علی بن حسین رحمۃ اللہ علیہ اپنے والد سے وہ ان کے دادا سے روایت کرتے ہیں: رسول اللہ صلی اللہ علیہ وسلم نے ارشاد فرمایا: 6 لوگ ایسے ہیں جن پر میں لعنت کرتا ہوں۔ اللہ تعالیٰ بھی ان پر لعنت کرتا ہے اور ہر نبی (جو کہ مستجاب الدعوات ہوتا ہے) نے ان پر لعنت کی ہے۔ (1) قرآن کریم میں اضافہ کرنے والا۔ (2) اللہ تعالیٰ کی تقدیر کو جھٹلانے والا۔ (3) جبراً اقتدار پر مسلط ہونے والا تاکہ ان لوگوں کو ذلیل کرے جن کو اللہ نے عزت دی اور ان کو عزت دے جنہیں اللہ نے ذلیل کیا ہے۔ (4) میری سنت کا تارک۔ (5) میری آل کا بے ادب۔ (6) اللہ تعالیٰ کی حرام کردہ چیزوں کو حلال سمجھنے والا۔ سیدنا سفیان نے کہا: سورۃ وَ الَّیْلِ اِذَا یَغْشٰی ” اور رات کی قسم جب چھائے۔“ فَاَمَّا مَنْ اَعْطٰی ” تو جس نے دیا اور پرہیزگاری کی “ وَ صَدَّقَ بِالْحُسْنٰی ” اور سب سے اچھی کو سچ مانا “ فَسَنُیَسِّرُہٗ لِلْیُسْرٰی ” تو بہت جلد ہم اسے آسانی مہیا کر دیں گے۔“ وَ اَمَّا مَنْ بَخِلَ وَ اسْتَغْنٰی ” اور جس نے بخل کیا اور بے پرواہ بنا “ وَ کَذَّبَ بِالْحُسْنٰی ” اور سب سے اچھی کو جھٹلایا “ فَسَنُیَسِّرُہٗ لِلْعُسْرٰی ” تو بہت جلد ہم اسے دشواری مہیا کر دیں گے “ ابوعلی نے ہمیں ایسے ہی حدیث بیان کی ہے اس کی سند صحیح ہے اور میرا خیال ہے کہ میں پہلے بھی اس کو نقل کر چکا ہوں۔ [المستدرك على الصحيحين/كِتَابُ التَّفْسِيرِ/حدیث: 3984]

ام المومنین سیدہ عائشہ رضی اللہ عنہا فرماتی ہیں: رسول اللہ صلی اللہ علیہ وسلم نے ارشاد فرمایا: چھ آدمی ایسے ہیں جن پر میں لعنت کرتا ہوں، اللہ تعالیٰ اور ہر نبی لعنت کرتا ہے۔ (1) کتاب اللہ میں زیادتی کرنے والا۔ (2) اللہ کی تقدیر کو جھٹلانے والا۔ (3) اقتدار پر مسلط ہونے والا تاکہ ان لوگوں کو عزت دے جنہیں اللہ تعالیٰ نے ذلیل کیا اور ان کو ذلیل کرے جنہیں اللہ نے عزت دی۔ (4) اللہ تعالیٰ کی حرام کردہ چیزوں کو حلال سمجھنے والا۔ (5) میری آل کا گستاخ۔ (6) میری سنت کا تارک۔ ٭٭ امام بخاری رحمۃ اللہ علیہ نے ” جامع الصحیح “ اسحاق بن ممد الفروی اور عبدالرحمن بن ابی الرجال کی روایات نقل کی ہیں اور یہ حدیث پہلی کی بہ نسبت زیادہ درست ہے۔ [المستدرك على الصحيحين/كِتَابُ التَّفْسِيرِ/حدیث: 3985]

سیدنا عبداللہ بن زبیر رضی اللہ عنہ کا بیان ہے کہ ابوقحافہ رضی اللہ عنہ نے سیدنا ابوبکر صدیق رضی اللہ عنہ سے کہا: میں تجھے دیکھتا ہوں کہ تو کمزور غلاموں کو آزاد کرتا ہے، اگر تو طاقتور اور مضبوط غلاموں کو آزاد کرے تو تیرا دفاع کریں اور تیرے ساتھ مل کر دشمن کا مقابلہ کریں۔ سیدنا ابوبکر رضی اللہ عنہ نے فرمایا: ابا جی! میں نے تو جو بھی ارادہ کیا ہے اس آیت کے نزول پر کیا ہے: فَأَمَّا مَنْ أَعْطَى وَاتَّقَى۔ وَصَدَّقَ بِالْحُسْنَى۔ فَسَنُيَسِّرُهُ لِلْيُسْرَى (سورۃ الیل: 5، 6، 7) ” تو وہ جس نے دیا اور پرہیزگاری کی، اور سب سے اچھی کو سچ مانا، تو بہت جلد ہم اسے آسانی مہیا کر دیں گے۔“ اس آیت تک: وَ مَا لِاَحَدٍ عِنْدَہٗ مِنْ نِّعْمَۃٍ تُجْزٰٓی اِلَّا ابْتِغَآءَ وَجْہِ رَبِّہِ الْاَعْلٰی وَ لَسَوْفَ یَرْضٰی (سورۃ الیل: 19، 20، 21) ” اور کسی کا اس پر کچھ احسان نہیں جس کا بدلہ دیا جائے، صرف اپنے رب کی رضا چاہتا ہے جو سب سے بلند ہے، اور بیشک قریب ہے کہ وہ راضی ہو گا “ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3986]