سیدنا کعب بن عجرہ رضی اللہ عنہ بیان کرتے ہیں: نبی کریم صلی اللہ علیہ وسلم نے انہیں دیکھا کہ ان کی جوئیں ان کے چہرے پر گر رہی تھیں، یہ حدیبیہ کے مقام کی بات ہے، نبی کریم صلی اللہ علیہ وسلم نے ان سے دریافت کیا: ”کیا تمہاری جوئیں تمہیں تنگ کر رہی ہیں؟“ انہوں نے عرض کی: ”جی ہاں!“ تو نبی کریم صلی اللہ علیہ وسلم نے انہیں یہ حکم دیا کہ وہ سر منڈوا لیں، حالانکہ وہ اس وقت حدیبیہ کے مقام پر موجود تھے اور نبی نے ابھی لوگوں کے سامنے یہ بات بیان نہیں کی تھی کہ وہ یہیں احرام کھول لیں گے، کیونکہ لوگ تو یہ چاہتے تھے کہ وہ مکہ میں داخل ہوں، تو اللہ نے فدیہ کا حکم نازل کیا، تو نبی کریم صلی اللہ علیہ وسلم نے انہیں یہ ہدایت کی کہ وہ ایک فرق چھ غریبوں کے درمیان تقسیم کر دیں یا ایک بکری کی قربانی کریں یا تین دن روزے رکھ لیں۔ [سنن الدارقطني/ كِتَابُ الْحَجِّ/حدیث: 2780]

سیدنا کعب بن عجرہ رضی اللہ عنہ بیان کرتے ہیں: نبی کریم صلی اللہ علیہ وسلم ان کے پاس سے گزرے، وہ اس وقت اپنی ہنڈیا کے نیچے آگ سلگا رہے تھے۔ نبی کریم صلی اللہ علیہ وسلم نے دریافت کیا: ”کیا تمہاری جوئیں تمہیں تنگ کر رہی ہیں؟“ پھر نبی نے انہیں یہ ہدایت کی کہ وہ سر منڈوا لیں اور تین دن روزے رکھیں یا ایک فرق چھ مسکینوں کو کھانے کے لیے دیں یا قربانی کر لیں۔ سفیان رحمہ اللہ نامی راوی بیان کرتے ہیں: (اس واقعہ کے بارے میں) یہ آیت نازل ہوئی: ”تو تم میں سے جو شخص بیمار ہو یا اس کے سر میں تکلیف ہو، تو وہ ہدیہ دے۔“ [سنن الدارقطني/ كِتَابُ الْحَجِّ/حدیث: 2781]

سیدنا کعب بن عجرہ رضی اللہ عنہ بیان کرتے ہیں: نبی کریم صلی اللہ علیہ وسلم نے انہیں دیکھا کہ ان کی جوئیں ان کے چہرے پر گر رہی تھیں، یہ حدیبیہ کے مقام کی بات ہے، نبی کریم صلی اللہ علیہ وسلم نے ان سے دریافت کیا: ”کیا تمہاری جوئیں تمہیں تنگ کر رہی ہیں؟“ انہوں نے عرض کی: ”جی ہاں!“ تو نبی کریم صلی اللہ علیہ وسلم نے انہیں یہ حکم دیا کہ وہ سر منڈوا لیں، حالانکہ وہ اس وقت حدیبیہ کے مقام پر موجود تھے اور نبی نے ابھی لوگوں کے سامنے یہ بات بیان نہیں کی تھی کہ وہ یہیں احرام کھول لیں گے، کیونکہ لوگ تو یہ چاہتے تھے کہ وہ مکہ میں داخل ہوں، تو اللہ نے فدیہ کا حکم نازل کیا، تو نبی کریم صلی اللہ علیہ وسلم نے انہیں یہ ہدایت کی کہ وہ ایک فرق چھ غریبوں کے درمیان تقسیم کر دیں یا ایک جانور کی قربانی کریں یا تین دن روزے رکھ لیں۔ [سنن الدارقطني/ كِتَابُ الْحَجِّ/حدیث: 2782]

سیدنا کعب بن عجرہ رضی اللہ عنہ بیان کرتے ہیں: نبی کریم صلی اللہ علیہ وسلم ان کے پاس سے گزرے، وہ اپنی ہنڈیا کے نیچے آگ سلگا رہے تھے۔ یہ حدیبیہ کی بات ہے۔ نبی کریم صلی اللہ علیہ وسلم نے ان سے دریافت کیا: ”کیا تمہاری جوئیں تمہیں تنگ کر رہی ہیں؟“ نبی کریم صلی اللہ علیہ وسلم نے فرمایا: ”تم اپنا سر منڈوا دو۔“ (راوی بیان کرتے ہیں) تو یہ آیت نازل ہوئی: ”تو تم میں سے جو شخص بیمار ہو یا اسے سر میں تکلیف ہو، تو وہ فدیہ کے طور پر روزے رکھے یا صدقہ کر لے یا قربانی کرے۔“ روزہ رکھنے کا حکم تین دن روزے رکھنا ہے۔ صدقے سے مراد یہ ہے کہ چھ مسکینوں کو ایک فرق دیا جائے، اور قربانی سے مراد یہ ہے کہ بکری کی قربانی دی جائے۔ [سنن الدارقطني/ كِتَابُ الْحَجِّ/حدیث: 2783]

سیدنا کعب بن عجرہ رضی اللہ عنہ بیان کرتے ہیں: نبی کریم صلی اللہ علیہ وسلم ان کے پاس سے گزرے، ان کے بال بڑے تھے، ان کے بالوں کی جڑوں میں اور ان کے اوپر والے حصے میں جوئیں تھیں، نبی کریم صلی اللہ علیہ وسلم نے ان سے فرمایا: ”تم اس تکلیف میں ہو، کیا تمہارے ساتھ قربانی کا جانور ہے؟“ انہوں نے عرض کیا: ”نہیں!“ نبی نے فرمایا: ”پھر اگر تم چاہو، تو تین دن روزے رکھ لو یا تین صاع کھجوریں (غریبوں کو) کھلا دو، ہر ایک مسکین کو ایک صاع دو۔“ [سنن الدارقطني/ كِتَابُ الْحَجِّ/حدیث: 2784]