عمرو بن وابصہ اسدی اپنے والد سے روایت کرتے ہیں، انہوں نے کہا: میں کوفہ میں اپنے گھر میں تھا کہ اچانک میں نے گھر کے دروازے پر سنا: ”السلام علیکم، کیا میں اندر آ سکتا ہوں؟“ میں نے کہا: ”وعلیک السلام، آ جائیے“، جب وہ اندر آئے تو دیکھا کہ وہ سیدنا عبد اللہ بن مسعود رضی اللہ عنہ ہیں، میں نے عرض کی: ”اے ابو عبد الرحمن! یہ ملاقات کا کون سا وقت ہے؟“ اور وہ عین دوپہر کا وقت تھا، انہوں نے فرمایا: ”آج کا دن مجھ پر طویل ہو گیا تھا تو میں نے سوچا کہ کسی سے بات چیت کروں“، راوی کہتے ہیں کہ وہ مجھ سے رسول اللہ صلی اللہ علیہ وسلم کی احادیث بیان کرنے لگے اور میں ان سے، پھر انہوں نے یہ حدیث بیان کی کہ میں نے رسول اللہ صلی اللہ علیہ وسلم کو یہ فرماتے ہوئے سنا: ”عنقریب ایک فتنہ برپا ہوگا، اس میں سونے والا لیٹنے والے سے بہتر ہوگا، لیٹنے والا بیٹھنے والے سے بہتر ہوگا، بیٹھنے والا کھڑے ہونے والے سے بہتر ہوگا، کھڑا ہونے والا چلنے والے سے بہتر ہوگا، چلنے والا سوار سے بہتر ہوگا اور سوار (گھوڑا) تیز دوڑانے والے سے بہتر ہوگا، اس فتنے میں مارے جانے والے تمام مقتول جہنم میں جائیں گے“، میں نے عرض کی: اے اللہ کے رسول! یہ کب ہوگا؟ آپ صلی اللہ علیہ وسلم نے فرمایا: ”یہ ’ہرج‘ (فتنہ و فساد اور قتل و غارت) کے دنوں میں ہوگا“، میں نے پوچھا: ہرج کے دن کب ہوں گے؟ آپ صلی اللہ علیہ وسلم نے فرمایا: ”جب آدمی اپنے پاس بیٹھنے والے سے بھی خود کو محفوظ نہ سمجھے“، میں نے عرض کی: اگر میں وہ زمانہ پاؤں تو آپ مجھے کیا حکم دیتے ہیں؟ آپ صلی اللہ علیہ وسلم نے فرمایا: ”اپنے نفس اور اپنے ہاتھ کو (فتنے سے) روک لینا اور اپنے گھر میں رہنا“، میں نے عرض کی: اے اللہ کے رسول! اگر کوئی زبردستی میرے گھر میں داخل ہو جائے تو؟ آپ صلی اللہ علیہ وسلم نے فرمایا: ”تو تم اپنے کمرے (بیٹھک) میں چلے جانا“، میں نے عرض کی: اگر کوئی وہاں بھی گھس آئے تو؟ آپ صلی اللہ علیہ وسلم نے فرمایا: ”تو تم اپنی جائے نماز (مسجد) میں چلے جانا اور اس طرح کر لینا — اور آپ صلی اللہ علیہ وسلم نے اپنے دائیں ہاتھ سے (بائیں) کلائی کا جوڑ پکڑ کر دکھایا — اور کہنا: میرا رب اللہ ہے، یہاں تک کہ اسی حال پر تمہیں موت آ جائے۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5483]