عبداللہ بن ثعلبہ بن صعیر عدوی اپنے والد سے روایت کرتے ہیں کہ نبی اکرم صلی اللہ علیہ وسلم نے کھڑے ہو کر خطبہ دیا اور ہر ایک کی طرف سے ایک صاع (خاص پیمانہ) کھجوریں یا ایک صاع جو فطرانہ ادا کرنے کا حکم دیا۔ یا ہر چھوٹے بڑے آدمی کی طرف سے ایک صاع کھجوریں یا دو ” مد “ گندم فطرانہ دینے کا حکم دیا۔ ٭٭ اس حدیث کو زہری کے اکثر اصحاب نے زہری کے واسطے سے عبداللہ بن ثعلبہ کے حوالے سے نبی اکرم صلی اللہ علیہ وسلم سے روایت کیا ہے اور ان کے والد کا ذکر نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5296]

سیدنا عبداللہ بن ثعلبہ اپنے والد سے روایت کرتے ہیں کہ نبی کریم صلی اللہ علیہ وسلم نے صدقہ فطر چھوٹے اور بڑے (سب) پر فرض کیا، جو کہ کھجور کا ایک صاع یا گندم کے دو مد (نصف صاع) ہے۔ امام حاکم فرماتے ہیں: یہ حدیث زہری کے اکثر اصحاب نے ان سے، انہوں نے عبداللہ بن ثعلبہ سے اور انہوں نے نبی کریم صلی اللہ علیہ وسلم سے روایت کی ہے، مگر ان سب نے (سند میں) ان کے والد کا ذکر نہیں کیا ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5297]

مصعب بن عبداللہ کہتے ہیں: اور عبداللہ بن ثعلبہ بن صعیر بن ابی صعیر عدوی ہجرت سے چار سال قبل پیدا ہوئے، (پیدائش کے بعد) ان کو رسول اللہ صلی اللہ علیہ وسلم کی بارگاہ میں لایا گیا، آپ صلی اللہ علیہ وسلم نے ان کے چہرے پر ہاتھ پھیرا، اور ان کے لئے دعائے برکت فرمائی۔ جب رسول اللہ صلی اللہ علیہ وسلم کا انتقال ہوا تو اس وقت ان کی عمر 14 سال تھی، ان کی کنیت ابومحمد تھی، 93 سال کی عمر میں 89 ہجری کو ان کا انتقال ہوا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5298]

سیدنا عبداللہ بن ثعلبہ بن صعیر عدوی فرماتے ہیں کہ نبی اکرم صلی اللہ علیہ وسلم نے ان کے چہرے پر دست مبارک پھیرا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5299]