مجاہد رحمہ اللہ بیان کرتے ہیں کہ سیدنا عبداللہ بن عمر رضی اللہ عنہما نے مجھے اور میرے ایک ساتھی کو رخصت کیا جب میں مدینہ سے عراق کی طرف روانہ ہو رہا تھا، پھر جب انہوں نے واپس مڑنے کا ارادہ کیا تو فرمایا: ”میرے پاس تمہیں دینے کے لیے کوئی چیز نہیں ہے، لیکن میں نے رسول اللہ صلی اللہ علیہ وسلم کو یہ فرماتے ہوئے سنا ہے: «إِنَّ اللهَ إِذَا اسْتُودِعَ شَيْئًا حَفِظَهُ» ”بے شک جب اللہ کے سپرد کوئی چیز بطور امانت کی جائے تو وہ اس کی حفاظت فرماتا ہے“، اور میں تمہارے دین، تمہاری امانت اور تمہارے اعمال کے خاتمے کو اللہ کے سپرد کرتا ہوں۔“
اس حدیث کو معاویہ بن سلمہ سے صرف محمد بن عیسیٰ بن سمیع نے روایت کیا ہے اور ہشام بن عمار اسے نقل کرنے میں منفرد ہیں۔ [المعجم الأوسط/باب الميم/حدیث: 6725]