ابن شہاب کہتے ہیں: سیدنا ضرار بن ازور اسدی رضی اللہ عنہ ” اجنادین “ والے دن شہید ہوئے۔ (اجنادین کا واقعہ تیرہویں سن ہجری میں سیدنا ابوبکر صدیق رضی اللہ عنہ کے دور خلافت میں پیش آیا تھا۔ جنگ یمامہ کو ہی جنگ اجنادین بھی کہتے ہیں۔ شفیق) [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5114]

سیدنا ضرار بن ازور رضی اللہ عنہ فرماتے ہیں: میں اپنے گھر والوں کی طرف سے کچھ اونٹنیاں حضور صلی اللہ علیہ وسلم کی بارگاہ میں لایا، آپ صلی اللہ علیہ وسلم نے مجھے ان کو دوہنے کا حکم دیا، میں ان کو دوہنے لگا تو آپ صلی اللہ علیہ وسلم نے فرمایا: دودھ بالکل ختم نہیں کرنا بلکہ تھنوں میں کچھ دودھ چھوڑ دینا۔ ٭٭ یہ حدیث صحیح الاسناد ہے، سیدنا ضرار کی رسول اللہ صلی اللہ علیہ وسلم کے حوالے سے اس کے علاوہ کوئی اور روایت نہیں ہے۔ بہرحال ان کے فضائل میں وہ دعا ہے جو رسول اللہ صلی اللہ علیہ وسلم نے ان کے لئے اس وقت مانگی تھی جب انہوں نے قصیدہ پڑھا۔ (ان کے قصیدہ اور دعائے رسول صلی اللہ علیہ وسلم پر مشتمل حدیث درج ذیل ہے۔) [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5115]