حضرت ابن عباس رضی اللہ عنہما سے روایت ہے، وہ نبی کریم صلی اللہ علیہ وسلم سے بیان کرتے ہیں کہ آپ صلی اللہ علیہ وسلم نے فرمایا: ”اگر میں اپنی امت میں سے کسی کو خلیل بناتا تو ضرور ابوبکر رضی اللہ عنہ کو خلیل بناتا لیکن وہ میرے (دینی) بھائی اور میرے صحابی ہیں۔“ [صحيح البخاري/كِتَاب فَضَائِلِ الصحابة/حدیث: 3656]

ایوب سے روایت ہے (انہوں نے عکرمہ سے، انہوں نے حضرت ابن عباس رضی اللہ عنہما سے، انہوں نے رسول اللہ صلی اللہ علیہ وسلم سے بیان کیا) ”اگر میں کسی کو خلیل بناتا تو ضرور حضرت ابوبکر رضی اللہ عنہ کو بناتا، لیکن اخوتِ اسلام افضل ہے۔“ [صحيح البخاري/كِتَاب فَضَائِلِ الصحابة/حدیث: 3657]

حضرت عبداللہ بن ابوملیکہ رضی اللہ عنہ سے روایت ہے، انہوں نے کہا کہ اہل کوفہ نے حضرت عبداللہ بن زبیر رضی اللہ عنہ کو دادا (کی وراثت) کے متعلق خط لکھا تو آپ نے انہیں جواب دیا کہ رسول اللہ صلی اللہ علیہ وسلم نے جس شخص کے بارے میں فرمایا: ”میں اگر اس امت میں سے کسی کو خلیل بناتا تو اس کو بناتا۔“ اس، یعنی ابوبکر رضی اللہ عنہ نے دادا کو باپ کے قائم مقام قرار دیا تھا۔ [صحيح البخاري/كِتَاب فَضَائِلِ الصحابة/حدیث: 3658]

حضرت جبیر بن مطعم رضی اللہ عنہ سے روایت ہے، انہوں نے کہا کہ ایک عورت نبی کریم صلی اللہ علیہ وسلم کی خدمت میں حاضر ہوئی تو آپ صلی اللہ علیہ وسلم نے اس سے فرمایا کہ وہ پھر آئے۔ اس نے عرض کیا: ”اگر میں آؤں اور آپ کو نہ پاؤں“، اس کی مراد آپ کی وفات تھی، تو آپ صلی اللہ علیہ وسلم نے فرمایا: ”اگر تو مجھے نہ پائے تو ابوبکر رضی اللہ عنہ کے پاس چلی جانا۔“ [صحيح البخاري/كِتَاب فَضَائِلِ الصحابة/حدیث: 3659]

حضرت ہمام رحمہ اللہ سے روایت ہے، انہوں نے کہا کہ میں نے حضرت عمار رضی اللہ عنہ سے سنا، وہ فرما رہے تھے: ”میں نے رسول اللہ صلی اللہ علیہ وسلم کو اس وقت دیکھا جبکہ آپ کے ساتھ پانچ غلاموں، دو عورتوں اور حضرت ابوبکر رضی اللہ عنہ کے علاوہ اور کوئی نہ تھا۔“ [صحيح البخاري/كِتَاب فَضَائِلِ الصحابة/حدیث: 3660]

حضرت ابودرداء رضی اللہ عنہ سے روایت ہے، انہوں نے کہا کہ ”میں نبی کریم صلی اللہ علیہ وسلم کے پاس بیٹھا ہوا تھا، اتنے میں حضرت ابوبکر رضی اللہ عنہ اپنی چادر کا ایک کنارہ اٹھائے ہوئے آئے یہاں تک کہ آپ کا گھٹنا ننگا ہو گیا۔ نبی کریم صلی اللہ علیہ وسلم نے فرمایا: ”تمہارے دوست کسی سے لڑ کر آئے ہیں۔“ پھر حضرت ابوبکر رضی اللہ عنہ نے سلام کیا اور کہا: ”اللہ کے رسول صلی اللہ علیہ وسلم ! میرے اور ابن خطاب رضی اللہ عنہ کے درمیان کسی بات پر کچھ جھگڑا ہو گیا تھا۔ میں نے جلدی سے انہیں سخت سست کہہ دیا۔ پھر مجھے ندامت ہوئی۔ میں نے ان سے معذرت کی اور معافی کا سوال کیا لیکن انہوں نے انکار کر دیا۔ اب میں آپ کے پاس حاضر ہوا ہوں۔“ آپ صلی اللہ علیہ وسلم نے فرمایا: «يَغْفِرُ اللَّهُ لَكَ يَا أَبَا بَكْرٍ» ”ابوبکر! اللہ تجھے معاف فرمائے۔“ آپ نے یہ تین مرتبہ کہا۔ پھر ایسا ہوا کہ حضرت عمر رضی اللہ عنہ شرمندہ ہوئے اور حضرت ابوبکر رضی اللہ عنہ کے گھر پر آئے اور دریافت کیا کہ ”ابوبکر یہاں موجود ہیں؟“ گھر والوں نے جواب دیا: ”نہیں۔“ پھر حضرت عمر رضی اللہ عنہ نبی کریم صلی اللہ علیہ وسلم کے پاس آئے اور انہیں سلام کیا۔ انہیں دیکھ کر نبی کریم صلی اللہ علیہ وسلم کا چہرہ انور متغیر ہونے لگا حتیٰ کہ حضرت ابوبکر رضی اللہ عنہ ڈرے اور دو زانو بیٹھ کر عرض کرنے لگے: ”اللہ کے رسول صلی اللہ علیہ وسلم ! اللہ کی قسم! زیادتی میں نے ہی کی تھی۔“ انہوں نے دو مرتبہ یہ جملہ کہا۔ اس وقت نبی کریم صلی اللہ علیہ وسلم نے فرمایا: ”اے لوگو! اللہ تعالیٰ نے مجھے تمہاری طرف رسول بنا کر بھیجا تو تم لوگوں نے مجھے جھٹلایا لیکن ابوبکر نے مجھے سچا کہا اور انہوں نے اپنے مال اور اپنی جان سے میری خدمت کی۔ کیا تم میری خاطر میرے دوست کو ستانا چھوڑ دو گے؟“ اور آپ نے یہ دو مرتبہ فرمایا۔ اس ارشاد گرامی کے بعد حضرت ابوبکر رضی اللہ عنہ کو پھر کسی نے نہیں ستایا۔“ [صحيح البخاري/كِتَاب فَضَائِلِ الصحابة/حدیث: 3661]

