سیدنا جمیع بن عمیر بیان کرتے ہیں: میں اپنی والدہ کے ہمراہ ام المومنین سیدہ عائشہ رضی اللہ عنہا کے ہاں گیا، میں نے پردہ کے پیچھے سے ان کی آواز سنی، میری والدہ ان سے سیدنا علی رضی اللہ عنہ کے بارے میں پوچھ رہی تھیں، تو ام المومنین نے فرمایا: تم مجھ سے اس آدمی کے بارے میں پوچھ رہی ہو، خدا کی قسم! میں سیدنا علی رضی اللہ عنہ کے سوا اور کسی شخص کو نہیں جانتی جو رسول اللہ صلی اللہ علیہ وسلم کو ان سے زیادہ محبوب ہو، اور ان کی زوجہ سے بڑھ کر اور کسی خاتون کو نہیں جانتی جو روئے زمین پر ان سے زیادہ محبوب ہو۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4784]

ام المومنین سیدہ عائشہ رضی اللہ عنہا فرماتی ہیں: میں نے فاطمہ رضی اللہ عنہا سے زیادہ رسول اللہ صلی اللہ علیہ وسلم کے مشابہ گفتگو کسی کی نہیں سنی، اور جب بھی فاطمہ رضی اللہ عنہا حضور صلی اللہ علیہ وسلم کے پاس آتیں تو آپ ان کو خوش آمدید کہتے اور ان کے لئے کھڑے ہو جاتے، آپ علیہ السلام ان کا ہاتھ تھامتے اور (فرط شفقت سے) چوم لیتے اور ان کو اپنی جگہ پر بٹھاتے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن انہوں نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4785]

سیدنا ابوسعید خدری رضی اللہ عنہ فرماتے ہیں: رسول اللہ صلی اللہ علیہ وسلم نے ارشاد فرمایا: فاطمہ رضی اللہ عنہا تمام جنتی عورتوں کی سردار ہیں تاہم سیدنا مریم بنت عمران رضی اللہ عنہا کی جو فضیلت ہے وہ اپنے مقام پر ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ تاہم صرف امام مسلم رحمۃ اللہ علیہ نے ابوموسیٰ کے حوالے سے نبی اکرم صلی اللہ علیہ وسلم کا یہ فرمان نقل کیا ہے کہ تمام کائنات کی عورتوں میں سب سے افضل چار عورتیں ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4786]