ام المومنین سیدہ عائشہ رضی اللہ عنہا سے مروی ہے کہ نبی اکرم صلی اللہ علیہ وسلم نے ارشاد فرمایا ہے: میں تمام انسانیت کا سردار ہوں اور علی اہل عرب کا سردار ہے۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ اور اس کی سند میں ” عمر بن الحسن “ ہیں۔ میرا گمان ہے کہ یہ ” صدوق “ ہیں۔ اگر (مجھے یہ شک) نہ ہوتا تو میں یہ فیصلہ دے دیتا کہ یہ حدیث شیخین رحمۃ اللہ علیہما کے معیار کے مطابق ہے۔ سیدنا عروہ کی سیدہ عائشہ رضی اللہ عنہا کے حوالے سے روایت کردہ حدیث گزشتہ حدیث کی شاہد ہے (وہ حدیث درج ذیل ہے) [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4675]

ام المومنین سیدہ عائشہ رضی اللہ عنہا فرماتی ہیں کہ رسول اللہ صلی اللہ علیہ وسلم نے ارشاد فرمایا: میرے پاس عرب کے سردار کو بلاؤ، میں نے کہا: یا رسول اللہ صلی اللہ علیہ وسلم کیا آپ ” عرب کے سردار “ نہیں ہیں؟ آپ صلی اللہ علیہ وسلم نے فرمایا: میں تو پوری انسانیت کا سردار ہوں اور علی ” عرب کا سردار “ ہے۔ ٭٭ سیدنا جابر رضی اللہ عنہ سے مروی (درج ذیل) حدیث بھی اس حدیث کی شاہد ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4676]

سیدنا جابر رضی اللہ عنہ فرماتے ہیں کہ رسول اللہ صلی اللہ علیہ وسلم نے فرمایا: میرے پاس ” عرب کے سردار “ کو بلاؤ، ام المومنین سیدہ عائشہ رضی اللہ عنہا نے عرض کی: یا رسول اللہ صلی اللہ علیہ وسلم ! کیا آپ (خود) عرب کے سردار نہیں ہیں؟ آپ صلی اللہ علیہ وسلم نے فرمایا: میں تو آدم علیہ السلام کی پوری اولاد کا سردار ہوں اور علی ” عرب کا سردار “ ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4677]