سیدنا ابو موسیٰ اشعری رضی اللہ عنہ سے روایت ہے، رسول اللہ صلی اللہ علیہ وآلہ وسلم نے فرمایا: قیامت کے دن لوگوں کو تین پیشیوں کا سامنا کرنا ہوگا، دو پیشیوں میں تو بحث مباحثہ اور معذرتیں ہوں گی ا ور تیسری پیشی میں تو لوگوں کے اعمال نامے اڑ اڑ کر ہاتھوں میں آپہنچیں گے، کوئی دائیں ہاتھ سے پکڑ رہا ہو گا اور کوئی بائیں ہاتھ سے۔ [الفتح الربانی/أبواب تتعلق بحوض الكوثر/حدیث: 13147]

سیدہ عائشہ رضی اللہ عنہا سے روایت ہے، وہ کہتی ہیں:میں نے کہا: اے اللہ کے رسول! قیامت کے دن دوست اپنے دوستوں اور پیاروں کو یاد کریں گے؟ آپ صلی اللہ علیہ وآلہ وسلم نے فرمایا: عائشہ! تین موقعے تو ایسے ہیں کہ وہاں کوئی کسی کو یاد نہیں کرے گا، ان میں سے ایک ترازو کا موقع ہے، اس میں یہی فکر ہو گی کہ نیکیوں والا پلڑا بھاری ہوتا ہے یا ہلکا، دوسرا موقع نامۂ اعمال کے اڑنے کا ہے کہ وہ کسی کو دائیں ہاتھ میں مل رہا ہو گا اور کسی کو بائیں ہاتھ میں، اس وقت بھی کوئی کسی کو یاد نہیں کرے گا، تیسرا موقعہ وہ ہوگا، جب جہنم سے ایک گردن نکلے گی اورلوگوں پر چھا جائے گی، وہ ان پر غصے کی حالت میں ہو گی اور کہے گی: مجھے تین قسم کے لوگوں پر مسلط کیا گیا ہے، مجھے تین قسم کے لوگوں پر مسلط کیا گیا ہے، مجھے ان لوگوں پر مسلط کیا گیا ہے جنہوں نے اللہ تعالیٰ کے ساتھ کسی دوسرے کو اپنا معبود سمجھ لیا، مجھے ان لوگوں پر بھی مسلط کیا گیا ہے جو یومِ حساب پر ایمان نہیں رکھتے تھے اور مجھے ہر سرکش و نافرمان پر بھی مسلط کیا گیا ہے، وہ ان لوگوں پر چھا جائے گی اور ان کو گہرے گڑھوں میں جا پھینکے گی، جہنم کے اوپر ایک پل ہوگا، جو بال سے زیادہ باریک اور تلوار سے زیادہ تیز ہوگا، اس پر کنڈیاں اور کانٹے ہوں گے اور جن لوگوں کے بارے میں اللہ تعالیٰ کا حکم ہوگا، وہ انہیں کھینچ کر جہنم میں ڈال دیں گے، جب لوگ اس کے اوپر سے گزریں گے تو کوئی آنکھ جھپکنے کی دیر میں، کوئی بجلی کی طرح، کوئی ہوا کی طرح اور کوئی بہترین گھوڑوں اورسواریوں کی رفتار سے گزریں گے، اللہ تعالیٰ کے فرشتے بھی یہ دعاکر رہے ہوں گے: اے ربّ! محفوظ رکھ، اے ربّ! محفوظ رکھ،کوئی تو سلامتی کے ساتھ اس کو عبور کر جائے گا اور کوئی زخمی ہوتا ہوا اس سے گزرے گا اور کوئی چہرے کے بل جہنم میں جا پڑے گا۔ [الفتح الربانی/أبواب تتعلق بحوض الكوثر/حدیث: 13148]

سیدہ عائشہ رضی اللہ عنہا سے روایت ہے، انھوں نے کہا: اے اللہ کے رسول! آپ قیامت کے دن اپنے اہل خانہ کویا د کریں گے؟ آپ صلی اللہ علیہ وآلہ وسلم نے فرمایا: رہا مسئلہ تین موقعوں کا، تو ان میں کوئی کسی کو یاد نہیں کرے گا: نامہ اعمال کی تقسیم، ترازو کے پاس اور پل صراط سے گزرتے وقت۔ [الفتح الربانی/أبواب تتعلق بحوض الكوثر/حدیث: 13149]

سیدنا عبد اللہ بن عمرو بن عاص رضی اللہ عنہ سے روایت ہے، رسول اللہ صلی اللہ علیہ وآلہ وسلم نے فرمایا: قیامت کے دن ترازو نصب کر دیئے جائیں گے، ایک آدمی کو پیش کیا جائے گا، اسے اور اس کے اعمال کو ترازو کے پلڑوں میں رکھا جائے گا، لیکن ترازو اوپر کو اٹھ جائے گا، پھر اسے جہنم کی طرف بھیج دیا جائے گا، جب اسے لے جایا جا رہا ہو گا تو اللہ تعالیٰ کی طرف سے ایک پکارنے والا یوں پکارے گا: جلدی نہ کرو، جلدی نہ کرو، اس کی ایک نیکی رہ گئی ہے، پھر ایک پرچی لائی جائے گی اس میں لَا اِلٰہَ اِلَّا اللّٰہُ لکھا ہوا ہو گا، پھر اسے اس آدمی کے ساتھ دوبارہ پلڑے میں رکھا جائے گا، نتیجتاً وہ پلڑا وزنی ہوجائے گا۔ [الفتح الربانی/أبواب تتعلق بحوض الكوثر/حدیث: 13150]