سیدنا عبداللہ بن عباس رضی اللہ عنہما بیان کرتے ہیں کہ نبی کریم صلی اللہ علیہ وسلم نے یہ بات ارشاد فرمائی ہے: ”وارث کے لیے وصیت کرنا جائز نہیں ہے، البتہ اگر دیگر ورثاء چاہیں (تو ایسا ہو سکتا ہے)۔“ [سنن الدارقطني/ كِتَابُ الْوَصَايَا/حدیث: 4297]

امام جعفر صادق رحمہ اللہ اپنے والد کے حوالے سے یہ بات نقل کرتے ہیں کہ نبی کریم صلی اللہ علیہ وسلم نے یہ بات ارشاد فرمائی ہے: ”وارث کے لیے وصیت نہیں ہو گی اور نہ ہی (وراثت کے مال میں) قرض کا اقرار ہو گا۔“ [سنن الدارقطني/ كِتَابُ الْوَصَايَا/حدیث: 4298]

سیدنا عمرو بن خارجہ رضی اللہ عنہ بیان کرتے ہیں کہ نبی کریم صلی اللہ علیہ وسلم نے منیٰ میں ہمیں خطبہ دیتے ہوئے یہ بات ارشاد فرمائی: ”اللہ تعالیٰ نے تم میں سے ہر ایک شخص کا وراثت میں حصہ مقرر کر دیا ہے، اس لیے وارث کے لیے وصیت کرنا جائز نہیں ہے، البتہ ایک تہائی مال میں (وصیت کی جا سکتی ہے)۔“ [سنن الدارقطني/ كِتَابُ الْوَصَايَا/حدیث: 4299]

اختلاف سند کے ساتھ اسی (گزشتہ) حدیث کے ہی مثل ہے۔ [سنن الدارقطني/ كِتَابُ الْوَصَايَا/حدیث: 4300]

سیدنا انس رضی اللہ عنہ بیان کرتے ہیں کہ نبی کریم صلی اللہ علیہ وسلم ، سیدہ عائشہ رضی اللہ عنہا کے گھر میں اپنی بعض دیگر ازواج مطہرات کے ساتھ موجود تھے، یہ سب لوگ کھانے کا انتظار کر رہے تھے، سب سے پہلے وہ (راوی کہتے ہیں: میرا خیال ہے انہوں نے سیدہ حفصہ کا ذکر کیا تھا) سیدہ حفصہ رضی اللہ عنہا اپنے پیالے میں ثرید لے کر آئیں اور اسے وہاں رکھا، تو سیدہ عائشہ رضی اللہ عنہا باہر آئیں، انہوں نے اس پیالے کو پکڑ کر (توڑ دیا)۔ راوی کہتے ہیں: یہ حجاب کا حکم نازل ہونے سے پہلے کی بات ہے۔ سیدہ عائشہ نے اسے پکڑ کر توڑ دیا، تو نبی کریم صلی اللہ علیہ وسلم نے اپنے ہاتھ سے اسے پکڑا اور اسے ملاتے ہوئے فرمایا (یہاں عمران نامی راوی نے اپنے ہاتھ سے اشارہ کر کے یہ بات بتائی تھی کہ اس طرح ملایا): ”تمہاری امی کو غصہ آ گیا تھا۔“ جب آپ کھا کر فارغ ہوئے، تو آپ نے ایک صحیح پیالہ سیدہ حفصہ رضی اللہ عنہا کو بھجوایا اور ٹوٹا ہوا پیالہ سیدہ عائشہ رضی اللہ عنہا کو دیا، گویا فیصلہ یہ ہوا کہ جو شخص کوئی چیز توڑ دے گا، وہ اس کو ملے گی اور اس پر اسی کی مانند چیز کی ادائیگی لازم ہو گی۔ [سنن الدارقطني/ كِتَابُ الْوَصَايَا/حدیث: 4301]

سیدنا عبداللہ بن عباس رضی اللہ عنہما، اللہ تعالیٰ کے اس فرمان کے بارے میں نقل کرتے ہیں: ”اور جب نبی نے اپنی کسی بیوی سے سرگوشی میں کوئی بات کہی۔“ وہ فرماتے ہیں: سیدہ حفصہ رضی اللہ عنہا نے نبی کریم صلی اللہ علیہ وسلم کو دیکھا، آپ اس وقت سیدنا ابراہیم رضی اللہ عنہ کی والدہ (سیدہ ماریہ قبطیہ رضی اللہ عنہا) کے ساتھ موجود تھے، نبی کریم صلی اللہ علیہ وسلم نے فرمایا: ”تم اس بارے میں عائشہ کو نہ بتانا۔“ نبی کریم صلی اللہ علیہ وسلم نے ان سے یہ بھی فرمایا: ”تمہارے والد اور اس کے والد عنقریب حکمران بن جائیں گے (راوی کو شک ہے شاید یہ الفاظ ہیں:) میرے بعد حکومت کریں گے، تم عائشہ کو یہ بات نہ بتانا۔“ سیدہ حفصہ رضی اللہ عنہا گئیں اور انہوں نے سیدہ عائشہ رضی اللہ عنہا کو یہ بات بتا دی تو اللہ تعالیٰ نے نبی کریم صلی اللہ علیہ وسلم کو اس بارے میں آگاہ کر دیا تو سمجھ بات بتا دی اور کچھ بات بیان نہیں کی، انہوں نے اس بارے میں یہ بات بیان کی: ”تمہارے والد اور اس کے والد میرے بعد (حکومت کریں گے)۔“ نبی کریم صلی اللہ علیہ وسلم کو یہ بات اس لیے ناپسند ہوئی کہ یہ بات لوگوں میں پھیل نہ جائے، اسی لیے آپ نے یہ بات بیان نہیں کی۔ [سنن الدارقطني/ كِتَابُ الْوَصَايَا/حدیث: 4302]

سیدنا انس بن مالک رضی اللہ عنہ بیان کرتے ہیں: پہلے لوگ اپنی وصیت کے آغاز میں یہ لکھوایا کرتے تھے: یہ وہ وصیت ہے، جو فلاں بن فلاں نے کی ہے، وہ اس بات کی گواہی دیتا ہے کہ اللہ تعالیٰ کے علاوہ اور کوئی معبود نہیں ہے، وہ ایک معبود ہے، اس کا کوئی شریک نہیں ہے، محمد صلی اللہ علیہ وسلم اس کے خاص بندے اور اس کے رسول ہیں، قیامت آنے والی ہے اور اس میں کوئی شک نہیں ہے اور اللہ تعالیٰ قبروں میں موجود سب لوگوں کو زندہ کرے گا۔ پھر وہ اپنے پس ماندگان کو یہ تلقین کرتا کہ وہ اللہ تعالیٰ سے ڈرتے رہیں اور آپس میں صلح سے کام لیں، اللہ تعالیٰ اور اس کے رسول کی فرماں برداری کریں، اگر وہ ایمان رکھتے ہیں اور وہ ان کو یہ وصیت کر رہا ہے، جو سیدنا ابراہیم (علیہ السلام) نے اپنے بیٹوں کو کی تھی کہ ”اے میرے بیٹو! بیشک اللہ تعالیٰ نے تمہارے لیے ایک دین کو اختیار کر لیا ہے، تو جب تم مرنے لگو، تو مسلمان ہونا۔“ [سنن الدارقطني/ كِتَابُ الْوَصَايَا/حدیث: 4303]