سیدنا حجاج بن عمرو انصاری رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”جس کی ہڈی ٹوٹ جائے یا لنگڑا ہو جائے تو وہ حلال ہو گیا (یعنی اس کے لیے حلال ہو جانا مباح ہے) اور آئندہ کے لیے اس پر حج ہے۔“ جناب عکرمہ رحمہ اللہ کہتے ہیں: ”میں نے سیدنا ابن عباس رضی اللہ عنہما اور سیدنا ابوہریرہ رضی اللہ عنہ سے اس بارے میں پوچھا، ان دونوں نے (حجاج کی روایت کی) تصدیق کی۔“ [سنن ابي داود/كِتَاب الْمَنَاسِكِ/حدیث: 1862]

سیدنا حجاج بن عمرو رضی اللہ عنہ نبی کریم صلی اللہ علیہ وسلم سے بیان کرتے ہیں کہ آپ صلی اللہ علیہ وسلم نے فرمایا: ”جس کی ہڈی ٹوٹ جائے یا وہ لنگڑا ہو جائے یا بیمار پڑ جائے۔“ اور مذکورہ بالا حدیث کے ہم معنی بیان کیا۔ (امام ابوداؤد رحمہ اللہ کے شیخ) جناب سلمہ بن شبیب نے اپنی سند میں «أَنْبَأَنَا» (یعنی ہم کو خبر دی) کا کلمہ استعمال کیا۔ (اس طرح انہوں نے اپنے شیخ سے سماع کی تصریح کر دی۔) [سنن ابي داود/كِتَاب الْمَنَاسِكِ/حدیث: 1863]

عمرو بن میمون رحمہ اللہ کہتے ہیں کہ میں نے ابوحاضر حمیری رحمہ اللہ کو سنا، وہ میرے والد میمون بن مہران رحمہ اللہ سے بیان کر رہے تھے کہ ”جس سال اہل شام نے مکہ میں ابن زبیر رضی اللہ عنہما کا محاصرہ کیا تھا، میں (ابوحاضر حمیری) عمرے کی غرض سے روانہ ہوا۔ میرے ساتھ قوم کے کچھ افراد نے اپنی قربانیاں بھی بھیجی تھیں۔ جب ہم اہل شام کے پاس پہنچے تو انہوں نے ہمیں حرم میں داخل ہونے سے روک دیا۔ چنانچہ میں نے قربانی اسی جگہ نحر کر دی اور پھر حلال ہو گیا اور واپس لوٹ آیا۔ پھر جب اگلا سال آیا اور میں اپنے عمرے کی قضا کے لیے چلا تو سیدنا ابن عباس رضی اللہ عنہما کے ہاں آیا اور ان سے پوچھا تو انہوں نے کہا: ”اپنی قربانی کا بدل بھی دو۔ بے شک رسول اللہ صلی اللہ علیہ وسلم نے عمرہ قضا میں اپنے صحابہ سے فرمایا تھا کہ حدیبیہ کے سال انہوں نے جو قربانیاں کی تھیں ان کے عوض قربانیاں بھی کریں۔““ [سنن ابي داود/كِتَاب الْمَنَاسِكِ/حدیث: 1864]