ولید بن ہشام مخزومی اپنے والد سے، وہ ان کے دادا سے روایت کرتے ہیں، فرماتے ہیں: مرج الصفر کے دن سیدنا خالد بن سعید بن عاص شہید ہوئے۔ خلیفہ کہتے ہیں: یہ واقعہ تیرہویں سن ہجری کا ہے۔ جب رسول اللہ صلی اللہ علیہ وسلم کا انتقال ہوا تو اس وقت یہ آپ صلی اللہ علیہ وسلم کی جانب سے یمن کے گورنر تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5162]

سیدنا خالد بن سعید بن عمرو بن سعید اپنے والد کے حوالے سے بیان کرتے ہیں کہ ان کے چچا خالد اور ابان رحمۃ اللہ علیہ اور عمرو بن سعید بن عاص کو جب رسول اللہ صلی اللہ علیہ وسلم کی وفات کی خبر ملی تو انہوں نے اپنے (ان تمام) کاموں سے انکار کر دیا (جو وہ رسول اللہ صلی اللہ علیہ وسلم کی حیات میں کیا کرتے تھے) تو سیدنا ابوبکر صدیق رضی اللہ عنہ نے فرمایا: رسول اللہ صلی اللہ علیہ وسلم کے عمال سے زیادہ کوئی شخص معاملات کا حق نہیں رکھتا، جاؤ اپنے ذمہ داری کے کام کرو، لیکن انہوں ںے نے کہا: ہم رسول اللہ صلی اللہ علیہ وسلم کے بعد کسی کے لئے کام نہیں کریں گے، یہ لوگ ملک شام کی جانب چلے گئے اور بالآخر یہ تمام قتل کر دیئے گئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5163]

ابوالیقظان فرماتے ہیں: سیدنا خالد بن سعید بن عاص رضی اللہ عنہ سیدنا ابوبکر صدیق رضی اللہ عنہ سے بھی پہلے اسلام لائے تھے۔ یہ قائل کی غلط فہمی ہے۔ ہم اس سے پہلے وہ روایت پیش کر چکے ہیں جس میں یہ ہے کہ سیدنا ابوبکر صدیق رضی اللہ عنہ نے تو ان کو اسلام کی دعوت دی تھی۔ (پھر یہ کیسے ہو سکتا ہے کہ سیدنا خالد رضی اللہ عنہ، سیدنا ابوبکر رضی اللہ عنہ سے پہلے اسلام لائے ہوں) [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5164]

محمد بن عبداللہ بن ابوبکر اپنے والد کا یہ بیان نقل کرتے ہیں کہ رسول اللہ صلی اللہ علیہ وسلم نے سیدنا خالد بن سعید کو یمن کا والی بنایا تھا، رسول اللہ صلی اللہ علیہ وسلم کی وفات کے بعد وہ مدینہ شریف آئے اور دو ماہ تک انہوں نے سیدنا ابوبکر رضی اللہ عنہ کی بیعت نہ کی۔ ان کا مؤقف یہ تھا کہ مجھے رسول اللہ صلی اللہ علیہ وسلم نے والی بنایا ہے اور پھر اپنی حیات میں آپ نے مجھے معزول نہیں کیا تھا۔ پھر وہ سیدنا علی ابن ابی طالب رضی اللہ عنہ اور سیدنا عثمان بن عبد مناف سے ملے اور ان سے کہا: اے بنی عبد مناف! تم نے خوشدلی کے ساتھ اپنے معاملات اپنے غیر کے سپرد کر دیئے۔ یہ بات سیدنا عمر رضی اللہ عنہ نے سیدنا ابوبکر رضی اللہ عنہ تک پہنچا دی۔ لیکن سیدنا ابوبکر رضی اللہ عنہ نے ان کی اس بات پر سیدنا ابوبکر رضی اللہ عنہ نے تو کوئی برا نہیں مانا لیکن سیدنا عمر رضی اللہ عنہ نے یہ بات بہت محسوس کی۔ پھر سیدنا ابوبکر رضی اللہ عنہ نے شام کی جانب لشکر روانہ فرمایا: اس فوج کے ایک چوتھائی حصے پر سیدنا ابوبکر رضی اللہ عنہ نے سب سے پہلے سیدنا خالد بن سعید رضی اللہ عنہ کو نگران بنایا، اس پر سیدنا عمر رضی اللہ عنہ سیدنا ابوبکر رضی اللہ عنہ سے کہنے لگے: اس کی باتوں اور اس کے کرتوتوں کو اچھی طرح جاننے اور سمجھنے کے باوجود تم نے اس کو امیر بنا دیا؟ سیدنا عمر رضی اللہ عنہ یہی باتیں مسلسل دہراتے رہے حتی کہ سیدنا ابوبکر رضی اللہ عنہ نے ان کو معزول کر کے سیدنا یزید ابن ابی سفیان رضی اللہ عنہ کو امیر مقرر فرما دیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5165]