حضرت نافع رحمہ اللہ فرماتے ہیں کہ حضرت ابن عمر رضی اللہ عنہما سے سوال کیا گیا کہ کیا کوئی عورت اپنی باندی کو اپنے خاوند کے لئے حلال قرار دے سکتی ہے؟ انہوں نے فرمایا کہ مجھے نہیں معلوم، لیکن اگر حضرت عمر رضی اللہ عنہ کا زمانہ ہوتاتو وہ اسے سنگسار کرنے کا حکم دیتے، تیرے لئے صرف وہی باندی حلال ہے جسے تو اپنے مرضی سے بیچ سکے اور اپنی مرضی سے آزاد کرسکے، اگر چاہے تو اسے ہبہ کرسکے اور اگر چاہے تو جس سے چاہے اس کا نکاح کراسکے۔ [مصنف ابن ابي شيبه/كتاب النكاح/حدیث: 18186]

حضرت ابن عمر رضی اللہ عنہما فرماتے ہیں کہ فرج کی حلت مکمل ملکیت یا نکاح سے ثابت ہوتی ہے، کہ اگر چاہے تو طلاق دے دے، اگر چاہے تو آزاد کردے اور اگر چاہے تو ہبہ کردے۔ [مصنف ابن ابي شيبه/كتاب النكاح/حدیث: 18187]

حضرت مغیرہ رحمہ اللہ کہتے ہیں کہ میں نے ابراہیم رحمہ اللہ سے سوال کیا کہ اگر کوئی عورت اپنی باندی اپنے بیٹے کے لئے حلال کردے تو کیا وہ اس کے لئے حلال ہے؟ انہوں نے فرمایا کہ وہ اس کے لئے صرف نکاح، ہبہ یا خریدنے سے حلال ہوتی ہے۔ [مصنف ابن ابي شيبه/كتاب النكاح/حدیث: 18188]

حضرت حسن رحمہ اللہ فرماتے ہیں کہ فرج عاریۃً نہیں لیا جاتا اگر مالک کی اجازت سے کسی نے جماع کیا تو وہ اسی کی ہوگئی۔ [مصنف ابن ابي شيبه/كتاب النكاح/حدیث: 18189]

حضرت عطاء رحمہ اللہ فرماتے ہیں کہ اگر ایک آدمی نے دوسرے سے کہا کہ تو میری باندی سے جماع کرلے، اگر وہ حاملہ ہوگئی تو تیری اور اگر حاملہ نہ ہوئی تو مجھے واپس کردینا۔ اس صورت میں اگر اس آدمی نے اس سے وطی کی تو وہ اسی کی ہوجائے گی۔ [مصنف ابن ابي شيبه/كتاب النكاح/حدیث: 18190]

حضرت حکم رحمہ اللہ اور حضرت شعبی رحمہ اللہ فرماتے ہیں کہ اگر کسی نے باندی کی فرج کسی کے لئے حلال کیا تو وہ اسی کی ہوگئی۔ [مصنف ابن ابي شيبه/كتاب النكاح/حدیث: 18191]

نیز دوسری سند سے حضرت شعبی رحمہ اللہ سے بھی یہی منقول ہے، ان دونوں حضرات نے فرمایا کہ اگر اس نے اس کے لئے باندی کی شرمگاہ حلال کردی تو وہ اسی کی ہوگئی۔ [مصنف ابن ابي شيبه/كتاب النكاح/حدیث: 18192]

ابراہیم رحمہ اللہ فرماتے ہیں کہ اگر ایک عورت نے اپنی باندی کسی آدمی کے لئے حلال کردی اور اس جماع سے باندی نے بچے کو جنم دیا تو یہ ایک ایسی شرمگاہ ہے جس پر جہالت کی وجہ سے آیا گیا ہے، بچہ آدمی کا ہوگا اور یہ باندی مالکن کو واپس لوٹائی جائے گی۔ [مصنف ابن ابي شيبه/كتاب النكاح/حدیث: 18193]

حضرت ابن سیرین فرماتے ہیں کہ شرمگاہ عاریۃً نہیں دی جاسکتی۔ [مصنف ابن ابي شيبه/كتاب النكاح/حدیث: 18194]

حضرت عکرمہ رحمہ اللہ سے کسی آدمی نے سوال کیا کہ میری بیوی نے اپنی باندی میرے لئے حلال کردی ہے، کیا وہ میرے لئے حلال ہے۔ انہوں نے فرمایا کہ نہیں تمہارے لئے صرف وہ حلال ہے جس کے تم مالک ہو۔ [مصنف ابن ابي شيبه/كتاب النكاح/حدیث: 18195]