حضرت ابو عبیدہ فرماتے ہیں کہ اللہ تعالیٰ فرماتے ہیں کہ ان لوگوں کو کیا ہواجومیری عبادت کے بغیر سمجھدار بننا چاہتے ہیں؟ وہ بھیڑ کی کھال اوڑھتے ہیں لیکن ان کے دل ایلوے (ایک کڑوا پھل) سے زیادہ کڑوے ہیں۔ کیا وہ میری وجہ سے دھوکے میں ہیں یا مجھے دھوکہ دینے کی کوشش کرتے ہیں۔ میں اپنی قسم کھا کر کہتاہوں کہ میں انہیں دنیا میں ایسے فتنے میں مبتلا کروں گا جو ان میں سے بردبار کو بھی حیران و سرگرداں کردے گا۔ [مصنف ابن ابي شيبه/كتاب الزهد/حدیث: 38092]

حضرت ابو عبیدہ فرماتے ہیں کہ ایک متکبر اور سرکش شخص نے کہا کہ میں اس وقت تک باز نہیں آؤں گا جب تک میں اسے نہیں دیکھ لیتا جو آسمان میں ہے۔ اس پر اللہ تعالیٰ نے اس پر اپنی ایک کمزور ترین مخلوق کو مسلط کردیا۔ ایک مچھر اس کے ناک میں داخل ہوا اور اس کی موت کا سبب بن گیا۔ وہ کہتا تھا کہ میرے سر پر مارو، لوگوں نے اس کے سر پر اتنامارا کہ اس کا دماغ بکھر گیا۔ [مصنف ابن ابي شيبه/كتاب الزهد/حدیث: 38093]

حضرت ابو عبیدہ فرماتے ہیں کہ انصاف کرنے والا حاکم اللہ تعالیٰ کی طرف اٹھنے والی آوازوں کو خاموش کرا دیتا ہے اور ظلم کرنے والے حاکم سے اللہ کی طرف جانے والی شکایتیں بڑھ جاتی ہیں۔ [مصنف ابن ابي شيبه/كتاب الزهد/حدیث: 38094]

حضرت ابو عبیدہ قرآن مجید کی آیت {إنَّ ہَؤُلاَئِ لَشِرْذِمَۃٌ قَلِیلُونَ } کی تفسیر میں فرماتے ہیں کہ وہ چھ لاکھ ستر ہزار لوگ تھے۔ [مصنف ابن ابي شيبه/كتاب الزهد/حدیث: 38095]