سیدنا انس بن مالک رضی اللہ عنہ سے روایت ہے کہ نبی کریم صلی اللہ علیہ وسلم جب بھی کسی مقام پر قیام فرماتے تو وہاں سے روانہ ہوتے وقت اسے دو رکعتوں کے ساتھ الوداع کہتے تھے۔
یہ حدیث صحیح ہے لیکن شیخین نے اسے روایت نہیں کیا، اور عثمان بن سعد ان راویوں میں سے ہیں جن کی حدیث کو جمع کیا جاتا ہے۔ [المستدرك على الصحيحين/كِتَابُ: الْجِهَادِ/حدیث: 2523]

سیدنا عبداللہ بن عمر رضی اللہ عنہما سے روایت ہے کہ نبی کریم صلی اللہ علیہ وسلم نے فرمایا: ”اگر لوگ تنہائی کے بارے میں وہ (نقصانات) جان لیتے جو میں جانتا ہوں، تو کوئی بھی سوار رات کے وقت کبھی اکیلا سفر نہ کرتا۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ: الْجِهَادِ/حدیث: 2524]

سیدنا عبداللہ بن عباس رضی اللہ عنہما سے روایت ہے کہ ایک شخص خیبر سے نکلا تو دو آدمی اس کے پیچھے ہولیے اور ایک تیسرا شخص ان کے پیچھے یہ کہتا ہوا آ رہا تھا کہ ”تم دونوں واپس لوٹ جاؤ“، یہاں تک کہ اس نے انہیں پا لیا اور واپس بھیج دیا، پھر اس نے (پہلے شخص سے) کہا کہ ”یہ دونوں شیطان تھے، تم رسول اللہ صلی اللہ علیہ وسلم کو میرا سلام کہنا اور انہیں بتانا کہ ہم اپنے صدقات جمع کر رہے ہیں، اگر وہ آپ صلی اللہ علیہ وسلم کے لیے (استعمال کرنا) حلال ہوتے تو ہم ضرور آپ کی طرف بھیج دیتے“، راوی کہتے ہیں کہ جب وہ شخص نبی کریم صلی اللہ علیہ وسلم کی خدمت میں حاضر ہوا اور آپ کو یہ واقعہ سنایا تو اس وقت آپ صلی اللہ علیہ وسلم نے تنہا سفر کرنے سے منع فرما دیا۔
یہ حدیث امام بخاری کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ: الْجِهَادِ/حدیث: 2525]