حضرت ابن عون فرماتے ہیں کہ میں نے حضرت حسن سے مہر کی کم از کم مقدار کے بارے میں سوال کیا تو انہوں نے فرمایا کہ سونے کی ایک گٹھلی یا اس کے برابر کوئی چیز۔ [مصنف ابن ابي شيبه/كتاب النكاح/حدیث: 17163]

حضرت عمر رضی اللہ عنہ فرماتے ہیں کہ عورتوں کو بہت زیادہ مہر نہ دو، کیونکہ اگر یہ دنیا میں کوئی عزت کی چیز ہوتی یا تقویٰ کا سبب ہوتی تو محمد صلی اللہ علیہ وسلم تم سب سے زیادہ اس کے حقدار اور مستحق ہوتے۔ حالانکہ آپ نے اپنی تمام صاحبزادیوں کا نکاح اور اپنی تمام ازواج سے نکاح بارہ اوقیہ چاندی پر کیا ہے۔ [مصنف ابن ابي شيبه/كتاب النكاح/حدیث: 17164]

ایک اور سند سے یونہی منقول ہے۔ [مصنف ابن ابي شيبه/كتاب النكاح/حدیث: 17165]

حضرت محمد بن ابراہیم فرماتے ہیں کہ حضور صلی اللہ علیہ وسلم کی صاحبزادیوں اور آپ کی ازواج کا مہر پانچ سو درہم تھا۔ [مصنف ابن ابي شيبه/كتاب النكاح/حدیث: 17166]

حضرت علی رضی اللہ عنہ فرماتے ہیں کہ دس درہم سے کم مہر نہیں ہوتا۔ [مصنف ابن ابي شيبه/كتاب النكاح/حدیث: 17167]

حضرت نافع فرماتے ہیں کہ حضرت عمر رضی اللہ عنہ نے عورتوں کا مہر چار سو سے زائد کرنے سے منع کیا ہے۔ [مصنف ابن ابي شيبه/كتاب النكاح/حدیث: 17168]

ابراہیم نے اس بات کو مکروہ قرار دیا ہے کہ چالیس درہم سے کم مہر کے عوض نکاح کیا جائے۔ [مصنف ابن ابي شيبه/كتاب النكاح/حدیث: 17169]

اور حضرت حکم اس میں کوئی حرج نہیں سمجھتے تھے۔ [مصنف ابن ابي شيبه/كتاب النكاح/حدیث: 17170]

حضرت نافع فرماتے ہیں کہ حضرت ابن عمر رضی اللہ عنہما نے چار سو درہم کے عوض صفیہ سے نکاح فرمایا، صفیہ نے انہیں پیغام بھیجا کہ اتنا مہر کافی نہیں ہے۔ پھر حضرت ابن عمر رضی اللہ عنہما نے حضرت عمر رضی اللہ عنہ سے چھپ کردو سو درہم کا اضافہ کیا۔ [مصنف ابن ابي شيبه/كتاب النكاح/حدیث: 17171]

حضرت سعید بن مسیب فرماتے ہیں کہ نکاح میں سنت بارہ اوقیہ پورے اور نصف اوقیہ چاندی ہے اور یہ پانچ سودرہم بنتے ہیں۔ [مصنف ابن ابي شيبه/كتاب النكاح/حدیث: 17172]