سیدنا عباس بن عبد المطلب رضی اللہ عنہ سے روایت ہے کہ ان سے پوچھا گیا: ”آپ بڑے ہیں یا نبی کریم صلی اللہ علیہ وسلم ؟“ تو انہوں نے (انتہائی ادب و احترام سے) جواب دیا: ”بڑے تو وہی (رسول اللہ صلی اللہ علیہ وسلم ) ہیں، البتہ میری ولادت ان سے پہلے ہوئی تھی۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5484]

زبیر بن بکار بیان کرتے ہیں کہ سیدنا عباس رضی اللہ عنہ رسول اللہ صلی اللہ علیہ وسلم سے تین سال بڑے تھے، وہ کہتے ہیں کہ (جب رسول اللہ صلی اللہ علیہ وسلم کی ولادت ہوئی تو) میری والدہ کو بتایا گیا کہ سیدہ آمنہ کے ہاں بچہ پیدا ہوا ہے، تو وہ صبح کے وقت میرا ہاتھ پکڑ کر ان کے پاس لے گئیں، گویا میں اب بھی دیکھ رہا ہوں کہ آپ صلی اللہ علیہ وسلم اپنے صحن میں اپنے پاؤں ہلا رہے تھے اور عورتیں مجھے اپنی طرف کھینچ رہی تھیں اور کہہ رہی تھیں: ”اپنے بھائی کو بوسہ دو۔“ سیدنا عباس رضی اللہ عنہ کی وفات سن 34 ہجری میں ہوئی اور اس وقت ان کی عمر 88 برس تھی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5485]