حضرت ابو قتادہ رضی اللہ عنہ سے روایت ہے، انہوں نے کہا کہ میں مکہ اور مدینہ کے درمیان نبی صلی اللہ علیہ وسلم کے ہمراہ تھا، دوسرے صحابہ کرام رضی اللہ عنہم تو احرام باندھے ہوئے تھے جبکہ میں احرام کے بغیر تھا، میں ایک گھوڑے پر سوار تھا اور پہاڑوں پر چڑھنے کا بڑا ماہر تھا۔ میں نے اسی دوران لوگوں کو دیکھا کہ وہ للچائی ہوئی نگاہوں سے کوئی چیز دیکھ رہے ہیں، میں نے دیکھنا شروع کیا تو اچانک میری نظر ایک گاؤخر پر پڑی، میں نے ساتھیوں سے پوچھا: ”یہ کیا چیز ہے؟“ لوگوں نے کہا: ”ہمیں معلوم نہیں۔“ میں نے کہا: ”یہ تو گاؤخر ہے“، انہوں نے کہا: ”یہ وہی ہے جو تو نے دیکھا ہے“۔ میں اپنا کوڑا بھول گیا تھا، میں نے ان سے کہا: ”مجھے میرا کوڑا دے دو“، انہوں نے کہا: ”ہم اس سلسلے میں تمہارا کوئی تعاون نہیں کر سکتے“۔ میں نے اتر کر اپنا کوڑا خود اٹھایا اور اس گاؤخر کے پیچھے دوڑ پڑا، واقعی وہ گاؤخر تھا، میں نے پیچھے سے اس کی ٹانگ کو زخمی کر دیا، میں اپنے ساتھیوں کے پاس آیا اور ان سے کہا کہ اب تم اٹھو اور اسے اٹھا لاؤ، انہوں نے کہا: ”ہم تو اسے ہاتھ نہیں لگائیں گے“۔ بہرحال میں نے خود اسے اٹھایا اور ان کے پاس لے کر آیا، کچھ حضرات نے اس کا گوشت کھایا جبکہ بعض نے انکار کر دیا، میں نے کہا: ”اچھا میں تمہارے لیے نبی صلی اللہ علیہ وسلم سے اس کے متعلق پوچھتا ہوں“، چنانچہ میں آپ صلی اللہ علیہ وسلم کے پاس آیا اور آپ صلی اللہ علیہ وسلم سے سارا واقعہ بیان کیا تو آپ صلی اللہ علیہ وسلم نے مجھے فرمایا: ”کیا تمہارے پاس اس میں سے کچھ باقی بھی بچا ہے؟“ میں نے کہا: ”جی ہاں۔“ آپ صلی اللہ علیہ وسلم نے فرمایا: ”اسے کھاؤ۔ یہ وہ کھانا ہے جو اللہ تعالیٰ نے تمہیں کھلایا ہے۔“ [صحيح البخاري/كِتَاب الذَّبَائِحِ وَالصَّيْدِ/حدیث: 5492]