سیدنا موسیٰ بن عقبہ فرماتے ہیں، خیبر سن 6 ہجری کو فتح ہوا۔ اور یہ درج ذیل روایت اس کے بالکل متضاد ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5376]

سیدنا عمرو بن عاص رضی اللہ عنہ فرماتے ہیں: میں رسول اللہ صلی اللہ علیہ وسلم سے ملاقات کی نیت سے نکلا، تو میری ملاقات سیدنا خالد بن ولید رضی اللہ عنہ کے ساتھ ہوئی، یہ بات فتح مکہ سے کچھ دن پہلے کی ہے۔ سیدنا خالد رضی اللہ عنہ مکہ سے آ رہے تھے۔ میں نے ان سے پوچھا: اے ابوسلیمان! تم کہاں جا رہے ہو؟ انہوں نے جواباً کہا: خدا کی قسم جنگ کے زخم مندمل ہو چکے ہیں بے شک وہ آدمی نبی ہے۔ میں اسلام قبول کرنے کے لئے جا رہا ہوں، آخر کب تک (حق سے روگردانی کرتا رہوں گا؟) پھر ہم مدینہ شریف میں رسول اللہ صلی اللہ علیہ وسلم کی بارگاہ میں حاضر ہوئے، پہلے سیدنا خالد بن ولید رضی اللہ عنہ نے آگے بڑھ کر اسلام قبول کیا اور حضور صلی اللہ علیہ وسلم کی بیعت کی۔ پھر میں بھی آپ صلی اللہ علیہ وسلم کے قریب ہوا اور آپ کی بیعت کرنے کے بعد واپس آ گیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5377]