محمود بن لبید روایت کرتے ہیں کہ سیدنا معاذ بن جبل رضی اللہ عنہ کا بیٹا فوت ہو گیا تو رسول اللہ صلی اللہ علیہ وسلم نے ان کی جانب ایک تعزیتی مکتوب لکھا (جس کا مضمون درج ذیل تھا) بسم اللہ الرحمن الرحیم محمد رسول اللہ صلی اللہ علیہ وسلم کی جانب سے معاذ بن جبل کی طرف۔ تم پر سلامتی ہو، میں اس خدا کی حمد و ثناء کرتا ہوں جس کے سوا کوئی عبادت کے لائق نہیں ہے۔ امابعد! اللہ تعالیٰ آپ کو اجر عظیم عطا فرمائے، اور تمہیں صبر کی توفیق عطا فرمائے اور مجھے اور آپ کو شکر کی توفیق دے۔ بے شک ہماری جانیں، ہمارے مال، ہمارے اہل و عیال سب اللہ کا قیمتی تحفہ اور مفت کی عطا ہے۔ اس نے تمہیں اس کے ذریعے رشک اور خوشی کی دولت عطا فرمائی۔ اور بہت بڑے اجر کے بدلے وہ تم سے واپس لے لیا، دعا، رحمت اور ہدایت یہ ہے کہ ثواب کی نیت رکھے تو صبر اختیار کر۔ تاکہ تیرا رونا دھونا تیرے اجر کو کم نہ کر دے (کہ اگر تیرا اجر کم ہو گیا تو) تو نادم ہو گا۔ اور جان لو کہ رونے دھونے سے گیا ہوا واپس نہیں آ سکتا اور نہ یہ تیرے غم کو دور کر سکتا ہے جو دکھ آنا تھا وہ تو آ گیا۔ والسلام ٭٭ یہ حدیث غریب حسن ہے، مگر مجاشع بن عمرو اس کتاب کے معیار کے راوی نہیں ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5274]