سیدنا عبداللہ بن عباس رضی اللہ عنہما بیان کرتے ہیں کہ سیدنا عمر بن خطاب رضی اللہ عنہ کے پاس سے بنو فلاں کی ایک مجنونہ (پاگل) عورت گزری جس نے بدکاری کی تھی، سیدنا عمر نے اسے رجم کرنے کا حکم دیا۔ سیدنا علی رضی اللہ عنہ نے اسے واپس کیا اور سیدنا عمر سے فرمایا: "اے امیر المؤمنین! کیا آپ اسے رجم کریں گے؟" انہوں نے کہا: "ہاں،" تو سیدنا علی نے فرمایا: "کیا آپ کو یاد نہیں کہ رسول اللہ صلی اللہ علیہ وسلم نے فرمایا ہے: تین قسم کے لوگوں سے قلم اٹھا لیا گیا ہے: مجنون سے یہاں تک کہ وہ تندرست ہو جائے، سونے والے سے یہاں تک کہ وہ بیدار ہو جائے، اور بچے سے یہاں تک کہ وہ بالغ ہو جائے؟" سیدنا عمر نے کہا: "آپ نے سچ فرمایا،" اور اسے چھوڑ دیا۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابِ الْإِمَامَةِ وَصَلَاةِ الْجَمَاعَةِ/حدیث: 962]