سیدہ میمونہ رضی اللہ عنہا سے روایت ہے کہ میں نے اپنی ایک لونڈی آزاد کی، پھر نبی کریم صلی اللہ علیہ وسلم میرے پاس تشریف لائے تو میں نے آپ صلی اللہ علیہ وسلم کو اس کے آزاد کرنے کی خبر دی، آپ صلی اللہ علیہ وسلم نے فرمایا: ”سنو! اگر تم یہ لونڈی اپنے ننھیالی رشتہ داروں (ماموں زادوں) کو دے دیتیں تو یہ تمہارے اجر کے لیے زیادہ بڑی بات ہوتی۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ الْعِتْقِ/حدیث: 2883]

سیدنا ابوبکر صدیق رضی اللہ عنہ کے غلام سیدنا سعد رضی اللہ عنہ سے روایت ہے کہ رسول اللہ صلی اللہ علیہ وسلم نے سیدنا ابوبکر صدیق رضی اللہ عنہ سے فرمایا - جبکہ سعد ان کے مملوک تھے اور رسول اللہ صلی اللہ علیہ وسلم کو ان کی خدمت گزاری بہت پسند تھی - تو رسول اللہ صلی اللہ علیہ وسلم نے ارشاد فرمایا: ”اے ابوبکر! سعد کو آزاد کر دو۔“ انہوں نے عرض کی: یا رسول اللہ! ہمارے پاس ان کے علاوہ کوئی خادم نہیں ہے، تو رسول اللہ صلی اللہ علیہ وسلم نے فرمایا: ”تمہارے پاس (دیگر خدمت گزار) مرد آ چکے ہیں، تمہارے پاس مرد آ چکے ہیں۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ الْعِتْقِ/حدیث: 2884]