حضرت عطاء سے مروی ہے کہ نبی کریم صلی اللہ علیہ وآلہ وسلم ھدی کے جو اونٹ ساتھ لائے تھے ان کو عرفہ لے کر گئے۔ [مصنف ابن ابي شيبه/كتاب الحج/حدیث: 15649]

حضرت ابن عمر رضی اللہ عنہما فرماتے ہیں کہ ھدی نہیں ہے مگر جس کو قلادہ ڈالا جائے اس کا شعار کیا جائے اور اس کو عرفہ میں ٹھہرایا جائے۔ [مصنف ابن ابي شيبه/كتاب الحج/حدیث: 15650]

حضرت عبد الرحمن بن الاسود فرماتے ہیں کہ میں نے حضرت اسود کے ساتھ حج کیا اور آپ کے ساتھ بہت سے ھدی کے جانور تھے، پھر آپ حضرت عائشہ رضی اللہ عنہا کی خدمت میں حاضر ہوئے اور ان سے دریافت فرمایا؟ میں نے ان کو دیکھا کہ انھوں نے ھدی کے جانور منیٰ میں ہی چھوڑ دیئے ان کو عرفہ نہ لے کر آئے۔ [مصنف ابن ابي شيبه/كتاب الحج/حدیث: 15651]

حضرت افلح کہتے ہیں کہ میں نے حضرت قاسم کو دیکھا کہ آپ ھدی کے جانور کو عرفہ کی طرف ہانک رہے ہیں۔ [مصنف ابن ابي شيبه/كتاب الحج/حدیث: 15652]

حضرت اسود فرماتے ہیں کہ حضرت عائشہ رضی اللہ عنہا کی طرف پیغام بھیج کر دریافت کیا گیا کہ کیا ھدی کے اونٹ کو عرفہ لے جایا جائے گا؟ راوی نے کہا کہ آپ نے فرمایا کہ ہاں، آپ نے پھر دریافت کیا کہ اس کا شعار کیا جائے گا؟ آپ نے فرمایا کہ اگر چاہو تو کرسکتے ہیں، شعار تو صرف اس لیے کیا جاتا ہے تاکہ معلوم ہو کہ ھدی کا اونٹ ہے۔ [مصنف ابن ابي شيبه/كتاب الحج/حدیث: 15653]

حضرت ابن عباس رضی اللہ عنہما فرماتے ہیں کہ جو چاہے (ھدی کو) عرفہ لے جائے اور جو چاہے نہ لے جائے، لوگ ھدی کے جانور کو صرف چوری ہوجانے کے خوف سے عرفہ لے جایا کرتے تھے۔ [مصنف ابن ابي شيبه/كتاب الحج/حدیث: 15654]

حسن اس شخص کے متعلق فرماتے ہیں کہ جو ھدی کے اونٹ کو منیٰ میں چھوڑ دے اور اس کو عرفہ لے کر نہ آئے تو اس کے لیے کافی ہے، لیکن آپ اس کو عرفہ لے جانے کو پسند کرتے تھے۔ [مصنف ابن ابي شيبه/كتاب الحج/حدیث: 15655]

حضرت علقمہ فرماتے ہیں کہ عبد اللہ نے ھدی کا جانور میرے ساتھ بھیجا اور فرمایا کہ اگر عرفہ کی شام کو پہنچو تو اس کو عرفہ لے کر جانا۔ [مصنف ابن ابي شيبه/كتاب الحج/حدیث: 15656]

حضرت ضحاک فرماتے ہیں کہ جو ھدی بھیجے اور وہ اس کے ساتھ ہو تو اس کو عرفہ لے کر جائے۔ [مصنف ابن ابي شيبه/كتاب الحج/حدیث: 15657]