راوی کہتے ہیں کہ حضرت علی رضی اللہ عنہ فرمایا کرتے تھے کہ دونوں مدتوں میں سے بعد والی مدت اس کی عدت ہوگی۔ [مصنف ابن ابي شيبه/كتاب النكاح/حدیث: 17984]

حضرت علی رضی اللہ عنہ فرماتے ہیں کہ دونوں میں سے زیادہ مدت اس کی عدت ہوگی۔ [مصنف ابن ابي شيبه/كتاب النكاح/حدیث: 17985]

حضرت عمرو بن سالم رحمہ اللہ فرماتے ہیں کہ حضرت ابی بن کعب رضی اللہ عنہ نے حضور صلی اللہ علیہ وسلم سے عرض کیا کہ کچھ عورتوں کی عدت قرآن مجید میں بیان نہیں کی گئی، یعنی کم عمر، بڑی عمر والی اور حاملہ عورتوں کی۔ اس پر اللہ تعالیٰ نے قرآن مجید کی یہ آیت نازل فرمائی { وَاللاَّئِی یَئِسْنَ مِنَ الْمَحِیضِ مِنْ نِسَائِکُمْ إنِ ارْتَبْتُمْ فَعِدَّتُہُنَّ ثَلاَثَۃُ أَشْہُرٍ وَاللاَّئِی لَمْ یَحِضْنَ وَأُولاَتُ الأَحْمَالِ أَجَلُہُنَّ أَنْ یَضَعْنَ حَمْلَہُنَّ }(الطلاق: ٤) [مصنف ابن ابي شيبه/كتاب النكاح/حدیث: 17986]

حضرت ابن سیرین فرماتے ہیں کہ میں حضرت عبد الرحمن بن ابی لیلیٰ رحمہ اللہ کے حلقے میں تھا۔ انہوں نے فرمایا کہ حاملہ کی عدت دونوں میں سے زیادہ طویل مدت ہے۔ اس پر میں نے حضرت سبیعہ رضی اللہ عنہ کے بارے میں حضرت عبد اللہ بن عتبہ رضی اللہ عنہ کی روایت بیان کی تو ان کے شاگرد مجھے گھورنے لگے۔ میں نے کہا کہ اگر میں حضرت عبد اللہ بن عتبہ رضی اللہ عنہ پر جھوٹ باندھوں تو میں بڑا جری ہوں گا، جب کہ وہ تو مسجد کے ایک گوشے میں موجود ہیں۔ [مصنف ابن ابي شيبه/كتاب النكاح/حدیث: 17987]

حضرت ابن عباس رضی اللہ عنہما فرماتے ہیں کہ جس حاملہ عورت کا خاوند فوت ہوجائے اس کی عدت دونوں مدتوں میں سے زیادہ ہے۔ [مصنف ابن ابي شيبه/كتاب النكاح/حدیث: 17988]

حضرت عبیداللہ رحمہ اللہ اپنے والد سے نقل کرتے ہیں کہ حضرت سبیعہ رضی اللہ عنہ نے اپنے خاوند کی وفات کے بیس دن یا ایک مہینہ بعد بچے کو جنم دیا۔ ان کے یہاں ابو سنابل بن بعکک رضی اللہ عنہ کا گزر ہوا تو انہوں نے کہا کہ کیا تم شادی کے لئے تیار ہو؟ چار مہینے دس دن تک شادی نہ کرنا۔ وہ حضور صلی اللہ علیہ وسلم کے پاس حاضر ہوئی اور ساری بات بیان کی تو آپ نے فرمایا کہ تم شوہروں کے لئے حلال ہو۔ [مصنف ابن ابي شيبه/كتاب النكاح/حدیث: 17989]

حضرت مسروق رحمہ اللہ اور حضرت عمرو بن عتبہ رحمہ اللہ نے حضرت سبیعہ بنت حارث رحمہ اللہ کو خط لکھا اور ان کے واقعے کے بارے میں پوچھا۔ انہوں نے جواب میں لکھا کہ انہوں نے اپنے خاوند کی وفات کے پچیس دن بعد بچے کو جنم دیا تھا۔ پھر وہ خیر کی تلاش میں تیار ہوگئیں۔ ابو سنابل بن بعکک رضی اللہ عنہ کا ان کے پاس سے گزر ہوا تو انہوں نے کہا کہ تم نے بہت جلدی کی، دونوں عدتوں میں سے زیادہ طویل مدت کو گزارو یعنی چار مہینے دس دن۔ پھر وہ حضور صلی اللہ علیہ وسلم کی خدمت میں حاضر ہوئی اور عرض کیا کہ اے اللہ کے رسول! میرے لئے دعاء مغفرت فرمادیجئے۔ حضور صلی اللہ علیہ وسلم نے فرمایا کہ کیا بات پیش آئی؟ انہوں نے سارا قصہ سنایا تو حضور صلی اللہ علیہ وسلم نے فرمایا کہ اگر تمہیں اچھا خاوند ملے تو اس سے شادی کرلو۔ [مصنف ابن ابي شيبه/كتاب النكاح/حدیث: 17990]

حضرت عبد الرحمن بن معقل رحمہ اللہ فرماتے ہیں کہ میں حضرت علی رضی اللہ عنہ کی مجلس میں حاضر تھا، ان سے ایک آدمی نے سوال کیا کہ جس حاملہ عورت کا خاوند فوت ہوجائے اس کی عدت کیا ہوگی؟ حضرت علی رضی اللہ عنہ نے فرمایا کہ دونوں میں سے زیادہ لمبی مدت کو عدت بنائے گی۔ ایک آدمی نے کہا کہ حضرت عبد اللہ بن مسعود رضی اللہ عنہ تو وضع حمل پر عدت کے مکمل ہونے کا فتوی دیتے ہیں؟ حضرت علی رضی اللہ عنہ نے فرمایا کہ وہ نہیں جانتے۔ [مصنف ابن ابي شيبه/كتاب النكاح/حدیث: 17991]