سیدنا عبداللہ بن عباس رضی اللہ عنہما فرماتے ہیں: رسول اللہ صلی اللہ علیہ وسلم نے زمین پر چار لکیریں کھینچیں پھر فرمایا: تمہیں معلوم ہے کہ یہ کیا ہے؟ صحابہ کرام رضی اللہ عنہم نے عرض کی: اللہ اور اس کا رسول بہتر جانتے ہیں۔ رسول اللہ صلی اللہ علیہ وسلم نے فرمایا: جنتی عورتوں میں سب سے افضل چار عورتیں ہیں (1) خدیجہ بنت خویلد (2) فاطمہ بنت محمد (اس کے بعد مکمل حدیث بیان کی) ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4809]

سیدنا عبدالرحمن بن عوف رضی اللہ عنہ کے آزاد کردہ غلام سیدنا میناء بن ابومیناء رضی اللہ عنہ نے فرمایا: احادیث کے باطل کے ساتھ خلط ملط ہو جانے سے پہلے مجھ سے حدیث لے لو، وہ کہتے میں نے رسول اللہ صلی اللہ علیہ وسلم کو یہ فرماتے سنا ہے کہ (فرض کرو کہ) میں ایک درخت ہوں تو فاطمہ اس کی شاخ ہے اور علی اس کا لقاح (نر کھجور کا شگوفہ جو مادہ کھجور میں ڈالا جائے) ہے اور حسن اور حسین اس کے پھل ہیں اور ہماری جماعت کے لوگ اس کے پتے ہیں اور اس درخت کی جڑیں جنت عدن میں ہیں۔ اور اس کے بقیہ حصے جنت کے بقیہ مقامات پر ہیں۔ ٭٭ یہ متن شاذ ہے۔ اور اگر بات واقعی ایسی ہی ہے تو اسحاق الدبری صدوق ہیں اور عبدالرزاق اور اس کا والد اور اس کا دادا ثقہ ہیں۔ اور عبدالرحمن بن عوف رضی اللہ عنہ کے آزاد کردہ غلام میناء نے نبی اکرم صلی اللہ علیہ وسلم کی صحبت پائی ہے اور آپ صلی اللہ علیہ وسلم کے فرامین سنے ہیں۔ واللہ اعلم [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4810]

سیدنا یحیی بن عباد بن عبداللہ بن الزبیر اپنے والد کا یہ بیان نقل کرتے ہیں کہ ام المومنین سیدہ عائشہ رضی اللہ عنہا جب بھی سیدہ فاطمہ رضی اللہ عنہا کا تذکرہ کرتیں تو فرماتیں: میں نے ان سے زیادہ سچے لہجے والا شخص کبھی نہیں دیکھا سوائے ان کے والد محترم کے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4811]