وحشی بن حرب بن وحشی اپنے باپ سے وہ ان کے دادا سے روایت کرتے ہیں کہ سیدنا ابوبکر صدیق رضی اللہ عنہ نے مرتدین کی سرکوبی کے لئے سیدنا خالد بن ولید رضی اللہ عنہ کو مقرر فرمایا، لیکن سیدنا خالد بن ولید رضی اللہ عنہ نے اس پر کچھ لیت و لعل کی، مگر سیدنا ابوبکر رضی اللہ عنہ ان کو واپس لانے سے انکار کر دیا اور فرمایا: میں نے رسول اللہ صلی اللہ علیہ وسلم کو خالد بن ولید رضی اللہ عنہ کے تذکرے میں یہ کہتے ہوئے سنا ہے کہ ”وہ یعنی خالد بہت اچھا اللہ کا بندہ ہے، خاندانی آدمی ہے، اور اللہ تعالیٰ کی تلواروں میں سے ایک تلوار ہے“۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5378]

عبدالله بن جعفر رضی اللہ عنہ فرماتے ہیں: رسول اللہ صلی اللہ علیہ وسلم نے اہل موتہ کی وفات کی خبر دی، پھر فرمایا: پھر اللہ کی تلوار خالد بن ولید رضی اللہ عنہ نے علم پکڑا، الله تعالیٰ نے ان کے ہاتھ پر فتح عطا فرما دی۔ ٭٭ یہ حدیث عالی ہے اور ایوب کی سند کے ہمراہ یہ غریب ہے اور شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5379]

سیدنا انس بن مالک رضی اللہ عنہ فرماتے ہیں کہ رسول اللہ صلی اللہ علیہ وسلم نے منبر پر اہل موتہ کی وفات کی خبر سنائی پھر فرمایا: اب جھنڈے کو خالد بن ولید نے پکڑ لیا ہے اور وہ اللہ کی تلوار ہے۔ ٭٭ یہ روایت سند کے اعتبار سے بلند مرتبہ ہے اور صحیح ہے تاہم ایوب سے منقول ہونے کے حوالے سے غریب ہے۔ شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5380]

سیدنا عبداللہ ابن ابی اوفیٰ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: خالد کو تکلیف مت دیا کرو، کیونکہ یہ اللہ کی ایک تلوار ہے جو اس نے کافروں پر مسلط کی ہے۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5381]

حمید بن منہب کہتے ہیں: میرے دادا اوس بن حارثہ بن لام بیان کرتے ہیں کہ اہل عرب کو سب سے زیادہ عداوت ہرمز سے تھی، جب ہم مسیلمہ کذاب اور اس کے ساتھیوں کے فتنہ سے فارغ ہوئے تو ہم بصرہ کی ایک نواحی بستی کی جانب جا رہے تھے کہ کاظمہ کے مقام پر ہمارا سامنا ہرمز کے ساتھ ہوا، وہ فوج کے ایک جم غفیر میں موجود تھا۔ سیدنا خالد رضی اللہ عنہ نے ان کو جنگ کی دعوت دی، ہرمز آپ کی دعوت پر میدان جنگ میں اتر آیا، سیدنا خالد بن ولید رضی اللہ عنہ نے اس کو واصل جہنم کر دیا اور اس کے بارے میں ایک مکتوب سیدنا ابوبکر صدیق رضی اللہ عنہ کی جانب روانہ کر دیا، سیدنا ابوبکر رضی اللہ عنہ نے اس کا تمام مال سیدنا خالد ہی کو دے دیا۔ جب قیمت لگائی گئی تو صرف اس کی ٹوپی کی قیمت ایک لاکھ درہم تھی۔ ان میں یہ قانون تھا سپہ سالار کی ٹوپی کی قیمت ایک لاکھ درہم رکھتے تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5382]