سیدنا عبداللہ بن عباس رضی اللہ عنہما، اللہ تعالیٰ کے ارشاد: وَ الشَّمْسِ وَ ضُحٰھَا ” سورج اور اس کی روشنی کی قسم “ (کی تفسیر کرتے ہوئے) فرماتے ہیں: (ضحاہا سے مراد) اس کی روشنی ہے۔ وَ الْقَمَرِ اِذَا تَلٰھَا ” اور چاند کی جب اس کے پیچھے آئے۔“ (میں تلاھا سے مراد) ” تبعھا “ یعنی اس کے پیچھے آنا ہے۔ اور وَ النَّھَارِ اِذَا جَلّٰھَا ” اور دن کی جب اسے چمکائے “ (میں جلاھا کا معنی) ” اضاء ھا “ یعنی ” اسے چمکائے “ ہے۔ اور: وَ السَّمَآءِ وَ مَا بَنٰھَا ” اور آسمان اور اس کے بنانے والے کی “ (کی تفسیر کرتے ہوئے) فرماتے ہیں: اللہ تعالیٰ نے آسمان کو بنایا: وَ الْاَرْضِ وَ مَا طَحٰھَا ” اور زمین اور اس کے پھیلانے والے کی “ (میں ” طحاھا “ سے مراد) ” دحاھا “ یعنی اس کو پھیلایا ہے۔ اور: وَ نَفْسٍ وَّ مَا سَوّٰھَا فَاَلْھَمَھَا فُجُوْرَھَا وَ تَقْوٰھَا ” اور جان کی اور جس نے اسے ٹھیک بنایا، پھر اس کی بدکاری اور اس کی پرہیزگاری دل میں ڈالی “ (کی تفسیر کرتے ہوئے) فرماتے ہیں: اس کو اس کی بدبختی اور نیک بختی کی پہچان کرا دی۔ قَدْ اَفْلَحَ مَنْ زَکّٰھَا وَ قَدْ خَابَ مَنْ دَسّٰھَا ” بیشک مراد کو پہنچایا جس نے اسے ستھرا کیا، اور نامراد ہوا جس نے اسے معصیت میں چھپایا “ (میں دساھا کا معنی) ” اغواھا “ یعنی (اسے چھپایا) ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3982]

سیدنا عبداللہ بن عباس رضی اللہ عنہما، اللہ تعالیٰ کے ارشاد: فَاَلْھَمَھَا فُجُوْرَھَا وَ تَقْوٰھَا (کی تفسیر کرتے ہوئے) فرماتے ہیں: اس کا معنی ” اَلْزَمَھَا فُجُوْرَھَا وَتَقْوَاھَا “ (اس کا گناہ اور اس کی پرہیزگاری اس کے ساتھ لازم کر دی) ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3983]