حضرت سعید بن مسیب فرماتے ہیں کہ قسامت زمانہ جاہلیت میں رائج تھی، پھر نبی کریم صلی اللہ علیہ وآلہ وسلم نے انصار کے ایک مقتول کے بارے میں اسے برقرار رکھا جو یہود کے ایک کنویں میں پایا گیا تھا۔ راوی کہتے ہیں: پس رسول اللہ صلی اللہ علیہ وآلہ وسلم نے یہود سے ابتدا فرمائی اور ان پر پچاس آدمیوں کی قسامت لازم کی، یہود نے کہا: ہم ہرگز قسم نہیں اٹھائیں گے۔ پھر رسول اللہ صلی اللہ علیہ وآلہ وسلم نے انصار سے فرمایا: کیا تم قسم اٹھاتے ہو؟ تو انصار نے قسم اٹھانے سے انکار کردیا، پس رسول اللہ صلی اللہ علیہ وآلہ وسلم نے یہود پر اس کی دیت کا تاوان ڈالا، کیونکہ وہ ان کے درمیان قتل ہوا تھا۔ [مصنف ابن ابي شيبه/كتاب الديات/حدیث: 29627]

حضرت معمر فرماتے ہیں کہ حضرت زہری نے ارشاد فرمایا: کہ حضرت عمر بن عبدالعزیز نے مجھے بلا کر مجھ سے قسامت کے شرعی حکم کے متعلق سوال کیا؟ تو آپ نے فرمایا: تحقیق میرے لیے یہ بات ظاہر ہوئی کہ میں اس کو رد کردوں اس لیے کہ دیہاتی گواہی دیتا ہے اور غائب آدمی آتا ہے پس گواہی دے دیتا ہے میں نے کہا: اے امیرالمومنین! آپ اس کو رد نہیں کرسکتے اس لیے کہ رسو ل اللہ اور آپ صلی اللہ علیہ وآلہ وسلم کے بعد خلفاء راشدین نے اس کا فیصلہ فرمایا ہے۔ [مصنف ابن ابي شيبه/كتاب الديات/حدیث: 29628]

حضرت سلیمان بن یسار فرماتے ہیں کہ حضرت عمر بن عبدالعزیز نے ارشاد فرمایا: میں نے کبھی قسامت جیسا قانون نہیں دیکھا جس کے ذریعہ میں قصاص لے لوں اللہ رب العزت فرماتے ہیں۔ ترجمہ:۔ اور گواہی دیں تم میں سے دو عادل شخص اور اسباط نے کہا، ترجمہ:۔ اور ہم نے گواہی نہیں دی مگر اس کی جو ہم جانتے ہیں اور ہم غیب کی باتوں کے نگہبان نہیں ہیں۔ اور اللہ رب العزت نے فرمایا: مگر جو شہادت دے حق کی اور وہ جانتے بھی ہوں۔ [مصنف ابن ابي شيبه/كتاب الديات/حدیث: 29629]

حضرت سلیمان بن یسار نے فرمایا: قسامت برحق ہے رسول اللہ صلی اللہ علیہ وآلہ وسلم نے اس کا فیصلہ فرمایا اس درمیان کہ انصار کے لوگ رسول اللہ صلی اللہ علیہ وآلہ وسلم کے پاس بیٹھے ہوئے تھے کہ اچانک ان میں سے ایک آدمی چلا گیا پھر وہ سب رسول اللہ صلی اللہ علیہ وآلہ وسلم کے پاس سے چلے گئے پس ان لوگوں نے اپنے ساتھی کو خون میں لت پت پایا۔ وہ رسول اللہ صلی اللہ علیہ وآلہ وسلم کے پاس واپس لوٹے اور کہنے لگے، یہود نے ہمیں مار دیا اور انہوں نے یہود میں سے ایک آدمی کا نام لیا حالانکہ ان کے پاس شہادت نہیں تھی پس رسول اللہ صلی اللہ علیہ وآلہ وسلم نے ان سے فرمایا: تمہارے علاوہ دو گواہ گواہی دے دیں تو میں اس شخص کو مکمل تمہارے حوالہ کردوں گا پس ان کے پاس شہادت نہیں تھی۔ آپ صلی اللہ علیہ وآلہ وسلم نے فرمایا: تم پچاس قسموں کے ذریعہ حقدار بن جاؤ۔ میں اس شخص کو مکمل تمہارے حوالے کردوں گا، ان لوگوں نے عرض کیا یا رسول اللہ صلی اللہ علیہ وآلہ وسلم! ہم ناپسند کرتے ہیں کہ ان دیکھی بات پر قسم اٹھائیں پھر اللہ کے نبی صلی اللہ علیہ وآلہ وسلم نے یہود کے پچاس افراد سے قسم لینے کا ارادہ کیا۔ تو انصار کہنے لگے: یا رسول اللہ صلی اللہ علیہ وآلہ وسلم یہود قسم کی پروا نہیں کرتے جب بھی ہم ان سے یہ بات قبول کریں گے تو وہ ہمارے آخری آدمی تک کو ختم کردیں گے تو رسول اللہ صلی اللہ علیہ وآلہ وسلم نے اپنے پاس سے اس کی دیت ادا فرمائی۔ [مصنف ابن ابي شيبه/كتاب الديات/حدیث: 29630]

