سیدنا سوید بن مقرن رضی اللہ عنہ فرماتے ہیں: رسول اللہ صلی اللہ علیہ وسلم کے زمانے میں ہم مقرن کے سات بیٹے تھے، ہمارا ایک خادم تھا، ایک بھائی نے ان کو تھپڑ مار دیا، نبی اکرم صلی اللہ علیہ وسلم نے فرمایا: تم (اس کے کفارے کے طور پر) اس کو آزاد کر دو۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5363]

محمد بن عمر کہتے ہیں: اور قتادہ بن نعمان بن یزید بن عمرو بن سواد بن ظفر۔ اور ظفر کا نام ”کعب بن خزرج بن عمرو“ ہے۔ یہ ”نبیت بن مالک بن اوس “ ہیں۔ سیدنا قتادہ کی کنیت ”ابوعمرو“ تھی، یہ سیدنا قتادہ کے دونوں بیٹوں عاصم اور یعقوب کے دادا ہیں۔ اور عاصم بن عمرو سیر وغیرہ کے علماء میں سے تھے۔ سیدنا قتادہ بن نعمان رضی اللہ عنہ نے ستر انصاری صحابہ کرام رضی اللہ عنہم کے ہمراه عقبہ میں شرکت کی تھی۔ اور جنگ احد میں تیر اندازوں میں بھی شامل تھے۔ جنگ بدر اور احد میں شرکت کی ہے۔ جنگ احد کے موقع پر ان کی آنکھ پر تیر لگا جس کی وجہ سے ان کی آنکھ باہر آ گئی تھی، یہ رسول اللہ صلی اللہ علیہ وسلم کی بارگاہ میں حاضر ہوئے، اور عرض کی: یا رسول اللہ صلی اللہ علیہ وسلم ! میری بیوی مجھ سے بہت محبت کرتی ہے، اگر اس نے میری یہ پھوٹی ہوئی آنکھ دیکھ لی تو مجھے خدشہ ہے کہ وہ مجھ سے نفرت کرنے لگ جائے گی، رسول اللہ صلی اللہ علیہ وسلم نے ان کی آنکھ، آنکھ کے مقام پر لگا کر درست فرما دی، ان کی بینائی لوٹ آئی، بلکہ اس آنکھ کی بینائی دوسری سے زیادہ ہو گئی۔ اور بڑھاپے کے عالم میں بھی یہ آنکھ سلامت رہی۔ آپ جنگ خندق اور تمام غزوات میں رسول اللہ صلی اللہ علیہ وسلم کے ہمراہ شریک ہوئے، اور فتح مکہ کے موقع پر بنی ظفر کا جھنڈا انہیں کے ہاتھوں میں تھا۔ ٭٭ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5364]

محمد بن عمرو اپنی سند کے ہمراہ بیان کرتے ہیں کہ سیدنا قتادہ بن نعمان رضی اللہ عنہ 23 ہجری میں فوت ہوئے، وفات کے وقت ان کی عمر 65 برس تھی۔ سیدنا عمر بن خطاب رضی اللہ عنہ نے ان کی نماز جنازہ پڑھائی، ان کے ماں شریک بھائی سیدنا ابوسعید خدری رضی اللہ عنہ، سیدنا محمد بن مسلمہ رضی اللہ عنہ اور سیدنا حارث بن خزیمہ رضی اللہ عنہ نے ان کو لحد میں اتارا تھا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5365]