا: ”ان کا عضوِ مخصوص اس تنکے کی مانند تھا۔“
امام طبرانی رحمہ اللہ فرماتے ہیں: ”اس حدیث کو محمد بن عجلان رحمہ اللہ سے صرف لیث رحمہ اللہ نے روایت کیا ہے، اور لیث رحمہ اللہ سے اسے روایت کرنے میں حجاج بن سلیمان رحمہ اللہ منفرد ہیں، جبکہ حجاج سے اس کی روایت میں محمد بن سلمہ مرادی رحمہ اللہ اکیلے ہیں۔“ [المعجم الأوسط/باب الميم/حدیث: 6556]