سیدہ اسماء بنت عمیس رضی اللہ عنہا فرماتی ہیں: میں رسول اللہ صلی اللہ علیہ وسلم کی صاحبزادی سیدہ فاطمہ رضی اللہ عنہا کی شب عروسی کے موقع پر ان کے گھر موجود تھیں، جب صبح ہوئی تو نبی اکرم صلی اللہ علیہ وسلم دروازے پر تشریف لائے اور فرمایا: اے ام ایمن میرے بھائی کو میرے پاس بلاؤ۔ انہوں نے کہا: وہ تمہارا بھائی ہے؟ جبکہ آپ نے (اپنی بیٹی کے ساتھ) اس کا نکاح کیا ہے۔ آپ نے فرمایا: جی ہاں اے ام ایمن۔ اسی اثناء میں سیدنا علی رضی اللہ عنہ بھی آ گئے، نبی اکرم صلی اللہ علیہ وسلم نے ان کے جسم پر پانی کا چھینٹا مارتے ہوئے دعائے خیر دی اور فرمایا: فاطمہ کو میرے پاس بلاؤ۔ ام ایمن فرماتی ہیں: سیدہ فاطمہ رضی اللہ عنہا حیاء کی وجہ سے جھجکتی ہوئی آئیں، رسول اللہ صلی اللہ علیہ وسلم نے ان سے فرمایا: تم مطمئن رہو کیونکہ میں نے تمہارا نکاح اس شخص کے ساتھ کیا ہے جو پورے خاندان میں مجھے سب سے زیادہ عزیز ہے۔ (سیدہ ام ایمن) فرماتی ہیں: نبی اکرم صلی اللہ علیہ وسلم نے ان پر بھی پانی کے کچھ چھینٹے ڈالے، پھر رسول اللہ صلی اللہ علیہ وسلم واپس تشریف لے گئے، آپ نے اپنے آگے ایک پرچھائی دیکھی اور فرمایا: یہ کون ہے؟ (کیا یہ اسماء بنت عمیس ہے؟) میں نے کہا: (جی ہاں) میں اسماء بنت عمیس ہوں۔ آپ نے پوچھا: کیا تم فاطمہ بنت رسول اللہ صلی اللہ علیہ وسلم کی شب عروسی میں گئی تھی؟ میں نے کہا: جی ہاں۔ تو آپ صلی اللہ علیہ وسلم نے میرے لئے بھی دعا فرمائی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4807]

ام المومنین سیدہ عائشہ رضی اللہ عنہا فرماتی ہیں: میں نے ایسا کوئی شخص نہیں دیکھا جو فاطمہ بنت رسول اللہ صلی اللہ علیہ وسلم سے زیادہ رسول اللہ صلی اللہ علیہ وسلم سے ملتی جلتی گفتگو کرتا ہو۔ فاطمہ جب بھی حضور صلی اللہ علیہ وسلم سے ملنے آتیں تو آپ صلی اللہ علیہ وسلم ان کے لئے اٹھ کر کھڑے ہو جاتے، ان (کی پیشانی) کا بوسہ لیتے، ان کو خوش آمدید کہتے، ان کا ہاتھ اپنے ہاتھ میں پکڑ کر اپنی جگہ پر بٹھاتے، جب رسول اللہ صلی اللہ علیہ وسلم ان سے ملنے کے لئے جاتے تو وہ آپ صلی اللہ علیہ وسلم کے استقبال کے لئے کھڑی ہو جاتیں اور آپ صلی اللہ علیہ وسلم کے ہاتھ چومتیں۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن انہوں نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4808]