حضرت عمرو بن عاص رضی اللہ عنہ سے روایت ہے کہ نبی کریم صلی اللہ علیہ وسلم نے انہیں غزوہ ذات السلاسل میں امیر بنا کر بھیجا تھا۔ وہ کہتے ہیں کہ میں (واپس) آپ کے پاس آیا تو میں نے عرض کیا: ”سب لوگوں میں کون شخص آپ کو زیادہ محبوب ہے؟“ آپ نے فرمایا: ”عائشہ رضی اللہ عنہا۔“ میں نے عرض کیا: ”مردوں میں سے کون؟“ آپ نے فرمایا: ”ان کے والد گرامی۔“ میں نے پوچھا: ”پھر کون؟“ آپ نے فرمایا: ”پھر عمر بن خطاب رضی اللہ عنہ۔“ اسی طرح درجہ بدرجہ آپ نے کئی آدمیوں کے نام لیے۔ [صحيح البخاري/كِتَاب فَضَائِلِ الصحابة/حدیث: 3662]

حضرت ابوہریرہ رضی اللہ عنہ سے روایت ہے، انہوں نے کہا کہ میں نے رسول اللہ صلی اللہ علیہ وسلم کو یہ فرماتے ہوئے سنا: ”ایک دفعہ ایک چرواہا اپنی بکریوں میں تھا کہ ایک بھیڑیے نے اس پر حملہ کیا اور ان میں سے ایک بکری اٹھا کر لے بھاگا تو گڈریا اسے چھڑانے کے لیے اس کے پیچھے بھاگا۔ اس دوران میں بھیڑیے نے اس کی طرف متوجہ ہو کر کہا: درندوں والے دن ان کا کون محافظ ہو گا، جس دن میرے علاوہ انہیں کوئی نہیں چرائے گا؟ اسی طرح ایک آدمی بیل کو ہانک کر لے جا رہا تھا۔ پھر وہ اس پر سوار ہو گیا تو بیل اس کی طرف متوجہ ہو کر کہنے لگا: میں تو اس کام کے لیے نہیں پیدا ہوا، مجھے تو کھیتی باڑی کے لیے پیدا کیا گیا ہے۔“ لوگوں نے «سُبْحَانَ اللهِ» ”سبحان اللہ“ کہہ کر اپنے تعجب کا اظہار کیا تو نبی کریم صلی اللہ علیہ وسلم نے فرمایا: ”میں اس کی تصدیق کرتا ہوں، نیز حضرت ابوبکر رضی اللہ عنہ اور حضرت عمر رضی اللہ عنہ بھی اس پر یقین رکھتے ہیں۔“ [صحيح البخاري/كِتَاب فَضَائِلِ الصحابة/حدیث: 3663]

حضرت ابوہریرہ رضی اللہ عنہ سے روایت ہے، انہوں نے کہا کہ میں نے رسول اللہ صلی اللہ علیہ وسلم کو یہ فرماتے ہوئے سنا: ”میں ایک دفعہ سو رہا تھا کہ میں نے خود کو ایک ایسے کنویں پر دیکھا جس پر ڈول پڑا تھا۔ میں نے اس سے جس قدر اللہ نے چاہا پانی کے ڈول نکالے، پھر ابن ابی قحافہ رضی اللہ عنہ نے اسے لے لیا اور انہوں نے کنویں سے ایک یا دو ڈول نکالے اور ان کے ڈول کھینچنے میں کچھ ضعف اور ناتوانی تھی، «يَغْفِرُ اللَّهُ لَهُ» ”اللہ تعالیٰ انہیں وہ کمزوری معاف فرمائے۔“ پھر وہ ڈول بڑا ہو گیا تو اسے عمر بن خطاب رضی اللہ عنہ نے لے لیا۔ میں نے لوگوں میں کوئی ایسا زور آور شخص نہیں پایا جو عمر رضی اللہ عنہ کی طرح ڈول نکالتا ہو، حتیٰ کہ سب لوگ سیراب ہو گئے اور انہوں نے اپنے اونٹ بھی سیراب کر کے بٹھا دیے۔“ [صحيح البخاري/كِتَاب فَضَائِلِ الصحابة/حدیث: 3664]