عبدالحميد بن جعفر اپنے والد کا بیان نقل کرتے ہیں: جنگ یرموک کے موقع پر سیدنا خالد بن ولید رضی اللہ عنہ کی ٹوپی گم ہو گئی، آپ نے فرمایا کہ اس کو ڈھونڈو، لوگوں نے ڈھونڈی، مگر نہ ملی، پھر دوبارہ ڈھونڈی تو مل گئی، یہ ٹوپی بہت پرانی تھی، سیدنا خالد بن ولید رضی اللہ عنہ نے فرمایا: ایک مرتبہ رسول اللہ صلی اللہ علیہ وسلم نے عمرہ کرنے کے بعد جب حلق کروایا تھا تو لوگ آگے بڑھ بڑھ کر آپ صلی اللہ علیہ وسلم کے بال حاصل کر رہے تھے میں نے بھی کوشش کی تو مجھے بھی آپ کی پیشانی کا ایک بال مل گیا، میں نے اس کو اپنی اس ٹوپی میں سی لیا تھا اس کے بعد میں نے کبھی بھی اس ٹوپی کے بغیر کسی جنگ میں شرکت نہیں کی، اور جب بھی اس ٹوپی کے ساتھ شرکت کی ہے اللہ تعالیٰ نے (اس موئے مبارک کی برکت سے) فتح و نصرت عطا فرمائی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5383]

سیدنا ابووائل رضی اللہ عنہ فرماتے ہیں: سیدنا خالد بن ولید رضی اللہ عنہ نے رستم، مہران اور ایران کے سرداروں کو خط لکھا جس کا مضمون یہ تھا ”سلام ہو اس پر جس نے ہدایت کی پیروی کی۔ امابعد، ہم تمہیں اسلام کی دعوت دیتے ہیں۔ اگر تمہیں اسلام قبول کرنے سے انکار ہو تو ہمارے ماتحت رہ کر تم ہمیں ٹیکس دو گے۔ اور اگر تمہیں اس سے بھی انکار ہو تو یاد رکھو ہمارے پاس ایسی قوم ہے جو جہاد فی سبیل اللہ سے اتنی محبت کرتے ہیں جتنی محبت تم لوگ شراب اور جوئے سے کرتے ہو۔ ٭٭ سیدنا خالد بن ولید رضی اللہ عنہ کی وفات کے بارے میں اختلاف ہے۔ اس سے پہلے ہم نے واقدی کے حوالے سے 21 ہجری آپ کا سن وفات بیان کیا ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5384]

مصعب بن عبداللہ کہتے ہیں: سیدنا خالد بن ولید رضی اللہ عنہ مدینہ میں 22 ہجری کو فوت ہوئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5385]