حضرت عبداللہ بن عمرو فرماتے ہیں کہ حویصہ بن مسعود، محیصہ بن مسعود، اور فلاں کے بیٹے عبداللہ اور عبدالرحمن یہ چاروں خیبر میں غلہ لینے کے لیے نکلے تو عبداللہ پر حملہ ہوا اور اسے مار دیا گیا راوی کہتے ہیں پس یہ بات نبی کریم صلی اللہ علیہ وآلہ وسلم کے سامنے ذکر کی گئی تو نبی کریم صلی اللہ علیہ وآلہ وسلم نے ارشاد فرمایا: تم پچاس قسمیں اٹھاؤ گے تو تم حقدار بن جاؤ گے۔ انہوں نے کہا: یار سول اللہ (صلی اللہ علیہ وآلہ وسلم) ہم کیسے قسم اٹھا سکتے ہیں حالانکہ ہم لوگ وہاں موجود نہیں تھے؟ آپ صلی اللہ علیہ وآلہ وسلم نے فرمایا: پھر یہود تم سے بری ہوجائیں گے یعنی یہود قسم اٹھالیں گے انہوں نے کہا: یا رسول اللہ صلی اللہ علیہ وآلہ وسلم تب تو یہود ہمیں قتل کردیں گے، تو نبی کریم صلی اللہ علیہ وآلہ وسلم نے اس کی دیت اپنے پاس سے ادا فرمائی۔ [مصنف ابن ابي شيبه/كتاب الديات/حدیث: 29631]

حضرت ابن یسار نے بھی نبی کریم صلی اللہ علیہ وآلہ وسلم سے ایسا ہی نقل کیا ہے مگر یوں فرمایا: عبدالرحمن مقتول کا بھائی بات کرنے گیا تو نبی کریم صلی اللہ علیہ وآلہ وسلم نے فرمایا: بلاؤ، بڑے کو بلاؤ پس ان کے بڑے نے بات کی تو رسول اللہ صلی اللہ علیہ وآلہ وسلم نے ارشاد فرمایا: تم پچاس قسمیں اٹھا لو تم حقدار بن جاؤ یا وہ تمہارے لیے پچاس قسمیں اٹھالیں؟ راوی کہتے ہیں انہوں نے عرض کیا، یا رسول اللہ صلی اللہ علیہ وآلہ وسلم ہم کیسے کفار لوگوں کی قسمیں قبول کرسکتے ہیں؟ پس نبی کریم صلی اللہ علیہ وآلہ وسلم نے اس کی دیت اپنے پاس سے ادا فرمائی۔ [مصنف ابن ابي شيبه/كتاب الديات/حدیث: 29632]

