حضرت عبداللہ بن عباس رضی اللہ عنہما سے روایت ہے، انہوں نے کہا کہ نبی صلی اللہ علیہ وسلم نے فرمایا: ”اپنے ہبہ کو واپس لینے والا اس کتے کی طرح ہے جو اپنی قے کو خود چاٹ جاتا ہے۔ ہمارے لیے اس طرح کی بری مثال مناسب نہیں۔“ [صحيح البخاري/كِتَاب الْحِيَلِ/حدیث: 6975]

حضرت جابر رضی اللہ عنہ سے روایت ہے، انہوں نے کہا: ”نبی صلی اللہ علیہ وسلم نے شفعہ کا حق ہر اس چیز میں دیا ہے جو تقسیم نہ کی گئی ہو۔ جب حد بندی ہو جائے اور راستے الگ الگ کر دیے جائیں تو پھر شفعہ نہیں ہوتا۔“ اس کے باوجود بعض لوگوں نے کہا ہے: ”شفعہ کا حق پڑوسی اور ہمسائے کو بھی ہوتا ہے“، پھر جس چیز (ہمسائے کے حق شفعہ) کو مضبوط کیا تھا اسے خود ہی باطل قرار دیا اور کہا: ”اگر کسی نے کوئی گھر خریدا، پھر اسے خطرہ محسوس ہوا کہ اس کا پڑوسی شفعے کی بنیاد پر اس سے گھر لے لے گا تو اسے چاہیے کہ وہ مکان کے سو حصوں میں سے پہلے ایک حصہ خرید لے، پھر باقی حصے خرید کرے۔ ایسی صورت میں پڑوسی کو صرف پہلے خرید کردہ حصے میں شفعے کا حق ہوگا۔ مکان کے باقی حصوں میں اسے حق شفعہ حاصل نہیں ہوگا۔ خریدار مکان کے متعلق اس قسم کا حیلہ کر سکتا ہے۔“ [صحيح البخاري/كِتَاب الْحِيَلِ/حدیث: 6976]

حضرت عمرو بن شرید رضی اللہ عنہ سے روایت ہے، انہوں نے کہا: حضرت مسور بن مخرمہ رضی اللہ عنہ آئے اور انہوں نے میرے کندھے پر ہاتھ رکھا، پھر میں ان کے ساتھ حضرت سعد بن مالک رضی اللہ عنہ کے پاس گیا۔ (وہاں) ابورافع رضی اللہ عنہ نے حضرت مسور رضی اللہ عنہ سے کہا: ”کیا تم حضرت سعد رضی اللہ عنہ سے میری سفارش نہیں کرتے کہ وہ میرا مکان خرید لیں جو میری حویلی میں ہے؟“ انہوں نے کہا: ”میں تو چار سو درہم سے زیادہ نہیں دوں گا اور وہ بھی قسطوں میں ادا کروں گا۔“ ابورافع رضی اللہ عنہ نے کہا: ”مجھے تو اس کے پانچ سو نقد مل رہے تھے لیکن میں نے انکار کر دیا۔ اگر میں نے رسول اللہ صلی اللہ علیہ وسلم کو یہ فرماتے سنا نہ ہوتا: ”ہمسایہ اپنے قرب کے باعث زیادہ حق دار ہے۔“ تو میں تو تمہیں یہ مکان فروخت نہ کرتا یا تجھے نہ دیتا۔“ (راوی کہتا ہے کہ) میں نے سفیان بن عیینہ رحمہ اللہ سے پوچھا کہ معمر نے تو اس طرح بیان نہیں کیا۔ سفیان رحمہ اللہ نے کہا: ”لیکن مجھے تو ابراہیم بن میسرہ نے یہ حدیث اسی طرح نقل کی ہے۔“ بعض لوگ کہتے ہیں: ”جب کوئی اپنا مکان فروخت کرنے کا ارادہ کرے تو اس کے لیے جائز ہے کہ وہ حیلہ کرے اور حق شفعہ کو غیر مؤثر کرے۔ وہ اس طرح کہ بیچنے والا، خریدار کو وہ مکان ہبہ کر دے اور اس کی حد بندی کر کے اس کے حوالے کر دے۔ پھر خریدار اس ہبہ کے معاوضے میں مالک کو ایک ہزار بطور معاوضہ ادا کر دے، اس طرح شفعہ کرنے والے کو اس میں شفعہ کرنے کا حق نہیں رہے گا۔“ [صحيح البخاري/كِتَاب الْحِيَلِ/حدیث: 6977]

حضرت ابو رافع رضی اللہ عنہ سے روایت ہے کہ حضرت سعد بن مالک رضی اللہ عنہ نے ان کے ایک مکان کی چار سو مثقال قیمت لگائی۔ انہوں نے کہا: ”اگر میں نے رسول اللہ صلی اللہ علیہ وسلم سے یہ نہ سنا ہوتا کہ ”ہمسایہ اپنی ہمسائیگی کی وجہ سے زیادہ حق دار ہے۔“ تو میں یہ مکان تمہیں نہ دیتا۔“ (اس کے باوجود) بعض لوگ کہتے ہیں: ”اگر کسی نے مکان کا کچھ حصہ خریدا اور چاہتا ہے کہ حقِ شفعہ کو باطل کرے تو اسے چاہیے کہ وہ اپنے نابالغ بیٹے کو ہبہ کر دے، اس صورت میں نابالغ پر قسم نہیں ہوگی۔“ [صحيح البخاري/كِتَاب الْحِيَلِ/حدیث: 6978]