حضرت قاسم بن عبدالرحمن فرماتے ہیں کہ دو آدمی کوفہ سے حضرت عمر بن خطاب کے پاس چل کر آئے انہوں نے آپ کو بیت اللہ سے منی کی طرف لوٹتا ہوا پایا ان دونوں نے بیت اللہ کا طواف کیا پھر انہوں نے آپ کو پا لیا تو انہوں نے آپ سے اپنا واقعہ بیان کیا انہوں نے کہا کہ اے امیرالمومنین! ہمارا چچا زاد بھائی قتل ہوگیا ہے اور اس کے خون میں ہم سب برابر کے حقدار ہیں۔ حضرت عمر ان سے خاموش رہے اور انہیں کوئی جواب نہ دیا یہاں تک کہ ان دونوں نے آپ کو اللہ کی قسم دی تو آپ ان پر جھپٹے، پھر انہوں نے آپ کو اللہ یاد دلایا تو آپ ان سے رک گئے۔ پھر حضرت عمر نے فرمایا: ہمارے لیے ہلاکت ہے اگر ہمیں اللہ کے ذریعہ نصیحت نہ کی جائے اور ہمارے لیے ہلاکت ہے اگر ہم اللہ کو یاد نہ کریں۔ کیا تم میں دو عادل گواہ ہیں جنہیں تم اس کے قاتل کے خلاف لے آؤ تو ہم تمہیں اس سے قصاص دلا دیں، ورنہ جو لوگ تمہارا دعوی دور کرنا چاہیں وہ اللہ کی قسم اٹھائیں کہ نہ ہم نے قتل کیا اور نہ ہم قاتل کو جانتے ہیں، اگر وہ انکار کریں تو تم میں سے پچاس آدمی قسم اٹھائیں پھر تمہیں دیت ملے گی۔ [مصنف ابن ابي شيبه/كتاب الديات/حدیث: 29633]

حضرت سفیان فرماتے ہیں کہ حضرت ابو اسحاق نے ارشاد فرمایا: ایک مقتول قبیلہ بنو سلول کے محلہ میں پایا گیا اس کے سرپرست آئے اور انہوں نے بنو سلول والوں کو سبکدوش کردیا اور دوسرے محلہ والوں کے خلاف دعوی کردیا وہ قبیلہ والے بنو سلول کو لیکر حضرت شریح کے پاس آئے تو آپ نے ان سے مدعی علیھم کے خلاف گواہی کے متعلق سوال کیا۔ [مصنف ابن ابي شيبه/كتاب الديات/حدیث: 29634]

حضرت مغیرہ فرماتے ہیں کہ حضرت ابراہیم نے ارشاد فرمایا: جب کسی محلہ میں کوئی مقتول پایا گیا تو ان میں پچاس لوگوں سے قسم لی جائے گی جس میں مدعی علیہم شامل ہوں گے اور اگر وہ لوگ پچاس سے کم ہوں تو ان پر دوبارہ قسم کو لوٹایا جائے گا اول فالا ول کے اعتبار سے۔ [مصنف ابن ابي شيبه/كتاب الديات/حدیث: 29635]

حضرت ابو اسحاق فرماتے ہیں کہ حضرت حارث بن أزمع نے ارشاد فرمایا: یمن میں قبیلہ وادعہ اور ارحب کے درمیان ایک شخص مردہ حال میں پایا گیا تو حضرت عمر بن خطاب کے گورنر نے آپ کو اس بارے میں خط لکھا: حضرت عمر نے اس کو جواب میں لکھا کہ تم دونوں قبیلہ والوں کے درمیان پیمائش کرو کہ یہ مقتول دونوں میں سے کس قبیلہ کے زیادہ نزدیک ہے ان کو پکڑ لو راوی کہتے ہیں: انہوں نے پیمائش کی اور اس میں مقتول کو قبیلہ وادعہ کے زیادہ قریب پایا۔ راوی کہتے ہیں پس اس گورنر نے ہمارے قبیلہ والوں کو پکڑ لیا اور ہمیں ادائیگی کا ذمہ بنایا اور ہم سے قسم اٹھوائی ہم نے عرض کی اے امیرالمومنین! کیا آپ ہم سے قسم اٹھوائیں گے اور ہمیں جرمانہ کی ادائیگی کا ذمہ دار بنائیں گے؟ آپ نے فرمایا: جی ہاں؟ راوی کہتے ہیں: پس ہم میں سے پچاس آدمیوں نے اللہ کی قسم اٹھائی: نہ ہم نے قتل کیا اور نہ ہی ہم قاتل کو جانتے ہیں۔ [مصنف ابن ابي شيبه/كتاب الديات/حدیث: 29636]